NGÚERUÜ̃ 3
Nhaã i deꞌagü i megüü̃ aicuma eꞌna Tupanaarü yiꞌĩü?
1. Teꞌearü inügü niꞌĩ Tupanaarü Orewa ngemagüü̃?
Yeuwaarü inügü niꞌĩ Tupanaarü Orewa ngemagüü̃. Deꞌa i meü̃ i nüü̃ iꞌuü̃ na Naanewa ta tamaꞌẽü̃ ya duẽꞌẽgü rü Tupanaarü Orewa nangema. (Salmo 37:29) Tupanaarü Orewa 66 poperagü nangema. Tupana rü 40 ga yatügüü̃ nideꞌetchi na ngema poperagü naümatügüü̃caꞌ. Marü 3.500 taunecü nangupetü na Moĩche naümatüü̃ i 5 ga nüĩratchiü̃ ga poperagü. Marü 1.900 taunecü nangupetü na Juã́ũ naümatüü̃ i guwa üü̃ i popera. Teꞌearü inügü niꞌĩ Tupanaarü Orewa ngemagüü̃? Tupana rü yema norü Ore ümatügüü̃wa nideꞌa, naãẽ i üüneü̃maã. (Marcu 12:36) Tupanaarü inügü niꞌĩ naümatügüü̃, tama norügü. Nawa naugütae i 2 Timúteu 3:16 rü 2 Pedru 1:20, 21.
Nüü̃ cudau i vídeo Teꞌearü inügü niꞌĩ Tupanaarü Orewa ngemagüü̃?
2. Nhuãcü nüü̃ icuaꞌü̃ na ya aicumaü̃ i Tupanaarü Ore?
Nüü̃ tacuaꞌgü na Tupanaarü yiꞌĩü̃ i Tupanaarü Ore erü nawa rü meãma nüü̃ niꞌu i ngema wipeewa ngupetüü̃ ta. Tauema ya duẽꞌẽ ngema taü. (Josué 23:14)Tupana ya Guü̃arü Yeera Poracü rica niꞌĩ nüü̃ iꞌucü i ngema wipeewa guanema ya duẽꞌẽgümaã ngupetüü̃ ta. Nawa naugütae i Isaías 42:9 rü 46:10, TNM.
Natauma i to popera i Tupanaarü Orerüü̃ iꞌĩü̃. Muũma i nagawa marü muũtchiü̃ma i Tupanaarü Orearü yautchipetamaã nanuẽ. Tupanaarü Ore guꞌü̃gu nawegu ngeguma ciênciatchiga ya deꞌagu woo nanucümaü̃tchire. Yema 40 ga yatügü ga naümatügüü̃ rü nawüiguarü inüa. Tupanaarü Orewa nangema i Tupanaarü ngetchaü̃ rü pora i to maꞌü̃ duẽꞌẽgüna ãü̃. Guü̃ma ngemagagu niꞌĩ muũtchiü̃ma i duü̃ü̃gü nayaꞌõgüü̃ na Tupanaarü Ore rü Yeuwaarü yiꞌĩü̃. Nawa naugütae i 1 Techarónicacü̃ã 2:13.
Nüü̃ cudau i vídeo Taꞌacü tüü̃ nüü̃ cuaꞌẽü̃ na aicuma Tupanaarü yiꞌĩü̃ i Biblia?
3. Taꞌacü i Tupanaarü Ore natchiga ya deꞌaü̃?
Tupanaarü Orewa nangema i deꞌagü i megüü̃. Ngema deꞌagü rü norü niꞌĩ ya Tupana rü taca niꞌĩ. Tupanaarü Ore rü nüü̃ niꞌu nhuãcü ga Adãũ rü Ewa nanatauꞌẽgüü̃ ga Meẽtchiü̃ i Naane i nawa tchi guꞌü̃gu namaꞌẽ. Rü nhuꞌmatchi nüü̃ niꞌu nhuãcü wipeewa Meẽtchiü̃ i Naane nanguutchi i Naane. Nawa naugütae i Apocaríchiu 21:4, 5.
Tupanaarü Ore nüü̃ niꞌu ga guü̃ma ga Tupana duẽꞌẽgücaꞌ naüü̃. Ngeguma nawa ugütaegu nhuãcü norü duü̃ü̃gümaã naãcümaü̃ ya Tupana, nüü̃ tacuaꞌgü ta teꞌe yiꞌĩü̃. Ngemaãcü, Tupanaarü Ore cuü̃ narüngüꞌẽẽ ta na Tupanaü̃ cucuaꞌü̃. Tupanaarü Ore nüü̃ niꞌu nhuãcü ta namücü quiꞌĩü̃. Tupanaarü Orewa ta mugü rü ucuẽgü nangema na tüü̃ narüngüꞌẽẽü̃caꞌ. Nawa naugütae i Salmo 19:7, 11, Tiagu 2:23 rü 4:8.
4. Taꞌacü ta cuü̃ rüngüꞌẽẽ na Tupanaarü Oreü̃ cucuaꞌü̃caꞌ?
Nhaã popera noreatüü̃ rü cuü̃ narüngüꞌẽẽ ta na Tupanaarü Oreü̃ cucuaꞌü̃caꞌ. Nawa rü nangema namatügü i Tupanaarü Orearü iꞌĩgüü̃ rü nüü̃ niꞌu taꞌacütchiga yiꞌĩü̃ i wüitchigü i namatü i Tupanaarü Orearü iꞌĩü̃. Ngemaãcü ta niꞌĩ nanaüü̃ ga Ngetchutchu yeguma duẽꞌẽgüü̃ nanguꞌẽẽgu. Nawa naugütae i Luca 24:27, 45.
Tupanaarü deꞌagü i megüü̃ rü guü̃maü̃ narümeꞌmaẽ. Ngemaꞌẽtüwa tümaü̃e ya duẽꞌẽgü rü tama nüü̃ tacuaꞌgütchaü̃ i ngema deꞌagü. Taꞌũ ta ngemacaꞌ rümaãtchi. Tupanaü̃ cucuaꞌgu rica ta niꞌĩ cuma cunayauü̃ i maꞌü̃ i tauguma guꞌü̃. Nawa naugütae i Juã́ũ 17:3.
