Yehova tari muneene Biblya. Oowo ookhalano mitthenka sooreera sinahima weera nnokhalano ekumi yoohimala elapweene yeela. (Nsalmu 37:29) Biblya orinono ibuukhu 66 ikhaanene. Muluku ahaathanla alopwana 40 oororomeleya, weera emulepe Biblya. Mulopwana mmoha a yaawo, Mose yoowo alempe ibuukhu ithanu soopatxera otthuli wa iyaakha 3.500. Murummwa Yohani omulempe buukhu oomalihera, iyaakha 2.000 sa mutthuli. Alopwana awo, yasuwela hayi itthu soolepa? Muluku ahakhavihera ni munepaawe woottela weera ewere olepa miruku sawe. (2 Samuweli 23:2) Mitthenka siri mBiblyani ti sa Muluku, khahiyo saatthu. — Mmusome 2 Timotheyo 3:16; 2 Pedru 1:20, 21.

Nroromeleke weera Biblya ta Muluku, mwaha woowera owo onnahima moowiwanyeya itthu sinrowa weereya muhoolo, opwaha mwa yeeyo itthu onahimaawe sinnereya. Muluku meekhawe tanwera ohima itthu sinrowa weereya muhoolo, eyo ti etthu hiyo nihinwerahu opaka. (Yehoxuwa 23:14) — Mmusome Yesaya 42:9; 46:10.

Neereke Biblya onnavirikana ni abuukhu akina, weera onihereke wi ta Muluku? Aani, Biblya oovirikana ni abuukhu akina. Aakawiwa aBiblya antxipalexa ni moolumo anipwaha 450. Naari areene buukhu olempwale khalayi, nlelo owo ta ekhaikhai uulumaka sa siyeencia. Alipa oomulepa Biblya yaari 40, nave yaakhala ihuhu soovirikana ni mapuro oohiyana. * Naari vareene hiiho, itthu yaalepaya tisoowiiwanana. Nave tho Biblya onnaxuttiha nsivelo. Owo ori ntoko eruku emmulikanxera muneene Muluku. Aani owo ookhalano owera wootxentxa ikumi saatthu. Atthu antxipale ekhaviherinwe ni Biblya, awo anniroromela weera masu a Muluku. — Mmusome 1 Atesalonika 2:13.

Biblya onnuluma mitthenka sooreera Muluku oraaweno wa hiyo. Owo ontthuna weera, atthu ootheene ekhaleno ekumi yoohimala mparadiso. Biblya onnahima moota Adamu ni Heva yootxenlaaya ekumi yooreera mparadiso. Owo onnahima tho moota elapo enrowaaya okhala eparadiso muhoolo. — Mmusome Apokalise 21:4, 5.

Biblya onnahima itthu sootheene Muluku opankaawe, okhuma woopatxerani wa atthu ootheene. Emara nnamusomaahu Biblya, ninnona moota Muluku athokoronraawe atthu awe, nave ninaxuttera omutthu awe. Mene Biblya onimokhaviherani omusuwela Muluku. Nave weera mukhale nthamwene a Muluku, sookhala miruku ni malamulo empwanela otthara. — Mmusome Nsalmu 19:7, 11; Yakobe 2:23; 4:8.

Ebroxura ela enimokhaviherani omwiiwexexa Biblya, nave ennattaphulela mowiwanyeya soolepa sa Biblya. Sawasaawa Yesu moota aaxuttihawe atthu, owo avarela muteko soolepa ni annittaphulela. — Mmusome Luka 24:27, 45.

Mitthenka sa Muluku ti sooreera vantxipale. Yoothananiha eri yoowera, atthu akina khampwattha mitthenka iya. Muhittikele otthuli, mene, weera mukhaleno ekumi yoohimala, ontthuneya omusuwela Muluku. — Mmusome Yohani 17:3.