Alamb ya mala kunum kunum kolnga moramen pane, Baibel yu kawei nekem paim. (Song 37:29) Buk kerei kerei  66 porpor Baibel a meiyem. Ye 40 poro Got kin ka monjip ga,konganem ernge yuwom bonjip. Baibel buk ngimba 5-pla paiyem e, buk Stat pu Lo Mosis bom, kongar 3,500 wopum. Aposol Jon akling wei Got yuwom bol porninge, kongar 1,900 wopum. Baibel bonjip ga namal bunuman aiyem si bonjip? Got oli spirit ga bunuman ngongo olom yuwom bonjip. (2 Samuel 23:2) Yu porpor Baibel a bol kenjip meiyem e, Got bunuman pam mal bonjip, enjep bunuman aijep ma. Embe pile Baibel, Jova Olom yuwom.​—2 Timoti 3:16; 2 Pita 1:20, 21 gerdel.

Kenem kanmen e, Baibel Got kin wom, nalerim wal kawei akling mine wonda mal kun wei dom. Alamb ende embe enam kaple nanem. (Josua 23:14) Got omblom dongal pam ye, alamb kin akling nawal min wonda olom kane sekerem.​—Aisaia 42:9; 46:10 gerdel.

Buk ende Got kin sinjin e buk jelmal wei sinjin. Alamb yujep andret pulikes jeljel pam mal e, Baibel bilien pulikes wei ere omukto alamb yujep jeljel pam mal ngonjip. Baibel kombei kes bonjip buk ba yu tuwalto meim e, Sains, sukul kerma punjip ga ya mala na mine kupula wal konganim enem mal kanjip, Baibel yu bol wose ding pum. Wal ende, ye 40 kulu jeljel molo Baibel bonjip ba, yu bonjip wose ding pum. * Wal ende paim e, Got kanka mambnem seiyem pile, Baibel a yu ne kem meim e alla na paim, olom yuom dongal pa erkelnde, alamb kol wane molpa esim woka punum. Yu wei e er kelnde, alamb milien pulikes, Baibel e Got Yuwom panim.​—1 Tesolonaika 2:13 gerdel.

Baibel yu kawei nekem meiyem, ala yu mem kerma wei paim e, Got alamb kin akling, wal kawei enda mal dom. Baibel yu pende dom ne komna paradise sende alamb kawei moram ne erim ba, komna kamna alamb ersem alamb erkelnge paradise tai pum, ala nalmal paradise ersi yem kera mal dom.​—Revelesen 21:4, 5 gerdel.

Got Yuwom Baibel a yu kerma talende nekem meim, (1) yu lo, (2) kolta yu, (3) yu kindnem. Wal ende pra, komna Got alamb kin nalmal erim mal Baibel a bol kenjip meiyem. Yubol meim e kenem pakero kelnde, Got nal mambnem pam mal kenem kanmen. Embe pile Baibel nim pake tondo olom ye nalmal nim kanjel. Ala nim nalmal ere Got kin tapka tondol mal e dom.​—Song 19:7, 11; Jems 2:23; 4:8 gerdel.

Buklet mand e nim pakero kelnde Baibel yu pilsi, Jises Baibel yu konganem nalmal erim mal endel. Olom Baibel yu ende newo ende bol suse “yu mem kerma neori kem”.​—Luk 24:27, 45 gerdel.

Yu kawei Got kin wonom e, kawei wei pa wal pende ngonom. Ba alamb pende yu e pisam kes enem ala pende sikesim. Nim kes napisel, nalerim nim Got kin sape si kandum nindal mi bulto aimanj moral ne kui enen wal e sindel.​—Jon 17:3 gerdel.