LECCIÓN 3
¿Á didxlí pur Dios zed de didx zák ni ka laʼn Biblia?
1. ¿Tú bkuá xhtidx Dios?
De didx zák dek zuʼ dxi ibainnu lo Guixliú ne kɨt chuʼti dxi gatynu, laʼn xhtidx Dios kani (Salmo 37:29). Librɨ reʼ rapni 66 librɨn, Dios bleka kuarent de bniety nguiu ni bkuadiág xhtidxni par bkuadeb Biblia. Primer gaay librɨ reʼ Moisés bkuani aguk zik chon mil gaay gayuaaʼ iz, per lultɨm librɨ apóstol Juan bkuani aguk zik tuby mil gaa gayuaaʼ iz. Xhgab xhte Dios ka laʼn xhtidxni. Laani bein us espíritu santo xhtenni par gukbee de bniety nguiu reʼ xhi na par ikuadeb (2 Samuel 23:2). De bniety reʼ bkuadeb xhgab xhte Dios, kɨt xhgabti xhtendeb. Pur nii releʼ inin dek Jehová ná ni bkuá Biblia. Bily 2 Timoteo 3:16 ne 2 Pedro 1:20, 21.
2. ¿Xhi ní na par choldilaaznu dek ni rní xhtidx Dios ná didxlí?
Pur ni Biblia zed pur Dios. Ne nanpaknu dek zikni, pur ni rnini de ni kayák ne xhi zedial gak. De bniety guixliú kɨt zeleʼty guyndebni (Josué 23:14). Soltiz Dios ni ná todopoderoso releʼ ruynni. Bily Isaías 42:9 ne 46:10.
Bel tuby librɨ zed pur Dios, nani tuby librɨ ni sakduuxh. Xhtidx Dios ka zien lo de didx ne pur millonni rgazy. Mask auyak kuani, tuby lozy nani kun ni rní ciencia. Ne kuarent bniety nguiu ni bkuá xhtidx Dios tuby lozy xhgab bkuadeb laʼnni. * Zikza kad tuby de pagina rliuʼni galrkáz xhte Dios ne axht tiemp reʼ napni poder par ichagni galnabáin xhte de bniety. Pur de rson reʼ, millón de bniety rakbedeb dek Biblia napak xhtidx Dios. Bily 1 Tesalonicenses 2:13.
Bguie videu ¿Xhi ní na par gapnuʼ confiánz dek xhtidx Dios rní didxlí?
3. ¿Xhi de didx ka laʼn xhtidx Dios?
Xhtidx Dios rguixhleʼ de didx zák. Rnini dek xhgab xhte Dios ná kuez de bniety lo Guixliú nasáʼ. Zikza rguixleʼni dek chi bzuló galnabáin lo Guixliú primer bniety nguiu reʼ bnitba privilegio ni niapba galnabáin laʼn paraíso ne rnini xha ikubyni paraíso ki. Bily Apocalipsis (Revelación) 21:4, 5.
Xhtidx Dios zedne de leyes, principios ne de conséju. Zikza rnini xha ná Jehová kun de bniety guixliú, ne rliuʼni xha ná xhmodni. Pur nii, xhtidx Dios rakné dunún guynbeenu laani. Zikza rliuʼni dunún xha gaknu xhamigu Dios. Bily Salmo 19:7, 11; Santiago 2:23, ne 4:8.
4. ¿Xhi gakné dunún gakbee zaknu ni rní xhtidx Dios?
Par gakbee de bniety xhi zeló ni ka laʼn xhtidx Dios, Jesús bzet de versículos ne rguixhleʼni xhi zeloni. Zikza kuá follet reʼ par gakneni dunún te gakbee zaknu xhi rliuʼ xhtidx Dios. Bily Lucas 24:27, 45.
Nannu dek labiú ziulaazbiú gakbeerubiú de didx zák ni rap Dios par dunún. Per nuʼ de bniety kɨt riulaaztideb gakbeedeb, ne nuʼdeb axht rdxichdeb chi nuʼ tu rgüene laadeb xhtidx Dios. Per kɨt izantibiú tu suʼ ló biú par chizaa izedbiú. Xhtidx Dios rní, dek ni ruynbee laani zuʼ dxi kɨt gatydeb. Bily Juan 17:3.
^ párr. 3 Iguiebiú librɨ La Biblia... ¿la Palabra de Dios, o palabra del hombre?
