Lo Biblia rtzalaj wezuarha tzalasa lo Lichhileyoni, le naka to rson chhiágazi (Salmo 37:29). Lo Biblia yoó 66 librodoʼ ta bchhia kado 40 bene lilachhi gleaj Dios. Kanho Moisés bchhié 5 libros rzoló chizeaj 3,500 yíza, tzalaka libro yélalhe bchhia apóstol Juan chizeaj 1,900 yíza. Diarha tan rtzalaj lo Biblia zaa ki Dios. Leʼ bgónene chhin beʼgrasia kíe na bchhiake Biblia (2 Samuel 23:2). Leke bchhiake pensarhe ki Dios, klega pensarhe kieke. Lo Biblia rne: «Bene gneke ta gochhi Dios leke len beʼgrasia kíe» (2 Pedro 1:21). Tanka waka inerha Biblia zaa ki Jeobá. Blaba 2 Timoteo 3:16.

Byo video ¿Quién es el autor de la Biblia?

Tan zaa ki Dios. Yogoté tan rne lo Biblia gaka, yogoniate rhaka, tanka rxhenláchhito naka Xhtidza Dios, ta bi sekie bene gonhe (Josué 23:14). Toze Dios wezékiene iné diarha tan zi gaka. Lo Biblia rne: «Katí gzólote nedi chikalá gniá naʼka yiyochhi, len katinate chi gniá tan bine rhaka» (Isaías 46:10).

Chen to libro rnerha zaa ki Dios, a korhala kuezarha gaka ta zákagazi. Biblia chi gdísike milhe millón, len naʼn chi bchhiake non gayuane didza. Zákala bchhiake tinaate, ta zian tan chineze bene naʼn ki Lichhileyoni, chikalá gné ziatela lo Biblia. Len zákala kado 40 bene bchhiake toze ta rtzalaj. * Len diarha tan zaa luelhe rlué yelarheke ki Dios len wezékie yotzaʼ yikiajló ka bene. Tanka, millónkane bene kebi rzike «ka xhtidza bene, sino kanha nákaksi, ka xhtidza Dios». Blaba 1 Tesalonicenses 2:13.

Byo video ¿Por qué podemos confiar en que la Biblia dice la verdad?

Lo Biblia zua rson chhiágazi. Rtzalaj ta wen gon Jeobá ki ka bene lichhileyó. Rguixhajeʼ nonaka goka na birhe gzuake lo paraíso len nonaka yiyonké ta yobla. Lo Biblia rne Dios «yoxhié nisa ze loke, na yelagoti birhe bata gata, len yelarhonrbechhi ni yelarhebanhe ni yelarheguirlá. [...] Didza ní naka talí len waka kxhenláchhirha» (Revelación [Apocalipsis] 21:4, 5).

Lo Xhtidza Dios yoó ley len mandado ta rsnisie rhoʼ bita rhala gonrha na suarha yatzajyolaj. Lhézekan rguixhajeʼ ka benhe kieke, le rlué ka bene nake. Tanka Biblia rhakalén rhoʼ na gonbérhane len rsedie rhoʼ naʼka gákarha amigo kíe. Lo Biblia rzua rhoʼ seguro: «Le tzeaj gago len Dios, na leʼ kide gago ga zualhe» (Santiago 4:8). Blaba Salmo 19:7, 11 len Santiago 2:23.

Kuenda tzeajnielho chhiʼa Biblia, folleto ní rsedie ka bsedie Jesús. Leʼ bgaaleʼ to yetó texto len boseajniateʼ. Lo Biblia rne: «Na gzolawe bgale ta bchhiate Moisés len diarha ka Profetas, na boseajnié ta rhon toze len leʼ lo diarha tan bchhiake tinaate» (Lucas 24:27).

Nézeto wezajxhéngueslo snísielho rson chhiágazi napa Dios kierha. Pero bala bene bi rzuekene guiʼa nika rhájxhenkene len yebálake rdzaʼke katí rtzalajlenkarhane tan chhia ní. Bi gdelho látaj bene na gotiláchhike lí. Ka rne lo Xhtidza Dios, bene rsédike kíe wezuake tzalasa. Lo Biblia rne: «Kuenda gápake yelanabán tzalasa nakin tzeajkateze gonbeʼke Lí, toslo nákalo Dios li, len ki bene kselalo, Jesucristo» (Juan 17:3).