LESIONY 3
Diitz sacró, ¿nigolú sieetni de Dios la?
1. ¿Chú bisaʼ la Biblia?
Diitz sacró que buñ guibany tipzó ló Gudxlio sieetni ló la Biblia. (Salmo 37:29) La Biblia nap 66 libriyen. Dios biquiin más de 40 buñguieeu ni buny ni nábu par bicaʼ láani. Primer gáay libro ni sitnéni, Moisés bicaʼ láani né ma godudy 3,500 íz. Libro ni sieed ro radopy la Biblia toib xpiin Jesús ni góc laa Juan bicaʼ láani, né ma godudy 1,900 íz. ¿Chú xpensary bicaʼyibu? Dios goniné guirá buñguieeu reʼ né fuers ni raquiimbu par gonybu ni nábu par bicaʼyibu la Biblia. (2 Samuel 23:2) Layibu bicaʼyibu xpensary Dios diti xpensaryibu. Por ngú ranino que Jehová Bisaʼ la Biblia. Bíil 2 Timoteo 3:16; 2 Pedro 1:20, 21.
2. ¿Ximod labúu ganno pal la Biblia rasuidy xinésni?
Lóono nánno que la Biblia sieetni de Dios portín raniʼtzayni xí gac ló dzú ni sietra. Ni toib buñgudxlio labúu rony láani. (Josué 23:14) Nosi Dios ni nap Xiroʼgolu galnadip labúu raniʼ merpa xí gac par buñgudxlio ló dzú ni sietra. Bíil Isaías 42:9; 46:10.
Ni toib libro labúu rigaʼl la Biblia portín sieetni de Dios. La Biblia caani ló xidal diitz né xidalguixo biblias rareʼ guirá íz. Ná la Biblia ma xidzú de goló cuáni, raniʼtzayni de Gudxlio né de guibá modpa rasuidy buñnan láani. Né más de 40 buñguieeu ni bicaʼ la Biblia toibsi mod góc xpensaryibu. * Né guirá ni caa ló la Biblia raduidyni diitz balaati nadxi Dios lóono, né napni galnadip par labúu guitzáni mod nabany buñ par guibanyibu galán. Guirá ndeʼ rony que xidalguixo buñ raluladx que la Biblia nacní Xtiitz Dios. Bíil 1 Tesalonicenses 2:13.
3. ¿Xí láani raniʼ la Biblia?
Xtiitz Dios, la Biblia, raniʼ diitz sacró ni Dios gony par buñgudxlio. Láani rabexani órni pénsa goyoʼ buñ ló Gudxlio láaca ximod bisnityibu ni non nabanyibu ló toib Gudxlio móz, láaca rabyni lóono ximod Gudxlio guidxin gac toib lagary móz. Bíil Revelación 21:4, 5.
Xtiitz Dios nap xidal leyes, litz né láaca rabyni lóono xí ngú cós tzaay né cós mal. Láaca rabyni lóono ximod Jehová bidzakbu buñgudxlio, ndeʼ toib historia ni raiby lóono xí clas Dios nacbu. Scú láani, la Biblia labúu gacné looy guimbulo Dios. La Biblia rasien lóono ximod labúu gacno ximig Dios. Bíil Salmo 19:7, 11; Santiago 2:23; 4:8.
4. ¿Ximod labúu guienlo la Biblia?
Follet reʼ gacnéni looy guienlo ni ná la Biblia né labúu guisuidylo stipnés, mod bisuidy Jesús. Láabu biquiimbu textos né bisienbu ximod «rarexa xtiitz Dios.» Bíil Lucas 24:27, 45.
Goxési cós sacroyen noʼ xomod diitz sacró ni sieed de Dios. Ná scú nacní, tipnés buñ diti ragoʼyibu cuent láani, né noʼ stipnés buñ dada radzuitz órni racadiag diitz sacró reʼ. Diti guireʼganlo. Par labúu guibanylo tipzó goxtiguie ló Gudxlio nigolú raquiin guimbulo Dios. Bíil Juan 17:3.
^ Párrafo. 3 Bibiʼ libro ni laa, La Biblia... ¿la Palabra de Dios, o palabra del hombre?
