UYONO 7
Die Yẹn Uvie rẹ Ọghẹnẹ?
1. Die yẹn Uvie rẹ Ọghẹnẹ?
Diesorọ Jesu vwo fo ohwo rọ dia Ovie rẹ Uvie na?—MAK 1:40-42.
Uvie rẹ Ọghẹnẹ ọyẹn usuon rẹ Ọghẹnẹ rọhẹ odjuvwu. Ọ cha guọghọ isuon rẹ herọ asaọkiephana, Ọghẹnẹ me rha reyọ uvie na vwo ru ọhọre rọyen vwẹ odjuvwu vẹ otọrakpọ na. Iyẹnrẹn rẹ Uvie rẹ Ọghẹnẹ na ọyẹn omamọ rẹ iyẹnrẹn. Chekemerha, Uvie rẹ Ọghẹnẹ kọ cha kẹ ihworakpọ obo rẹ ayen guọnọre. Ọyẹn omamọ rẹ usuon, rọ cha nẹrhẹ ihworakpọ eje yerinkugbe.—Se Daniẹl 2:44; Matiu 6:9, 10; 24:14.
Kuvie kuvie yin vwo ovie. Jihova reyọ Ọmọ rọyen Jesu Kristi vwo mu Ovie rẹ Uvie Rọyen.—Se Ẹvwọphia 11:15.
Ni ividio na Die Yen Uvie rẹ Ọghẹnẹ?
2. Diesorọ Jesu vwo Fo Ohwo rọ dia Ovie rẹ Uvie na?
Jesu yin fo kẹ uvie na, fikiridie ohwo esiri o ruẹ, o ji ruẹ obo ri yovwinri ọkieje. (Matiu 11:28-30) Vwọba, o vwo ẹgba rọ vwọ vwẹ ukẹcha kẹ ihwo fikiridie o che sun akpọ na vwo nẹ odjuvwu rhe. Ravwọ rhọvwọn nẹ ushi nu, o de kpo odjuvwu re chidia obọrhe ri Jihova ra hẹrhẹ. (Hibru 10:12, 13) Ukuotọ rọyen, Ọghẹnẹ da vwẹ ẹgba ro vwo sun vwọ kẹ.—Se Daniẹl 7:13, 14.
3. Amono yin che nene Jesu sun?
Ẹko re seri nẹ “ihwo efuanfon” na yin che nene Jesu sun vwẹ odjuvwu (Daniẹl 7:27) Iyinkọn ri Jesu ri fuevun yẹn ihwo efuanfon rẹsosuọ ra ka jẹ reyọ. Jihova je sanẹ eshare vẹ eya ri fuevun rhi te nonẹna. Kerẹ Jesu, a rhọvwọn ayen nẹ ushi rhe vẹ oma rẹ ẹwẹn.—Se Jọn 14:1-3; 1 Kọrẹnt 15:42-44.
Mavọ yẹn ihwo ri che kpẹ odjuvwu na bun te? Jesu se ayen “imigegede.” (Luk 12:32) Ayen eje 144,000. Ayen che nene Jesu sun akpọ na.—Se Ẹvwọphia 14:1.
4. Die yen phiare ọke ri Jesu vwọ ton usuon phiyọ?
Uvie rẹ Ọghẹnẹ ton usuon phiyọ vwẹ 1914. * A ghwa vwọ reyọ Jesu vwo mu Ovie nu, ọ da djẹ Idẹbono vẹ emekashe rọyen rhiẹ otọrakpọ na. Fikirẹ ọnana, ivun de miovwin Eshu mamọ, ọtiọyena, kọ suo okpetu vwẹ akpọ na eje. (Ẹvwọphia 12:7-10, 12) Nẹ ọke yena rhe yẹn okpetu rẹ ihworakpọ vwọ ganphiyọ. Ifovwin, owẹnvwe, ega, vẹ etọ re bẹrẹ, e yen usun rẹ “oka” ravwọ riẹn nẹ Uvie rẹ Ọghẹnẹ che sun otorakpọ na kẹrẹkpẹ.—Se Luk 21:7, 10, 11, 31.
5. Die Yẹn Uvie rẹ Ọghẹnẹ ruẹ asaọkiephana?
Jihova womarẹ iruo rẹ aghwoghwo rẹ Uvie na, si otu gbidigbidi rẹ ihwo koko. Ihwo nana ri nẹ ẹgborho buebun rhe na, yerẹn kuẹgbe vwọrẹ ufuoma. Iduduru rẹ ihwo yin vwomakpotọ kẹ usuon ri Jesu asaọkiephana. Uvie rẹ Ọghẹnẹ che sivwin ayen ọke rọ da cha ghwọrọ eyeren rẹ umwemwu nana. Ihwo re guọnọ re avwerhe rẹ Uvie rẹ Ọghẹnẹ ke vwomakpotọ ki Jesu.—Se Ẹvwọphia 7:9, 14, 16, 17.
Womarẹ Uvie rẹ Ọghẹnẹ, ọhọre rẹ Ọghẹnẹ vwọkẹ ihworakpọ notọ votọ rhe che rugba vwẹ uvwre rẹ ikpe 1000 na. Otọrakpọ na eje che hirhe phiyẹ paradaisi. Ukuotọ rọyen, Jesu kọ cha vwẹ Usuon na kẹ Ọsẹ rọyen. (1 Kọrẹnt 15:24-26) O vwẹ ohwo ru wọ guọnọ vuẹ kpahen Uvie rẹ Ọghẹnẹ?—Se Une Rẹ Ejiro 37:10, 11, 29.
^ e?ko. 6 Wọ da guọnọ evuẹ efa riẹn kpahen obo rẹ aroẹmrẹ ri Baibol na ta kpahen ukpe ri 1914, ni aruọbe 215-218 rẹ ọbe na Die Yen Baibol na Se Yono Avwanre?
