Jehoba, moʼko towaʼpòren Opoto Papa, hero moʼko kurangon pane ròten ourananokon ekariʼnien, moʼko towaʼpòre otasakakon wèíshan. (1 Timothy 1:11) Moʼkoʼwaro maritimie weinio tapoiʼpio ma. Yopotononʼwa maritimie weinio ïpòrï paʼme maritimie èíʼmiasan towaʼpòre mandon, ètïʼkaʼpa kombaijo kïnapoponoʼpoaton, iʼmiakon eropa. Jesas Krais wekenanamon neiara maritimie wèíshe tïwèʼchoʼkon ponokon yopotonon wïkarï paʼme maritimie tïwèísheinie mandon.​—Èrupïako Luke 2:1, 4, 5.

Neiara Opoto Papa maritimie èíʼmiasan wèíshe na? Ororo tïpïtï maro moʼko kariʼnia emamïse ma. Jehoba inioʼwa tapokurume tïpïtï enese ma niamïʼcharïme, piïtï jòke piaʼme eropa. (Hebrews 13:4) Choʼpo atòʼkepa amuʼwa tïmïaritijï nondarïpïa ma. (Malachi 2:16) Tïmïaritijï akono maronotaʼmaʼpotopa neroʼkon te, oʼto watï iʼya niondarïpïa enean Jehoba moro paʼme tïwèíshe aʼta, ijombo te, oʼto watï amu ròten maro maritimie kïneiamba.​—Èrupïako Matthew 19:3-6, 9.

Jehobaʼwa okororo kariʼniakon maro wòrïiangonʼwa inipiokonomarïkon tïye ma. Amïʼcharï yako iʼyainie towaʼpòrepa kïnemainiatomba maritichonme. (Genesis 2:18) Tïpïtï maro tïʼmïakon yopotorïme, inio emamin me ma emangarïkon, emeparïkon eropa Opoto Papa poko. Tapokurume tïpïtï enese ma, moʼko nasen enese eropa ma oseke tïwòsenèrï uwapo. Mïinionanokon maro pïtïanokon otapokume tïwòseneseinie mandon, juʼpïa eropa takonokon poko tïwèísheinie mandon. Paʼpororo mïinionanokon maro pïtïanokon otanïʼmasan me yeijïkon ke, tïwòmepaseiniepa mandon oro ròten oʼto yaame takono tïpïoko yèíʼpio ïpòrïpïa poko, mororo kombaijo òʼwin amu towaʼpòrepa ïponen maritimie wèíʼpio ta.​—Èrupïako Ephesians 4:31, 32; 5:22-25, 33; 1 Peter 3:7.

Yaame owemamïrï yako omaritijï akono maro, okororo owèʼkuseinie mandon sheʼmero juʼpïa owòsenarïkon poko oseʼwa. (1 Corinthians 13:4, 5) Opoto Papa Karetarï, òmimiaʼmatokopa oseweinio, kaʼpapai tïweiye ma omaritijïkon ta opokonokon uwa yèʼchoʼmepa.​—Èrupïako 1 Corinthians 7:10-13.

Towaʼpòre owèísheinie Jehoba ma. Kurangon pane ròten oʼmanokon ïan oʼwainie towaʼpòre owèʼchoʼkonʼme koromonokonme. Oyumï maro osano euran etase oʼwainie ma moʼkaron kombaijo okoʼpoinie tïwònumingake mandon, okoʼpoinie eropa iʼyainie òtïkon tuputïʼmïa ma. (Colossians 3:20) Towaʼpòre oweijïkon epòrïse Jehoba oʼwainie ma tokataka, tïmuru ekataka eropa òtïkon poko oweijïkon weinio.​—Èrupïako Ecclesiastes 11:9–12:1; Matthew 19:13-15; 21:15, 16.

Tope owemaminiaseinie mandon oʼmakon ereparï epòrï poko, èʼtïkon, yòʼmïkon eropa. (1 Timothy 5:8) Towaʼpòre oʼmakon wèʼchoʼme te, emepaseinie mandon tapokurume Opoto Papa enèrï poko iʼyainie, yòmepatoʼkonʼme eropa yeinio. (Ephesians 6:4) Oyapokurume Opoto Papa weijï enepòrï oʼwainie koʼye neròten opaʼmeinie roropa tïwèísheinie kïnïpoatomba. Opoto Papa Euran weinio emeparïkon yako mepatomatomba juʼpïngon poko meʼme tïwèíshe yeijïkon poko.​—Èrupïako Deuteronomy 6:4-7; Proverbs 22:6.

Oʼmakon juʼpïa kïnètuwaroʼmaton tapòkumarïkon yako, towaʼmarïkon yako eropa. Toʼmaseiniepa eropa mandon, tïpïokïseinie eropa mandon tïsepa aʼta. Morokon paʼme emeparïkon ro kïneiomatomba yaame tïwèísheinie yeijïkon weinio, ewaʼpoʼpapai ïponangon. (Proverbs 22:15) Morote, woiniambano seʼpa roʼkon piokoinie weinio ma ipiokïrïkon, ijòseʼpa ereʼnoʼpòrïkon yako.​—Èrupïako Colossians 3:21.

Jehoba poko Wòrupïatonon apïimie karetakon meroposaton mïtuwaroʼmanamon maro iʼmiakonïmbo epatomatoʼkomba. Opoto Papa Karetarï tanokon weinio ènïkon karetakon meroposaton.​—Èrupïako Psalm 19:7, 11.