ƐLĀ Ō NWU ƆMƐ 9
Ɛgɛnyá nɛ apɔlɛ ku uwɔ géē lɛ eeye a?
1. Ɔdiya ɛɛ nɛ eeye gē yɔ ipu apɔlɛ ɔdaŋ ka ɔcɛnyilɔ mɛmla ɔcɛnya lɛ iyi uwa lɛ gbɔbu ɛɛ kéē lā tɔha a?
Ujehofa nɛ ɔkoolɔhi nyā ŋma ɛgiyi nu a. Ó wɛ “Ɔwɔico ku eeye,” ó klla dɔka ku ɛjɛɛji apɔlɛ kéē lɛ eeye duu. (1 Utímōti 1:11, NW ) Anu lɛ obatɔha ku ɔba mla ɔnyā kwaajɛ a. Ó cɛgbá ku ācɛ nōo gáā lɛ iyi uwa kéē gáā lɛ iye ku uwa ta taajɛ kéē lɛ ɔkpá hɛ lɛ uwa nōo géē mafu ka é wɛ ɔba mla ɔnyā, ohigbu ka ō ya ɛnyā géē ya ku eeye kóō yɔ ipu apɔlɛ ku uwa. Ó klla géē ya kéē piyatɔha bi ayipɛ ɔlɛ uwa jɛ lɔɔlɔhi. Lɛyikwu iye ō ta taajɛ, ɛjɛɛji Ācɛ O Yɛce Ukraist cika ō lɛ ojilima ce íne ku éwo néē yɔ a.—Jé Ulúku 2:1, 4, 5.
Ɛgɛnyá nɛ Ɔwɔico dɔka ku obatɔha ku ɔba mla ɔnyā kóō lɛ a? Ó dɔka kéē lā tɔha ogboogboo ɛcɛ. Ujehofa i dɔka ku ɔba kóō cikpo ɔnyā ɔhá nōó wɛ ɔnyā nu ŋ, ó kē dɔka ku ɔnyā kóō gē gbaja ŋ. (Ācɛ Uhíbru 13:4) Ɔba amāŋ ɔnyā ō ta wɛ ɔdā nōo gē wu Ujehofa ɔtu nɛhi. (Umálakāyi 2:16) Amáŋ, Ɔwɔico mafu ipu Ubáyíbu ka ɔdaŋ ku ɔnyā ɔcɛ lɛ aja gbo amāŋ nɛ ɔba duuma gáā cikpo ɔnyā ɔhá, ka ɔba amāŋ ɔnyā nɛ abɔ ku nu yɔ peee a lɔfu ta ɔmpa nu, cɛɛ ó kē lɔfu lɛ ɔcɛ ɔhá gla.—Jé Umátiyu 19:3-6, 9.
2. Ɛgɛnyá nɛ ɔba mla ɔnyā cika ō bēē ya mla iyi uwa a?
Ujehofa ya ɔcɛnyilɔ mɛmla ɔcɛnya kéē bēē ta iyi uwa abɔ ɔdaŋ ka é lɛ iyi uwa lɛ. (Ohútu 2:18) Ɔba cika ō bēē ya ɛgbá ku apɔlɛ á. Ó klla lɛ uklɔ ō nwu apɔlɛ ku nu lɛyikwu Ɔwɔico, ohigbu ka anu a wɛ otrɛyi ku apɔlɛ a. Ó cika ō lɛ aɔdā nōo géē lɔhi lɛ ɔnyā nu a ya gbɔbu ɛɛ kóō ya aku nu. Ɔba mla ɔnyā cika ō yihɔtu klla lɛ ojilima ce iyi uwa. Abɔ ɛjɛɛji ɔba mla ɔnyā i jila iyē ŋ ma, ō nwu ɛgɛ néē gē bēē je ya iyi uwa ɛhi a cɛgbá lɛ uwa nɛhi, ohigbu ka ó géē ta uwa abɔ kéē lɛ eeye ipu apɔlɛ ku uwa.—Jé Ācɛ Ɛ́fēsɔsi 4:31, 32; 5:22-25, 33; 1 Upíta 3:7.
3. A cika ō habɔ ɔba uwɔ amāŋ ɔnyā uwɔ ta ɔdaŋ ku aa lɛ eeye ipu obatɔha ku aa gɛ ŋ?
Ɔdaŋ ku awɔ mla ɔba uwɔ amāŋ ɔnyā uwɔ yɔ i lɛ unwalu, aa ɛplɛɛpa cika ō ceyitikwu ku aa yihɔtu ku iyi aa. (1 Ācɛ Ukɔ́rīnti 13:4, 5) Ubáyíbu i ka ka ɔnyā kóō nyɛɛ ŋma ɔlɛ ɔba nu amāŋ ku ɔba kóō ma ɔnyā nu ta ɔdaŋ ka é lɛ unwalu ɔtahɛ ku iyi uwa ŋ.—Jé 1 Ācɛ Ukɔ́rīnti 7:10-13.
4. Ayipɛ, ɔdi nɛ Ɔwɔico dɔka lɛyikwu aa a?
Ujehofa dɔka ku aa lɛ eeye. Ó gē tu aa ukɔ́ nōo lɔhi fiyɛ duu nōo géē ya ku aa jɔɔnyɛ eko nɛ aa yɔ i jɛ a. Ó dɔka ku aa jahɔ ta adā aa mɛmla ɛ́nɛ́ aa, o ya ɛɛ ku aa lɛ itene ŋma ijeeyi néē lɛ a.(Ācɛ Ukólōsi 3:20) Ujehofa klla dɔka ku aa yuklɔ lɛ anu mɛmla ɔyi nu. Aa kē jé ka anu ya alɔ a. Ɔdaŋ ku aa gē yuklɔ lɛ ɔ, aa géē lɛ eeye nɛhi.—Jé Ɔ̄cokóītá 11:9–12:1; Umátiyu 19:13-15; 21:15, 16.
5. Adā mla ɛ́nɛ́, ɔdi nɛ ayipɛ ɔlɛ aa cɛgbá o ya ɛɛ kéē lɛ eeye a?
Aa ceyitikwu lɔɔlɔhi o ya ɛɛ ku aa bēē je ɔdole lɛ ayipɛ ɔlɛ aa, aa bēē lá uwe ō wiiye lɛ uwa klla má ka é lɛ ɛga ō lā. (1 Utímōti 5:8) Amáŋ, ɔdaŋ ku aa dɔka ku ayipɛ ɔlɛ aa kéē lɛ eeye, aa cika ō nwu uwa kéē yihɔtu ku Ujehofa klla nwu ɛlā lɛyikwu ɔ. (Ācɛ Ɛ́fēsɔsi 6:4) Ɔdaŋ ku aa yihɔtu ku Ujehofa, ó géē ya ku ayipɛ ɔlɛ aa kéē yihɔtu ku nu duu. Ɔdaŋ ku aa gē bi Ubáyíbu le nwu ayipɛ ɔlɛ aa ɛlā, ó géē ta uwa abɔ kéē wɛ ācɛ ō ya uce olɔhi.—Jé Oblatūkíne 6:4-7; Aíita 22:6.
Ō cɛtra ayipɛ mɛmla ō ta uwa ɔtu kwu ɔtu lɔhi nɛhi, ohigbu ka ó géē ta uwa abɔ kéē ya ɔfu tōōtɔ̄ɔ̄. Amáŋ, ó cɛgbá ku aa bēē pi uwa ahɔ̄ klla bēē gɛ uwa duu. Ō nwu uwa ɛlā ɔwɛ ɛgɛnyā géē ta uwa abɔ kéē hii ya uce nōo géē cɛ lɛ uwa hijema ɛcɔbu ŋ. (Aíita 22:15) Amáŋ, aa hii bi icɔnu amāŋ ánya le gɛ uwa amāŋ pi uwa ahɔ̄ ŋ.—Jé Ācɛ Ukólōsi 3:21.
Ācɛ Ocijali Ku Ujehofa gē ya ɔkpá ɛyɛɛyɛyi nōo gē ta aadā, aɛ́nɛ́ mla ayipɛ abɔ. Aɛlā néē i ta ipu uwa a kē ŋma ipu Ubáyíbu.—Jé Aíjē kú Ɛ̄gbā 19:7, 11.
