Misah yilengel yaalaalukil kudy Yehowah, Mawej a musangal. I mukat bwa ney bisak byoos biikal ni musangal. (1 Timoteh 1:11) I yiy uhangil maluw. Maluw madyobw bamanyik kudy mbulmatady matwaatwaal musangal mu cisak, bwaal miiyiiy kukwanjok mwaan-mulum ni mwaan-mukaj bwa kukashish baan bilengel, ni kushikat talal. Bikaam ney mwiin Krist woos akooyel ku mikenj ya mbulmatady wa ha cyaab cidyey mushikacil yiloolomb baat bwa kufundish maluw ku mikand.​—Bal Luuk 2:1, 4, 5.

Mushind kaay udyaakal Mawej utal maluw? I mukat bwa ney mwaan-mulum ni mwaan-mukaj bady mu maluw bashikat buyiil. Yehowah i mukat bwa ney biin maluw bashaal teng ni lulamat. (Ebreh 13:4) Yehowah i mukin kuzuh kwa maluw. (Malakih 2:16) Kady udyaakal wiitabij bwa mwiin Krist kuzuh maluw ni kutweel mu makwaabw, teng mwiin maluw nend yiiy mwend masandy.​—Bal Matewus 19:3-6, 9.

Yehowah uhangil mwaan-mulum ni mwaan-mukaj bwa ney biikal bakwanjanganok mu maluw. (Bwanjil 2:18) Mwaan-mulum i yiy fumw a cisak. Naak, i yiy udy ni mudimw wa kukaamin biin mu cisak cindiy biit bidyobw naaby bwaal, ni kwiibalongweesh myand ya Mawej. Bikaam ney ibudishomw myand yikwaabw bwa kuleej ney i mukat mukaj indiy. Bikaakaam ney Mwaan-mulum ni mwaan-mukaj biikal bakatangan ni baneemekangan. Teng mudy baan-balum ni baan-bakaj boos biikal ba mulong a bibiih, babw bamanyik mwa kufwiilangan lus, biiyiiy kwiikal ni musangal mu maluw.​—Bal Efez 4:31, 32; 5:22-25, 33; 1 Pyeel 3:7.

Nun ni bilumbw mu maluw, bikaam nwiitacish bwa kulongelangan myand ni lukat. (1 Korent 13:4, 5) Bibl kiishoh bend  ubel biin maluw bwa ney hadyok bilumbw mu maluw biikabulul.​—Bal 1 Korent 7:10-13.

Yehowah ukaakaam ney nwiikal ni musangal. I mwiinwaakish mibel ilengel bwa ney nuhet mushind a kwiikal ni musangal ku buusand bwiinun. I mukat bwa balel biinun binukwanjok ni meej ni kumanyik kudyobw naakw. (Kolos 3:20) Yehowah i mukat cikwaabw ney nuhet musangal ha kumukadil yiiy hang inun mudimw ni mwaan indiy Yeez.​—Bal Muleej 11:9–12:1; Matewus 19:13-15; 21:15-16.

Bikaam ney balel bakal mudimw mukasakan bwa kukaaminobw baan baababw byaakudy, bizang ni cyaab cya kulaal. (1 Timoteh 5:8) Kady bwa baan biinun kuhetobw musangal, bikaakaam ney nwiibalongweesh mwa kukatobw Mawej , ni kwiikal kulongw myand yindiy. (Efeez 6:4) Nun bakat Mawej, nudy mwa kufikij baan biinun ku kumukatobw byaabw. Nun nubel baan biinun ni mibel yaalaalukil mu Bibl, baan biinun bady mwa kuhet meej malengel.​—Bal May Mumbulul 6:4-7; Tusumw 22:6.

Wuw ukashishok baan bibuw ku micim ni wiibafwiijok, wiiyiiy kwiibakwanjok bikasakan. Bikaam cikwaabw kwiibakish mibel ni manyook. Wuw ulong nook, wiiyiiy kwiibalamun ku myand yidy mwa kwiiboonyen musangal. (Tusumw 22:15) Kady, kabiish bikaam kwiibanyook ni cikis eeny cizuj.​—Bal Kolos 3:21.

Batemw ba Yehowah badyaakal bahatul mikand yivul ya kukwanj naay balel ni baan baababw. Myand yidy mund mwa mikand eey, yaalaalukil teng mu Bibl.​—Bal Musambw 19:7, 11.