BUŊGƐI 9
Vɛɛ Yuŋgu Numndo Looku Yɛ Wa a Nyaale?
1. Vɛɛ nɔ soliaa yauwo huŋ yɛ a nyaaloo o yuŋgoo niŋ?
O Chɛhowa lo yooŋgu kɛndɔɔ chɛŋ ni. Chɛhowa yɛ, Mɛlɛka nyaaloo o cho ni, nduyɛ o yeema mi wanaa cho o yuŋgoo niŋnda wa a nyaale. (Timoti Tasoo 1:11, NW) O ndu lo nɔɔ chɛŋ ni. Nɔ soliaa yauwo naŋ bɔɔ. Nɔ soliaa yauwo huŋ a nyaaloo o yuŋgoo niŋ. Nɔ soliaa yauwo tosa vɛlɛ mi kaalaa a kɔl kɛndɔɔ wa o yuŋgoo niŋ. Kilisiɔŋaa tonyaa nɔ ma kɔ soli yauwo o masaleŋ le nɔ ndaa.—Nuawɔ Luku 2:1, 4, 5.
Le vɛɛ kpɛ Mɛlɛka Yeema yɛ mi pɔnɔɔ a lanɔɔ wa o nɔɔ niŋ? Mɛlɛka yeema mi pɔnɔɔ a lanɔɔ wa o nɔɔ niŋ lefafɛɛŋ. Chɛhowa yeema mi pɔnɔɔ a lanɔɔ kɔ suunda nda wana nda cho o nɔ niŋ te wo le. (Hibuluiya 13:4) Chɛhowa tul nɔ kɛyaa leyɛ. (Kɔliŋtiaŋ Tasoo 7:10, 11) Kɛ te o yɔŋ pɛ mi waŋndo opilɔɔ kɔ suunda a wana cheleŋ, Chɛhowa chɛl nɔ kɛyaa o hei choo.—Nuawɔ Maatiu 19:3-6, 9.
2. Vɛɛ pɔnɔɔ a lanɔɔ nɔ yɛ ma biyaŋ o nɔɔ niŋ?
Chɛhowa toosiaa wana pɔnɔɔ a wana lanɔɔ le ma maaliaŋ o nɔ ndaa niŋ. (Chɛnɛsee 2:18) Poo cho bolle yuŋgoo ni. Maa bolle yuŋgu, wana pɔnɔɔ nɔ ni mbo nuuviaa nyɛdiaa le yuŋgu ndɔɔ. Ndu ko nɔ ni mbo pɛɛku yuŋgu ndɔɔ a Mɛlɛka okɔɔ. O nɔ mbo soliŋ ndupila sala le laa ndɔ kaalaa. Pɔnɔɔ a lanɔɔ nɔ ma kaaliaŋ vellaa velle. A nɔ ma keŋnaŋ bɛɛlaŋ. Wanaa lahakiaa naŋ cho ni, o teleŋndaŋ lapum niŋ, mi waŋndo opilɔɔ benduŋ a chaaŋ ndɔ. Malnaŋndo lahaki nɔla mbo hiŋ a nyaaloo o yuŋgoo niŋ.—Nuawɔ Ɛfisiaŋnda 4:31, 32; 5:22-25, 33; Pitɛ Tasoo 3:7.
3. O bɛnda pa ma kɛɛ wana nya cho o nɔɔ niŋndo le mɛɛ ŋ tambu kɔllɛ?
Te bahawɛiyo luɛi pɛ pɔnɔɔ a lanɔɔ tɛɛŋ, nda ŋiɔɔŋ kpede nɔ ma soli bahawɛi koŋ o nɛi kaalaa niŋ. (Kɔliŋtiaŋ Tasoo 13:4, 5) Baabuiyo dimi naa maa piɔuwaŋndo le soli bahawɛiyo o nɔɔ niŋ te.—Nuawɔ Kɔliŋtiaŋ Tasoo 7:10-13.
4. Nya chuauwa, yɛɛ Mɛlɛka yeema yɛ mi la tosal wanaa velu nya wa?
Chɛhowa yeema le mi chuaambuaa wa a nyaale. O ke nda sila kɛndɔɔ mɛɛ nda nɔ ma tuei yoomoo yeela yɛ. Chɛhowa yeema nya mi la sɔla tɔnɔɔ o sila wanaa velu nya wa cho nya kioo wo. (Kolosiaŋnda 3:20) Chɛhowa yeema mi la sina vɛlɛ maa baalaa tosaa le ndu a Po ndɔɔ chuu nya nyaaloo.—Nuawɔ Ikilisiaatii 11:9–12:1; Maatiu 19:13-15; 21:15, 16.
5. Nya kalaŋ chuauwa, yɛɛ chuauwaa nyaa yeema yɛ le ma wa a nyaale?
Kalaŋ chuauwa nɔ ma ke chuauwaa ndaa nyɛdiaa, naa lɔlaa a nyɛla chuɛɛnaŋndaŋ. (Timoti Tasoo 5:8) Kɛ le mi chuauwaa nyaa wa a nyaale, mɛɛ mi la pɛɛku nda a Mɛlɛka okɔɔ nduyɛ ma nɔ kaalaa le ndu. (Ɛfisiaŋnda 6:4) Te kalaŋ chuauwa nɔ pɛ kaalaa le Mɛlɛka, taamasi nda koŋ nyindu chuauwaa ndaa le mi nda bɛɛ kaala Mɛlɛka. Te o yɔŋ pɛ ma sila nda o Diom Mɛlɛkaa niŋ, o nɔla mbo kuɛ a nda o nɛi sakpoo choo.—Nuawɔ Ditɔnɔmii 6:4-7; Timoti Diiŋ Ndɔɔ 3:15.
Kalaŋ chuauwa nɔ ma dɛɛniaa chuauwaa ndaa kɔltaŋ. La nɔ vɛlɛ mi la wa nda chandɔɔlaŋ. Hei tosa nda ma wa a nyaale. Te o yɔŋ pɛ ma benduŋ, la nɔ mi la sila nda o nɛi sakpoo choo. Sila waa naa kɛɛlu nda balaŋ lueiyo o kaa wɔɔŋ chuu nda kɔl tambɛiyo siɔdii wo niŋ. (Pulɔwaa 22:15) Kɛ te la wa nda pɛ silaa, la nɔ mi la bii nda biyɔɔ wɔɔŋ te.—Nuawɔ Kolosiaŋnda 3:21.
Seiyaa Chɛhowaa nɔ yaulaŋ tau la mala kalaŋ chuauwa vɛlɛ a chuauwaa ndaa wa. Baabuiyo cho puundule yaulaŋ ndaŋ ni.—Nuawɔ Sam 19:7, 11.
Naapum a Yeema Dɔɔ Vɛlɛ
YUŊGU NUMNDO NƆLA MBO WA A NYAALE
Tiindaŋ Mɛlɛka le Nyaaloo Sɔlaa o Nɔɔ Niŋ
Nyunala tɛtɛlɛlaŋ la tiɔɔŋ soliŋndo kpeku mala num ma hiou lachi o nɔ numndo niŋ.
YUŊGU NUMNDO NƆLA MBO WA A NYAALE
Mɛɛ Nya Soli Bahawɛilaŋ Yɛ
Suɛi nyɛkɛndɛi chɔm teŋgeŋndo wanaa cho o nɔɔ niŋ mi nɔ ndaa wa o kala nduyɛ ma wa a nyaale wa tɛɛŋ a wanaa cho o nɔɔ niŋ kɛ nɔ ndaa cho o kala mbo wa a nyaale le.
