KJOAʼMIYA 9
Jósʼiaan nga nda kuiyoaa ya yaniʼya
1. Ánni nga nʼio chjísínile nga kuixaan tsʼe chjotaxá.
Je énnda chjotse yaa tínroani tʼatsʼe Jeobá, je Niná xi tsjoa tjínle kʼoa xi mele nga nda kuiyoaa ya yaniʼyaná (1 Timoteo 1:11, TNM). Kʼoa jé tsakʼéjnabasen je kjoabixan. Kʼianga bixan tsʼe chjotaxá je xíngiaa tse kjoanda sokóle. Je xi xijchá ma kʼoa kao ʼndíxti ngisa nda batio kʼoa ngisa sʼe xi kjoatsjoacha ʼmi ya yaniʼya. Je choʼndale Niná tjínnele sitjoson je kjoatéxoma xi tjín ya naxinandále nga katasʼetʼaxo̱n kjoabixanle ngixko̱n chjotaxá. Tʼexkiai Lucas 2:1, 4, 5.
Je Niná kui xi mele nga tondiaa koatiokao xínkjín xi jekabixan. Je Jeobá alikui mele nga xínkjín kʼoanachale xi jekabixan (Hebreos 13:4). Je Niná nʼio chʼao be nga kʼoasʼin tsjion xínkjín chjota (Malaquías 2:16). Kʼoa tojéní je xíngiaa xi kasíchajngi je chjoónle kʼoa tsa xʼinle xi tiʼndele ngixko̱n Niná nga koasenjnda xo̱n kjoabixanle kʼoa xi koa̱n kuixan ijngokʼani. Tʼexkiai Mateo 19:3-6, 9.
2. Jósʼin tjínnele koatiokao xínkjín xi jechixan.
Je Jeobá kui xá jngo chjoón jngo xʼin kisindani nga kuinyakaongañá xínkjín nga jekabixan (Génesis 2:18). Jé xʼin kjinele nga koa̱njngíʼa je chjoónle kao ʼndíxtile kʼoa nga koakoyale xi tʼatsʼe Niná, nga̱ jé xi ngʼajko̱ tíjna ya yaniʼya. Je xʼin xi tsjoake chjoónle alikui to yaole fini jme xi sʼín, bʼénele yaole nga kui kʼoasʼín xi sasénle chjoónle nga tonga tje̱nkjoanni ndiaale. Je xi jechixan tjínnele skoe̱xkón xínkjín kʼoa tsjoake koa̱n xínkjín. Kʼoa mani nga chjotajée nga jao, tjínnele sichatʼangañále xínkjín ánni nga nda koatiosíni. Tʼexkiai Efesios 4:31, 32; 5:22-25, 33, kao 1 Pedro 3:7.
3. A koaan tsjión xínkjín xi jechixan kʼiatsa tsín nda tjíokao xínkjín.
Kʼiatsa kjoa tjínle je xíngiaa xi jechixan machjénní nga koakole kjoatsjoacha xínkjín josʼin kʼoendajin kjoale (1 Corintios 13:4, 5). Je Énle Niná alikui kʼoatso nga katabinyaxinle xínkjín xi jechixan kʼianga kjoa sʼe sakʼoale. Tʼexkiai 1 Corintios 7:10-13.
4. Jósʼin mele Niná nga koatio je xti.
Je Jeobá mele nga tsjoa katasatíole je xti. Kʼoa tsoyale jmé xi sʼin kʼianga ñaki nda koatio. Kui xi mele nga katasíchjén kjoafaʼaitsjen xi tsjoále xijchále (Colosenses 3:20). Je Jeobá kʼoati mele nga je kʼoa kao Jesucristo katasíxále ʼndíxti ánni nga ñaki tsjoa sa̱tíosínile. Tʼexkiai Eclesiastés 11:9–12:1; Mateo 19:13-15, kao 21:15, 16.
5. Jméni xi koa̱n sʼin je xi xijchá ma nga tsjoa sa̱tíole je ʼndíxtile.
Je xi xijchá ma tjínnele tsjoále je ʼndíxtile jmeni xi machjénle, jolani tsa tsojmi xi ski̱ne, niʼya jña koatio kʼoa kao najño xi kʼoa̱kjá (1 Timoteo 5:8). Tonga ali tsa tokuijin jebi xi machjénle je ʼndíxti. Kʼoati tjínnele kuitsoyale josʼin skénngile Niná kʼoa nga tsjoake katama (Efesios 6:4). Kʼianga je xijchá xi títjon tsjoake ma Niná nʼio binyakao je ʼndíxtile. Kʼoa tsa ya Énle Niná kʼoangini josʼin kjoenle ndiaa tsʼeni kjoanda je ʼndíxtile nga koa̱nskanni. Tʼexkiai Deuteronomio 6:4-7 kao Proverbios 22:6.
Je ʼndíxti machjénle nga kʼoainganʼiolee kʼoa nga “nda kanʼiai” kʼuínlee jñani nda kasʼín. Tonga sakʼoa kʼoati machjénle nga jtíkjáyale jñani tsín nda tjíosʼín ánni nga tsínkui kʼoasʼinsíni xi kjoaba sikatíojin nga koa̱nskanni (Proverbios 22:15). Tonga alikui koa̱n nga toxkia kʼuínlee kʼoa nga toxkia si̱koaa nga kuichákjáyalee. Tʼexkiai Colosenses 3:21.
Je testigole Jeobá jekjoan nkjín libro bʼasje xi binyakao je xi xijchá ma kʼoa kao je ʼndíxti. Ngayeje libro jebi yaa Biblia yʼangini jme xi tsoya. Tʼexkiai Salmo 19:7, 11.
Tsa kʼoati meli jchai xi tʼatsʼe jebi
KOAAN NDASʼIN KUIYO YA YANIʼYALI
Je Niná tjasjao kʼianga ndasʼin kuiyokao xíngio
Jao koya xi chjónangilao yaono nga ngisa ndasʼin kuiyokao xíngio.
KOAAN NDASʼIN KUIYO YA YANIʼYALI
Jósʼin koa̱n kʼoéndajion kjoa xi sʼeno
Josʼin kʼoéndajion kjoa xi sʼeno yaa kjuinroani tsa ndasʼin kuiyo, nga taja sʼe̱jna kjoabixanno, kʼoa tsa tsín ndasʼin kuiyo.
