Minsamu mi mboti mibedi kudi Yehova, Nzambi wu zikhini, nio tidi ti makanda maba makiese. (1 Timoteo 1:11) Nandi wutonisa dikuela. Didi mfunu dikuela disonama mu buku Leta mosi dikuela diba dikiese, diambu di bana bayunduka va kimosi mu kubatanina. Baklisto bafueti zitisa minsiku mi buala mu mo matedi sonikisa dikuela mu buku Leta.​—Tanga Luka 2:1, 4, 5.

Bue Nzambi keta muena dikuela? Niandi tidi ti dikuela diba lubundanu lu bakala ayi nketo mu thangu yikayimani. Yehova tidi ti bakala kaba wukuikama kudi nketo’andi ayi nketo kaba wukuikama kudi bakala diandi. (Ebeleo 13:4) Katianga ko bavonda dikuela. (Malaki 2:16) Vayi weta vana baklisto nsua yi vonda dikuela ayi kuela diaka wunkaka ti nketo voti bakala vengi kiphinga.​—Tanga Matayi 19:3-6, 9.

Yehova wuvanga bakala ayi nketo muingi basalasananga mu dikuela. (Thonono 2:18) Bobo bakala kadi mfumu dikanda, niandi beki kiyeku kidukisa zitsatu zi nitu zi basi dikanda diandi ayi kubalonganga mambu ma Nzambi. Kafueti zola nketo andi ayi kukiyimina mambu mankaka mu diambu di mambote ma nketo andi. Bakala ayi nketo bafueti zolasananga ayi vanasananga luzitu. Bobo bakala ayi nketo bakondolo batu balunga, kukilemvukilanga kulenda kubasadisa mosi bakala mu dikanda dikiese.​—Tanga Efeso 4:31, 32; 5:22-25, 33; 1 Petelo 3:7.

Ti mathata lubeki mu dikuela dienu, beno babuadi lulenda tula ngolo mosi lu viokisila mambu mu luzolo. (1 Kolinto 13:4, 5) Phova Nzambi yikadi vana nsua yivambana muingi mumanisa matata ma dikuela.​—Tanga 1 Kolinto 7:10-13.

Yehova kazodidi lukala mu kiese. Nandi weta luvana malongi makulusadisa lukala mu kiese mu buntuenia buenu. Weta tia lubaka mamboti ayi nduenga ayi mambu mo bambuta beno bamona. (Kolosayi 3:20) Yehova zodidi diaka lumona kiese lusadila Mvangi’eno ayi Muan’andi.​—Tanga Mpovi 11:9–12:1; Matayi 19:13-15; 21:15, 16.

Lufueti tula ngolo mu kubadikila, kubavuatisa, ayi kubavana va leka. (1 Timoteo 5:8) Vayi mosi bana beno baba kiese, lufueti kubalonga bazola Nzambi ayi balonguka mambu mandi. (Efeso 6:4) Thangu lukubavana fuani ki zola Nzambi, yilenda simba mintima miawu. Ti lunsadila Bibila mu kubalonga, lulenda bongisa mayindu mawu.​—Tanga 5 Mose 6:4-7; Zingana 22:6.

Bana beta yangalala ti lukuba kindisa ayi lukuba yayisa. Lufueti diaka kubavananga malongi ayi kubasemba. Phila beni yoyi, yilenda kubatanina mu bikadulu biobio bieta kubabotula kiese. (Zingana 22:15) Vayi thangu wukubasemba, kadi ba lukasu ayi ntima ngolo.​—Tanga Kolosayi 3:21.

Zimbangi zi Yehova beta totula minkanda miphila mu phila minsadisa bambuta ayi bana. Mambu madi mu minkanda beni mu Bibila meta ba.​—Tanga Nkunga 19:7, 11.