PELAJARAN 10
Lela Teihe, Ama Piy paneni Hotikeli diy?
1. Na, lela lanuku ba Allah wotikeli?
”Nabi-nabi ba wal hiyeng rofi na, healeling te.”—MATIUS 7:15.
Ama ba Allah mihiyena, Yesus dewohadasakolah lela hiyeng rofi la nuku hedi opi, agama hiyeng rofi. Hedosama, lela nuku ya birang iyeri wotikeli. Yesus dewofang, lela hei ’la ama kabei he haluol’. (Matius 7:14) Holuk hiyeng rofi ba, Allah hamau buka hei, he Allah domaha. Lela hiyeng rofi ba, Allah hotikeli hehui hefatil wei he haluol.—Mihalal Yohanes 4:23, 24; 14:6; Efesus 4:4, 5.
Video Apakah Semua Bentuk Ibadah Diterima Allah? woreya
2. Ama Kristen ba wal hiyeng rofi na, Yesus delateiur wofang?
”Defal lea mia dewofang de Allah hiyeng haba, depak depaneng wal na.”—TITUS 1:16.
Yesus dong wofani ba, nabi ba wal hiyeng rofi na de sidang Kristen hado beka diy. Heuytaha, pi hehalal agama hiyeng rofi wuda. Gereja faring dewofang de Kristen, haba nala ba ama wofang rofi rena? E ya tei he mihiyeng? Piwotanut, pimpaneng, ama afena de hehalal, pi ama Kristen hiyeng rofi.—Mihalal Matius 7:13-23.
3. Ama ba Ibadat hiyeng rofi homi mia, e ya tei he mihiyeng?
Nal hamo yeting e hehalal:
-
Ama ba, Ibadat hiyeng rofi homi mia Allah hamau buka ba, Surah Rieling deheluk. De birang demi Surah Rieling homi do iy, hare agama hiyeng rofi wal agama-agama afena ba, amakang he tanut wuda na. (Matius 15:7-9) Nala he Surah Rieling dewohadasakolah debirang demi do iy.—Mihalal Yohanes 17:17; 2 Timotius 3:16, 17.
-
Ama ba ibadat hiyeng rofi homi mia, Allah hana ba Yehuwa deholuk. Nabi Musa ya Daud Allah hana de hiyeng, dewai puna nahani. (Keluaran 3:15; Mazmur 8:1) Yesus bay Allah hana de heluk, dewai puna ama afena wohadasakolah. De ama homong Allah hiyeng ya, ama hadasakolah Allah hana rieling wo doa te. (Matius 6:9) E teihe mia, mahe Allah hana wai afena wohokafang?—Mihalal Yohanes 17:26; Roma 10:13, 14.
-
Yesus hehui hefatil ba hiyeng rofi, de Maring Kerajaan Allah wobesar. Allah de Yesus habot, Maring kang ba Kerajaan hei wobesar. Kerajaan ba, Allah hei donakala amakang faring deworumai. Hedi Yesus dewobesar ya womoni. (Lukas 4:43; 8:1; 23:42, 43) Yesus de wofang hehui hefatil bay, maring kang dewobesar. Wala de opa siye ba, maring kang wobesar, agama nala he de homi mia?—Mihalal Matius 24:14.
-
Yesus hehui hefatil wei, dewal ruli bekatafiela hei hohau na. Deiwei e hiyeng kang, dewal deimiy politik ya, sosial hohau na. (Yohanes 17:16; 18:36) Wai afena, amakang ruli taha mia bekatafiela mi paneng, dewal hei hohalal na.—Mihalal Yakobus 4:4.
-
Yesus hehui hefatil wei, kang dewodiyeng diy. Allah hamau buka hehui hefatil dewosakolah woya tei-tei mia bay, ama mideluk. Agama ba wal hiyeng rofi na, de yenang he uy harena minatea. Haba, Ibadat hiyeng rofi dewal heiwei paneng na. (Mikha 4:1-3) Haba, Yesus hehui hefatil wei, nala he hopa ya he leng de puna mi de mokeni miharumai diy.—Mihalal Yohanes 13:34, 35; 1 Yohanes 4:20.
4. Agama hiyeng rofi, e hiyeng kang rena?
E wotanut agama tei he, nala he dewosakolah heiyeri Surah Rieling, Allah hana heluk ya, maring kang ba Kerajaan Allah hei he donakala amakang heworumai? Kelompok tei he dekang wotiyeng diy, ya dewal yenang he uy harena minatea?—Mihalal 1 Yohanes 3:10-12.
