NÍ KASEMI 10
Mɛni Blɔ Nɔ O Maa Gu Kɛ Le Anɔkuale Jami Mi Tso?
1. Anɛ anɔkuale jami kake pɛ nɛ ngɛ lo?
“Nyɛɛ hyɛ saminya ngɛ lakpa gbali a he.”—MATEO 7:15.
Yesu tsɔɔ e kaseli ɔmɛ jami kake pɛ, nɛ lɔ ɔ ji anɔkuale jami. E ngɛ kaa blɔ nɛ kɛ nɔ yaa neneene wami mi. Yesu de ke: “Nihi bɔɔ pɛ lɛ naa” jamɛ a blɔ ɔ. (Mateo 7:14) Jami nɛ a kɛ da Mawu Munyu nɛ ji Baiblo ɔ pɛ nɔ ji nɔ́ nɛ Mawu kplɛɛɔ nɔ. Anɔkuale jali tsuo hɛɛ hemi kɛ yemi kake.—Kane Yohane 4:23, 24; 14:6; Efeso Bi 4:4, 5.
Hyɛ video nɛ ji Anɛ Mawu Kplɛɛ Jamihi Tsuo A Nɔ Lo?
2. Mɛni Yesu de ngɛ lakpa Kristofohi a he?
“A deɔ ke a le Mawu, se a ní peepee tsɔɔ we jã.”—TITO 1:16.
Yesu de kaa lakpa gbali ma puɛ Kristofohi a jami ɔ. Ngɛ nimli a hɛ mi ɔ, a peeɔ a ní kaa anɔkuale jali. A sɔlemi bi ɔmɛ deɔ ke Kristofohi ji mɛ. Se o ma nyɛ maa na nimli tutuutu nɛ a ji. Ngɛ mɛni blɔ nɔ? Anɔkuale jami pɛ nɛ haa nɛ a naa anɔkuale Kristofohi nɛ a jeɔ su kpakpahi kpo nɛ́ a peeɔ ní kpakpahi nɛ nihi naa.—Kane Mateo 7:13-23.
3. Mɛni blɔ nɔ o maa gu kɛ le anɔkuale jali a mi tso?
Mo susu kadimi níhi enuɔ nɛ a kɛ leɔ a mi tso ɔ he nɛ o hyɛ:
-
Anɔkuale jali buɔ Baiblo ɔ kaa e ji Mawu Munyu. A bɔɔ mɔde kaa a kɛ sisi tomi mlaahi nɛ ngɛ mi ɔ ma tsu ní. Enɛ ɔ he ɔ, anɔkuale jami je ekpa ngɛ jami nɛ a kɛ da adesahi a susumihi a nɔ ɔ he. (Mateo 15:7-9) Anɔkuale jali tsuɔ níhi nɛ a deɔ ɔ nya ní.—Kane Yohane 17:17; 2 Timoteo 3:16, 17.
-
Yesu anɔkuale se nyɛɛli woɔ Mawu biɛ nɛ ji Yehowa a hɛ mi nyami. Yesu ha nɛ nihi le Mawu biɛ ɔ nɛ e kɛ tsɔɔ kaa e woɔ Mawu biɛ ɔ hɛ mi nyami. E ye bua nihi nɛ a le Mawu, nɛ e tsɔɔ mɛ nɛ a sɔle kaa Mawu biɛ ɔ he nɛ tsɔ. (Mateo 6:9) Mɛni jami lɛ haa nɛ nihi leɔ Mawu biɛ ɔ ngɛ he nɛ o ngɛ ɔ?—Kane Yohane 17:26; Roma Bi 10:13, 14.
-
Anɔkuale Kristofohi fiɛɛɔ Mawu Matsɛ Yemi ɔ kɛ tsɔɔ nihi. Mawu tsɔ Yesu nɛ e ba fiɛɛ Matsɛ Yemi ɔ he sane kpakpa a. Mawu Matsɛ Yemi ɔ pɛ ji adesahi a hɛ nɔ kami. Yesu tu he munyu hluu kɛ ya si benɛ e gbo. (Luka 4:43; 8:1; 23:42, 43) E de ke e se nyɛɛli ɔmɛ maa fiɛɛ Mawu Matsɛ Yemi ɔ kɛ tsɔɔ nihi. Ke nɔ ko ba nɛ e kɛ mo ba sɛɛ Mawu Matsɛ Yemi ɔ he ní ɔ, ke o hyɛ ɔ, mɛni jami mi e ngɛ?—Kane Mateo 24:14.
-
Pi je yaya nɛ ɔ mi bi ji Yesu se nyɛɛli ɔmɛ. O ma nyɛ ma yɔse mɛ ejakaa a kɛ a he wui ma kudɔmi sanehi loo tahi a mi. (Yohane 17:16; 18:36) Jehanɛ se hu ɔ, a kase we je ɔ ní peepee kɛ e su yayami ɔmɛ.—Kane Yakobo 4:4.
-
Anɔkuale Kristofohi ngɛ suɔmi nitsɛ kɛ ha a sibi. A kase ngɛ Mawu Munyu ɔ mi kaa e sa nɛ a je bumi kpo kɛ ha nihi nɛ je wɛtso kpahi a mi ɔ tsuo. Lakpa jamihi fĩɔ ta hwumihi a se wawɛɛ, se anɔkuale jali pee we ja. (Mika 4:1-3) Mohu ɔ, anɔkuale Kristofohi jeɔ a suɔmi mi nɛ a kɛ a be kɛ níhi nɛ a ngɛ ɔ yeɔ bua nihi nɛ a woɔ mɛ he wami.—Kane Yohane 13:34, 35; 1 Yohane 4:20.
4. Anɛ o ma nyɛ maa le anɔkuale jami ɔ mi tso lo?
Mɛni jami nɛ ngɔɔ e tsɔɔmihi tsuo kɛ daa Mawu Munyu ɔ nɔ, nɛ e woɔ Mawu biɛ ɔ hɛ mi nyami, nɛ e fiɛɛɔ kaa Mawu Matsɛ Yemi ɔ pɛ ji adesahi a hɛ nɔ kami? Mɛni jami kuu nɛ a ngɛ suɔmi kɛ ha a sibi nɛ a kɛ a he wui ta hwumi mi? Kɛ o susu kɛɛ?—Kane 1 Yohane 3:10-12.
