OZUMALƐDƖYƐ 10
Kɛ Ɩkɛyɛ Na Wʋanwʋ Nɔhʋanlɛ Ɔzʋ̃mɩnlɛ a?
1. Asʋ̃ nɔhʋanlɛ ɔzʋ̃mɩnlɛ ɔkʋ̃ la yɛɛ ɩwɔ ɛkɛnɩ a?
“Behila bʋwɔ wɔ nkɔmɩhyɛmaa awohwimaa nɩ mɔɔ bɔ nwʋ.”—MATIYU 7:15.
Gyisɛsɩ ihileli ɩmɛdalilɛmaa yɩ nɩ ɔzʋ̃mɩnlɛ ɔkʋ̃ la, nɔhʋanlɛ ɔzʋ̃mɩnlɛ. Ɩdɩ kɛɛ ɔhʋanɩ mɔɔ ɩkɔ nnwʋanlɩ mɔɔ íni awielɩyɛ nu. Gyisɛsɩ ɩhanlɩ kɛɛ: “Mmenii ɛgyɩkɩ̃ɩ̃ be la yɛ bɔnwʋ” ɔzɔ ɔhʋanɩ yɩ a. (Matiyu 7:14) Ɔzʋ̃mɩnlɛ mɔɔ igyĩ Nyamɩnlɩ yɩ Odwokɔ Bayɩbʋlʋ ɩzʋ la yɛɛ ide itiã numɔ a. Nɔhʋanlɛ azʋ̃mɩvʋlɔ munwatĩĩ bɛyɛ ɔkʋ̃ wɔ dedi ɔkʋ̃ nu.—Kɩnga Dwɔɔnʋ 4:23, 24; 14:6; Ɛfɩsɛsɩmaa 4:4, 5.
Kilá vidiyo mɔɔ ise Asʋ̃ Nyamɩnlɩ Ide Ɔzʋ̃mɩnlɛ Azʋlɔtʋ Nɩ Itiã Numɔ a?
2. Mɩnla yɛɛ Gyisɛsɩ ɩhanlɩ ɩvalɩ awohwi Ahilisinyiamaa bɔnwʋ a?
“Ɔzɔ mmenii yi bese bezi Nyamɩnlɩ, naasʋ̃ bɛ nyɛlɩyɛ iáhile kɛɛ bezi Nyamɩnlɩ amba.”—TAYƖTƆSƖ 1:16.
Gyisɛsɩ ɩwɔlɩ kɔkɔ kɛɛ, nkɔmɩhyɛmaa awohwimaa bɛkɛma Kilisinyianɩzʋ̃mɩnlɛ ɩnwʋ ikogua evinli. Wɔ enii yɩ anyɩ zʋ nɩ, bɛdɩ kɛɛ nɔhʋanlɛ azʋ̃mɩvʋlɔ. Bɛ asɔlɩ azʋlɔtʋ nɩ kã kɛɛ bɛdɩ Ahilisinyiamaa. Naasʋ̃ ɔkɔhʋla ɔkɔnwʋ kezimɔ ɔzɔ mmenii nɩ bɛdɩ. Mɩnla ɔhʋanɩ zʋ a? Nɔhʋanlɛ ɔzʋ̃mɩnlɛ la yɛɛ ɩma yenyia Ahilisinyiamaa kanyɩɩ mɔɔ bɛda subanɩ nɩɩ nyɛlɩyɛ baaba ali a.—Kɩnga Matiyu 7:14-23.
3. Kɛ ɩkɛyɛ na wʋanwʋ nɔhʋanlɛ azʋ̃mɩvʋlɔ a?
Sunzu ndwɩyɛlɛ anlu eyi mɔɔ ɩma yɛnwʋ bɛ nɩ ɩnwʋ:
-
Nɔhʋanlɛ azʋ̃mɩvʋlɔ bobu Bayɩbʋlʋ yɩ kɛɛ Nyamɩnlɩ Odwokɔ. Bɔbɔ mmɔdɩnɩ kɛɛ bɛkɛva numɔ egyinalɛzʋ-ndwokɔ bɔkɔwɔ bɛ ɛbɩla. Meti nɔhʋanlɛ azʋ̃mɩvʋlɔ bɛyɛ sʋnʋnkʋ̃ wɔ ɔzʋ̃mɩnlɛ mɔɔ bɛfa behilehilelɛ bekyina enii yɩ nɣɛlɛbɛ zʋ nɩ nwʋ. (Matiyu 15:7-9) Nɔhʋanlɛ azʋ̃mɩvʋlɔ bɛfa mɔɔ bekihile mvʋlɔ nɩ bɔbɔ bɛ ɛbɩla.—Kɩnga Dwɔɔnʋ 17:17; 2 Timoti 3:16, 17.
-
Gyisɛsɩ yɩ nɔhʋanlɛ azʋ̃mɩvʋlɔ di Nyamɩnlɩ yi dima Gyehova nni. Gyisɛsɩ ilili Nyamɩnlɩ yi dima nni iluwa ɛlalɛ mɔɔ ɩlalɩ ɩali nɩ ɩzʋ. Ɩwʋwalɩ mmenii ma bɔnwʋnlɩ Nyamɩnlɩ na ihileli bɛ kɛɛ, sɛ bɔbɔ mpayɩ a, bɛva annidi bɔwɔ yi dima. (Matiyu 6:9) Dɩka mɔɔ ɛda yɩ nɩ, ɛhɩnla ɔzʋ̃mɩnlɛ yɛɛ bɛma mmenii nwʋ Nyamɩnlɩ yi dima?—Kɩnga Dwɔɔnʋ 17:26; Wulomimaa 10:13, 14.
-
Nɔhʋanlɛ Ahilisinyiamaa bɔbɔ Nyamɩnlɩ yɩ Bulombunlililɛ nwʋ ɛlawulo. Nyamɩnlɩ ɩzʋ̃manlɩ Gyisɛsɩ kɛɛ ɩɣa ɩwɔ odwokɔba mɔɔ ɩfalɩ Nyamɩnlɩ yɩ Bulombunlililɛ nwʋ ɛlawulo. Nyamɩnlɩ Bulombunlililɛ yɩ nɩ la yɛɛ ɩdɩ adasamaa anyɩnlɩlazʋ ɔkʋ̃ pɛ a. Gyisɛsɩ ɩhɔlɩ ɔzʋlɔ ɩhanlɩ ɔnwʋmɔ odwokɔ ɩhɔ ɩbʋmɩnlɩ mmɩlɩ mɔɔ iwuli. (Luuku 4:43; 8:1; 23:42, 43) Ɩhanlɩ kɛɛ yɩ adʋwavʋlɔ nɩ mɔ sʋ̃ bɔkɔhɔ ɔzʋlɔ la bɛkɛhã ɔnwʋmɔ odwokɔ. Sɛ abiye ba wʋ pɛ kɛɛ ɩbahã Nyamɩnlɩ yi Bulombunlililɛ nwʋ odwokɔ ikehile wʋ a, ɛhɩnla ɔzʋ̃mɩnlɛ nu yɛɛ ekila a, ɩwɔ a?—Kɩnga Matiyu 24:14.
-
Gyisɛsɩ yɩ ɩmɛdalilɛmaa nɩ bɛ́dɩ oyuwadɩ eyi ɩfʋã.Ɔkɔhʋla ɔkɔnwʋ nɔhʋanlɛ ɔzʋ̃mɩnlɛmaa iluwakɛɛ bɛáva bɔnwʋ bowula manlɩwulɛ ndwokɔ anzɛnyɩɩ bɛ bɛsabɛsayɛlɛ nu. (Dwɔɔnʋ 17:16; 18:36) Akʋ̃ sʋ̃, bɛázumazumanlɩ oyuwadɩ eyi yɩ nyɛlɩyɛ ɩnɩ bo subanɩ tanɩ nɩ be.—Kɩnga Gyemisi 4:4.
-
Nɔhʋanlɛ Ahilisinyiamaa bɔwɔ ɔlɔlɛ sʋnʋnkʋ̃ bɛma bɔnwʋ bɔnwʋ. Wɔ Nyamɩnlɩ yɩ Odwokɔ nu nɩ, bosuma kɛɛ bokowu mmenii azʋlɔtʋ munwala. Ɩwɔ numɔ kɛɛ awohwi ɔzʋ̃mɩnlɛ bɔbʋwa kʋnɛ mɔɔ ɩkɔlɩ ɔzʋlɔ wɔ amanlɩamanlɩ nu dɩyɛ, naasʋ̃ nɔhʋanlɛ ɔzʋ̃mɩnlɛmaa bɔpʋ ɔzɔ nyɛlɩyɛ nɩ. (Matiyu 26:52) Mfomi, nɔhʋanlɛ Kilisinyiamaa bɔzʋ̃ bɛ ahʋnlɩnɩ nu bɛfa bɛ mmɩlɩ ɩnɩ be nninyeni bɔbʋwa mvʋlɔ na bɛhyɛ bɛ ɛzɩzɩbɛ.—Kɩnga Dwɔɔnʋ 13:34, 35; 1 Dwɔɔnʋ 4:20.
4. Asʋ̃ sa ɔkʋla ekile nɔhʋanlɛ ɔzʋ̃mɩnlɛ nɩ a?
Ɛhɩnla ɔzʋ̃mɩnlɛ yɛɛ bɛfa bɛ ehilehilelɛ munwatĩĩ bekyina Nyamɩnlɩ yɩ Odwokɔ zʋ, bedi Nyamɩnlɩ yi dima nni, na bɔbɔ Nyamɩnlɩ Bulombunlililɛ nwʋ ɛlawulo kɛɛ mɛyɩ yɛɛ ɩdɩ adasamaa bɛ anyɩnlɩlazʋ ɔkʋ̃ kyeinyii a? Ɔzʋ̃mɩnlɛ okuwu ɛhɩnla dɩyɛ yɛɛ bɛda ɔlɔlɛ ali na bɔtwɩ̃ bɔnwʋ wɔ kʋnɛ nwʋ a? Kɛ ɔdwɩnɩ nwʋ ese a?—Kɩnga 1 Dwɔɔnʋ 3:10-12.
