KIMELTUN 10
¿Chumgechi am kimafuyiñ ti rüf religion ngen?
1. ¿Mülepey may kiñe rüf religion müten?
‘Kuñiwtuwmün tati pu koyla pelon wentru mew.’ (MATEW 7:15)
Jesu ka tañi pu inaniekeetew, inaniekey ta kiñen rüf religion müten. Tüfa kiñe rüpü reke yekelu afnoachi mongen mew, welu pichin che müten pekey, kam konpukeyngün (Matew 7:14). Dio küme llowkey ñi poyekeetew rüf dungu mew, mülelu Biblia mu. Kom tati rüf küme poyekelu kiñewküley kiñe mupiltun müten. Chillkatunge Juan 4:23, 24, ka Efesio 4:4, 5.
Pefinge ti video Chaw Ngünechen, ¿ayükepefi may itrokom religion?
2. ¿Chem pi Jesu feyti pu koyla kristiano?
“Feypikeyngün ñi kimfiel ta [Dio], welu ñi femkeelchi dungu mew kimufaluwkey engün ñi kimnofiel ta [Dio].” (TITO 1:16)
Jesu feypikünuy müleay tati pu koyla pelon wentru podümüñmafi tati kristiano ngen. Tüfachi che ka ñi iglesia üytuwingün kristiano. Chumte “iñchiñ nieyiñ ta rüf dungu” pikey engün, welu re ngünenkakefi ta che. Welu may eymi kimafuymi ti rüf religion, pu rüf inaniekefilu Kristo am pengelkey ñi kümeke ad ngen kangey engün kake che mu. Chillkatunge Matew 7:13-23.
3. ¿Chumgechi kimafuymi yenielu ti rüf religion?
Peaiñ kechu dungu ta pengeli ñi kimgeken:
-
Yamniekey Dio ñi Dungu, ta Biblia. Inakelafi che ñi kimeltun, welu may newentukey engün ñi feyentuafiel kom ley dungu mülelu Biblia mu (Matew 15:7-9). Ka, re dungukelay ñi kümechengeal, ka femkey tañi feypiel engün ñi mongen mu. Chillkatunge Juan 17:17, ka 2 Timotew 3:16, 17.
-
Püramyekefi Chaw Dio ñi üy, Jewba. Jesu kimeltufilu Chaw Dio ñi üy, femgechi püramyefi. Kellukefi ta che ñi kimafiel Dio, ka kimeltufi engün ñi llellipuafiel ta yamniengeal Chaw Dio ñi üy (Matew 6:9). Chew tami mülen eymi, ¿chem religion kimeltukey Chaw Dio ñi üy? Chillkatunge Romanu 10:13, 14, NM.
-
Amul dungukeyngün Dio ñi Reino. Jesu werküngey tüfachi Mapu ñi amul dungual ti kümeke dungu küpalalu feyti Reino, fey ta kiñen maneluwün müten niey kom pu che. Jesu amuley ñi kimeltun, fey wüla lalu fentepuy (Luka 4:43; 8:1; 23:42, 43). Ka feypifi tañi pu inaniekeetew ñi amul dunguafiel feychi Reino. Fey mu fülpale eymi mu chew tami mülen, ka dunguelmew Dio ñi Reino mu, ¿chem religion am koneltuleychi? Chillkatunge Matew 24:14, NM.
-
Koneltukelay müleyechi kom weda dungu mapu mew. Jesu ñi pu inanieetew reyükonkelay (dellikonkelay) politiko dungu, huelga dungu, ka protesta dungu no rume (Juan 17:16; 18:36). Ka inaye femkelay tüfachi mapu ñi femken, ka ñi üñfitun wimtun. Chillkatunge Santiaw 4:4.
-
Ñi nien rüf piwkeyewün welukechi pewfaluwkey. Dio ñi Dungu kimeltukeeyew engün ñi yamafiel kom che, chuchi rume kake trokiñ mollfüñ che mülelu. Rumel (femkey engün) pu koylake religion elukey ñi kellun ti awkan (weychan) dungu, welu tati pu rüf kristiano femkelay (Miqueas 4:1-3). Welu may wülkeyngün ñi tiempo ka ñi pülata ñi kelluafiel, ka yafüluwafiel ta chafche kidu engün chem rume ñi wiño llownoal. Chillkatunge Juan 13:34, 35, ka 1 Juan 4:20.
4. Fewla eymi, ¿kimafuymi chuchi ngen tati rüf religion?
¿Chem religion tuwi kom tañi kimeltun Biblia mew, yamniefi chaw Dio ñi üy, ka kimeltuyngün Dio ñi Reino, ka feypingün: “Tüfa ta kiñen manelüwün kom pu che”? ¿Chem trokiñ che rüf piwkeyewingün, ka kellukelay ti awkan (weychan) dungu? ¿Chem pimi eymi? Chillkantunge 1 Juan 3:10-12.
