ˈCƖƐCƖƐKÏBHË 10
Sɛɛ -a ˈkä ɔ Lagɔ ˈa -tiamö a bʋbɔbʋbʋ yɩbhlɩnɩ ˈnɩ?
1. Lagɔgligbë -bhlʋ a ˈyize ma-a nɛnɩ ɔ Lagɔ dlɩ yɔwʋ -a?
“Nɩkpa Lagɔ ˈnɩɛ tie -wa laa waɲɩ lagɔnɩkpa Lagɔ bhïlanɩɛ ˈmöö, -a nɩ ˈnɛmanuë ˈwʋ.”—MATIE 7:15
Lagɔgligbë -bhlʋ a ˈyize, ˈmö Zezwii ˈcɩaa ˈɔ ˈwʋ-bhlinɩwaa, ma-a -lɛ -tiamö a lagɔgligbëa. Ma-a -lɛ ˈyio -wʋ möä -mä ˈpɩwʋ mää ˈnaa ˈkää ˈyli bhɩɛ ˈwʋ. Zezwii lɛ naa: “Nɩkpa -wa bhïluä, waˈaa -zu.” (Matie 7:14) Bʋbɔbʋbʋ Biblë ˈcɩaɲɩɛ a ˈyize, mʋʋ nɛnɩɛ Lagɔ dlɩ yɔwʋ. -Tiamö a lagɔbʋbɔwaa ˈwuë, Lagɔ ˈmö wa ˈtɛɛnɩɛ dlɩ ˈn wa -wanɩɛ.—-A zɛlɩ Zaah 4:23, 24 ˈn Zaah 14:6 -ɲɛ Ɛfɛɛzɩ 4:4, 5 ˈsɔ ˈmö.
A nɩ ylɛ video Lagɔgligbï ˈwuë mi nɛnɩ ɔ Lagɔ dlɩ yɔwʋ -a?
2. Sɛɛ Zezwii gbä a-a ɔ ˈfʋ ˈa Klɩtɩɛwa a dɛ ˈnɩ?
“Nɩkpa ˈla, wa lɛ wa -yi Lagɔ, maa -n -kä ˈwa nʋnʋlii ˈwʋ yɩlɩɩ, -n -yi sɛ nɩɩ, wa ˈnɔɔ tɛkäsɛ -yi ˈlɩlɩlɩ.”—TIITƖ 1:16.
Zezwii ɲɩaɲɩ a-a ˈdɩ nɩɩ nɩkpaa Lagɔ ˈnɩɛ tie, -wa laa waɲɩ lagɔnɩkpa Lagɔ bhïlanɩɛ ˈmöö, yi a-a -tiamö a lagɔgligbëa ɲima. -A -kʋa ˈylɩmöö, wa ˈkä -bhie -tiamö a lagɔbʋbɔwa. -Mä ˈwa lagɔgligbï ˈmö, wa lɛ Klɩtɩɛwa wa glɩnɩɛ. Maa -a bhɛnɩ -a ˈkä ˈsaa wa glɩnɩɛ -tiamö yɩbhlɩnɩ. Sɛɛ -a ˈkä ɔ ˈzʋ ˈnɩ? -Tiamö a bʋbɔbʋbʋ a ˈyize mʋʋ kää ˈŋlɩ ˈn -a yɩbhlɩnɩɛ -tiamö a Klɩtɩɛwa -mä ˈwa -wʋwʋsaa -ɲɛ ˈwa nʋnʋlii ˈsɔ ˈmö.—-A zɛlɩ Matie 7:13-23 ˈmö.
3. Sɛɛ -a ˈkä ɔ -tiamö a Klɩtɩɛwa yɩbhlɩnɩ ˈnɩ?
ˈKïbhï ngbï mii -kaɲɩɛ kwänɩ:
-
-Tiamö a Klɩtɩɛwaa, Biblë ˈmö wa zʋä ˈklʋkpamö. ˈYli yɔwʋ wa ˈtɛmanɩɛ ˈn wa nɛmönɩɛ Biblë ˈa ˈpäpägböö ˈmö. Zaa -tiamö a lagɔgligbëa, ˈnɩɛ ˈfʋ a lagɔgligbï -yɩ ˈcɩaa nɩkpa a ˈpäpägböö a sɛ -wʋ. (Matie 15:7-9) Lagɔwɛlɩɩ wa ˈcɩaa nɩkpa, ˈmö wa nɛmönɩɛ waˈbhï ˈmö.—-A zɛlɩ Zaah 17:17 -ɲɛ 2 Timotee 3:16, 17 ˈsɔ ˈmö.
-
Zezwii ˈa -tiamö a -gänɩwaa, Lagɔ ˈa ŋlɩɩ Zoova, ˈmö wa ˈghlimanɩɛ. Zezwii ˈghlimanɩ a-a Lagɔ ˈa ŋlɩɩ. Ɛˈɛ -bhö ɲɩasɛ, maa Lagɔ ˈa ŋlɩɩ ˈmö ɔ sʋlʋnɩɛ nɩkpa. Ɔ kwänɩ nɩkpa wa ˈkä Lagɔ yɩbhlɩnɩ. Lagɔ ˈa ŋlɩɩ ˈkä ˈghlimanɩ a za, ɔ ˈcʋa bhibhebhibhesɛ. (Matie 6:9) A dɛɛ a glɩɛ a dɔˈwʋ, lagɔgligbë -ma ˈcɩa ɔ Lagɔ ˈa ŋlɩɩ ˈnɩ?—-A zɛlɩ Zaah 17:26 -ɲɛ Ghlɔɔmö 10:13, 14 ˈsɔ ˈmö.
-
-Tiamö a Klɩtɩɛwaa, Lagɔ ˈa ˈKämanɔɔ a wɛlɩɩ ˈmö wa biaa. Lagɔ tie ɔ yowli Zezwii, ɔ ˈkä Lagɔ ˈa ˈKämanɔɔ ˈa ˈtɩtɩ a -tɩtɩɩ nɩkpa ˈɲɛ. Lagɔ ˈa ˈKämanɔɔ ˈa ˈyize mʋʋ ˈkää nɩkpa ˈpʋpʋɛ ˈɲɛ. Zezwii -wʋ Lagɔ ˈa ˈKämanɔɔ a dɛ bhïla dɔˈwʋ -këë ˈn ɔ yiɛ ˈku. (Lwiikö 4:43; 8:1; 23:42) Ɔ lɛ nɩɩ, ˈɔ -gänɩwa yi wʋ wɛlɩ bia. Nɩkpɛɛ -ɔ -yimöä ˈkwädlɩ lagɔwɛlɩɩ ˈcɩaa, lagɔgligbë -ma ˈmö ɔ -wʋ ɔ ˈnɩ?—-A zɛlɩ Matie 24:14 ˈmö.
-
Zezwii ˈa -gänɩwaa ˈnɩɛ mäˈä ˈpɩwʋ a -nʋa a ˈyize glɩnɩ. Sɛɛ -a bhɛnɩɛ -a ˈkuë yɩbhlɩnɩ -sɩbhä ma-a nɩɩ, waˈaa mäˈä ˈpɩwʋ a politikö -ɲɛ kpɛnɩkpɛnɛ ˈsɔ ˈmö -wʋ. (Zaah 17:16; 18:36) ˈPɩwʋ a nʋnʋlii -ɲɛ dlɩpäsazokwëa ˈsɔ, wa ˈniɛ ˈyɛ -gänɩ.—-A zɛlɩ Zaakö 4:4 ˈmö.
-
-Tiamö a Klɩtɩɛwaa, -wawʋ wa kää jijoˈwʋ, ˈwʋä -sɩbhä a sɛ -wʋ. Lagɔ ˈa wɛlɩɩ ˈmö -mä wa ˈcɩɛɛ nɩɩ, waˈaa dɛsɛ -kä wa ˈkä -mumuë ˈwʋ zi. ˈFʋ a lagɔgligbï, ˈpɩwʋ a -gwlɩɩ -yɩ gwɩɛ tʋ, ˈmö yɩ -wʋä nimï. Maa -tiamö a Klɩtɩɛwaa ˈnɩɛ -sɩbhä ˈzʋmö. (Michée 4:1-3) ˈWa ˈtɛɲɩ -ɲɛ ˈwa ˈsaa wa kää ˈsɔ, ˈmö wa libhïä ˈwʋ, ˈn wa kwänɩɛ nɩkpa, wa pʋaa swɩ ɲɛmʋ ˈmö.—-A zɛlɩ Zaah 13:34, 35 -ɲɛ 1 Zaah 4:20 ˈsɔ ˈmö.
4. Sɛɛ -a ˈkä ɔ -tiamö a lagɔgligbëa yɩbhlɩnɩ ˈnɩ?
Lagɔgligbë -ma ˈcɩa ɔ Biblë ˈmö a wɛlɩɩ, -a ˈghlimanɩ ɔ Lagɔ ˈa ŋlɩɩ, ˈn -a nʋ ɔ nɩɩ, Lagɔ ˈa ˈKämanɔɔ a ˈyize, mʋʋ ˈkää nɩkpa yɔlɔylʋ ˈmö -sɛ? Lagɔgligbë -ma ˈmö a -nʋa -wawanɩ ɔ ˈn -waa gwɩ ɔ tʋ ˈnɩ? Sɛɛ -n pä ɔ dlɩ ˈnɩ? —-A zɛlɩ Zaah 3:10-12 ˈmö.
