REIREI 10
Ko na Kanga ni Kinaa te Taromauri ae Koaua?
1. Te koaua bwa tii teuana te Aro ae koaua?
“Tarataraingkami mairouia burabeti ni kewe.”—MATAIO 7:15.
E tuangia taan rimwina Iesu bwa tii teuana te Aro ae koaua. Ai aron te kawai ae kairiri nakon te maiu are aki toki. E taku Iesu: “A karako akana kunea” te kawai anne. (Mataio 7:14) E butimwaeaki iroun te Atua te taromauri ae boto man ana Taeka ae te Baibara. A bane ni katiteuanaaki taan taromauri ni koaua n te onimaki ae tii teuana.—Wareka Ioane 4:23, 24; 14:6; I-Ebeto 4:4, 5.
2. Tera ae e taekinna Iesu ibukia Kristian ni kewe?
“A taekinna i mataia aomata bwa a ataa te Atua, ma a kakeaa n aia mwakuri.”—TITO 1:16.
E kauringia Kristian Iesu bwa a na kabuakakaaki irouia burabeti ni kewe. Ni koauana, a taraaki bwa taan taromauri ni koaua. A atongia bwa boni Kristian ngaiia. Ma ko kona ni kinaia raoi aekaki n aomata akanne. N te aro raa? Bon tii te taromauri ae koaua ae karikiia Kristian ni koaua aika kinaaki n aroaroia ao aia mwakuri aika raraoi.—Wareka Mataio 7:13-23.
3. Ko na kanga ni kinaia taan taromauri ni koaua?
Iangoi kanikina aika nimaua aikai:
-
A karinea te Baibara bwa Ana Taeka te Atua, taan taromauri ni koaua. A kakorakoraia ni kaboraoi maiuia ma booto n reirei aika n te Baibara. Mangaia are e kaokoro te Aro ae koaua ma Aaro ake a kabotoi aia reirei n aia tua aomata. (Mataio 15:7-9) A maiuakina te reirei are a reiakinia iai aomata taan taromauri ni koaua.—Wareka Ioane 17:17; 2 Timoteo 3:16, 17.
-
A karinea aran te Atua ae Iehova taan rimwin Iesu ni koaua. E karineaki aran te Atua iroun Iesu, n arona ni kaotiota te ara anne. E buokiia aomata bwa a na kinaa te Atua ao e reireinia bwa a na tataroakina katabuan aran te Atua. (Mataio 6:9) Tera te Aro ae e kaotiota aran te Atua, n am tabo ae ko maeka iai?—Wareka Ioane 17:26; I-Rom 10:13, 14.
-
A uarongorongoa Ana Tautaeka n Uea te Atua, Kristian ni koaua. E kanakoaki Iesu iroun te Atua bwa e na tataekina te rongorongo ae raoiroi ibukin te Tautaeka n Uea. Bon tii Ana Tautaeka n Uea te Atua ae e kona ni katoki aia kangaanga aomata. E teimatoa Iesu n tataekina te rongorongo ae raoiroi ni karokoa matena. (Ruka 4:43; 8:1; 23:42, 43) E tuangia naba taan rimwina bwa a na tataekina te rongorongo ae raoiroi. Ngkana iai temanna ae tataekina nakoim rongorongon Ana Tautaeka n Uea te Atua, tera te Aro ae nako mai iai?—Wareka Mataio 24:14.
-
A aki irekereke ma ana waaki te aonnaba ae buakaka aei, taan rimwin Iesu. Ko kona ni kinaia n aroia n aki irekereke ma aia waaki n tautaeka aomata ke te buaka. (Ioane 17:16; 18:36) A aki naba kakairi n aia mwakuri aika buakaka ao aroaroia kaain te aonnaba.—Wareka Iakobo 4:4.
-
A kaotiota te itangitangiri i marenaia Kristian ni koaua. A reiakinna n Ana Taeka te Atua bwa a riai ni karineia reeti aika kakaokoro. E ngae ngke a aki toki ni kakorakoraia Aaro aika kewe ni boutokaa te buaka irouia botannaomata, ma a aki karaoa anne taan taromauri ni koaua. (Mika 4:1-3) N oneani mwin anne, a kabonganai raoi aia tai ao kaubwaia Kristian ni koaua ni buokiia ao ni kaungaia aomata nako.—Wareka Ioane 13:34, 35; 1 Ioane 4:20.
4. Ko kona ni kinaa te Aro ae koaua?
Tera te Aro ae kabotoi ana reirei ni kabane n Ana Taeka te Atua, e karinea aran te Atua, ao e tataekina Ana Tautaeka n Uea te Atua bwa tii ngaia ae kona ni katoki aia kangaanga aomata? Antai te koraki aika a kaotiota te tangira ao a aki ira te buaka? Tera am iango iai?—Wareka 1 Ioane 3:10-12.
