NUPINPLỌN 10
Nawẹ Hiẹ Sọgan Yọ́n Sinsẹ̀n Nugbo lọ Gbọn?
1. Be sinsẹ̀n nugbo dopo gee wẹ tin ya?
“Mì họ́ mìde gando yẹwhegán lalo lẹ go.”—MATIU 7:15.
Sinsẹ̀n dopo gee wẹ Jesu plọn hodotọ etọn lẹ, yèdọ sinsẹ̀n nugbo lọ. E taidi aliho de he planmẹ yì ogbẹ̀ madopodo. Jesu dọmọ: “Omẹ vude wẹ sọ to dindin [aliho enẹ] mọ.” (Matiu 7:14) Sinsẹ̀n-bibasi he sinai do Ohó nugbo Jiwheyẹwhe tọn ji kẹdẹ wẹ ewọ nọ kẹalọyi. Yise dopolọ wẹ kọ̀n sinsẹ̀n-basitọ nugbo lẹpo dopọ.—Hia Johanu 4:23, 24; 14:6; Efesunu lẹ 4:4, 5.
Pọ́n video lọ Be Sinsẹ̀n-Bibasi Wunmẹ Lẹpo Wẹ Jiwheyẹwhe Nọ Kẹalọyi Ya?
2. Etẹwẹ Jesu dọ gando Klistiani lalo lẹ go?
“Yé lá to gbangba dọ yé yọ́n Jiwheyẹwhe, ṣigba yé mọ́n ẹn gbọn azọ́n yetọn lẹ dali.”—TITU 1:16.
Jesu na avase dọ yẹwhegán lalo lẹ na hẹn sinsẹ̀n Klistiani tọn flu. Yé nọ do yede hia taidi sinsẹ̀n-basitọ nugbo lẹ. Hagbẹ ṣọṣi tọn yetọn lẹ nọ sọalọakọ́n dọ Klistiani wẹ emi yin. Ṣigba, e ma vẹawu nado yọ́n nuhe omẹ mọnkọtọn lẹ yin taun. Gbọnna? Sinsẹ̀n nugbo kẹdẹ wẹ nọ gọalọna gbẹtọ lẹ nado lẹzun Klistiani nugbo he nọ do jẹhẹnu po walọ dagbe lẹ po hia.—Hia Matiu 7:13-23.
3. Nawẹ hiẹ sọgan yọ́n sinsẹ̀n-basitọ nugbo lẹ gbọn?
Gbọ mí ni gbadopọnna onú atọ́n he nọ dohiagona yé lẹ:
-
Sinsẹ̀n-basitọ nugbo lẹ nọ na sisi Biblu taidi Ohó Jiwheyẹwhe tọn. Yé nọ dovivẹnu nado yí nuhe e dọ lẹ do yizan mẹ. Enẹwutu, sinsẹ̀n nugbo gbọnvo na sinsẹ̀n he nọ ze nuplọnmẹ yetọn sinai do linlẹn gbẹtọvi tọn ji lẹ. (Matiu 15:7-9) Sinsẹ̀n-basitọ nugbo lẹ ma nọ plọnmẹ nude bo nọ wà nudevo gba.—Hia Johanu 17:17; 2 Timoti 3:16, 17.
-
Hodotọ nugbo Jesu tọn lẹ nọ na sisi oyín Jiwheyẹwhe tọn, Jehovah. Jesu na sisi oyín Jiwheyẹwhe tọn gbọn hinhẹn ẹn zun yinyọnẹn dali. E gọalọna gbẹtọ lẹ nado yọ́n Jiwheyẹwhe bo plọn yé nado nọ hodẹ̀ dọ oyín Jiwheyẹwhe tọn ni yin kinklandowiwe. (Matiu 6:9) Sinsẹ̀n tẹwẹ nọ hẹn yinkọ Jiwheyẹwhe tọn zun yinyọnẹn to lẹdo towe mẹ?—Hia Johanu 17:26; Lomunu lẹ 10:13, 14.
-
Klistiani nugbo lẹ nọ dọyẹwheho gando Ahọluduta Jiwheyẹwhe tọn go. Jiwheyẹwhe do Jesu hlan nado lá wẹndagbe Ahọluduta lọ tọn. Ahọluduta Jiwheyẹwhe tọn wẹ yin todido dopo akàn lọ na gbẹtọvi lẹ. Jesu dọho gandego kakajẹ azán he gbè e kú. (Luku 4:43; 8:1; 23:42, 43) E dọ dọ hodotọ etọn lẹ na dọyẹwheho gando Ahọluduta lọ go. Eyin mẹde dọnsẹpọ we bo dọ dọ emi to hodọ gando Ahọluduta Jiwheyẹwhe tọn go, hagbẹ sinsẹ̀n tẹ tọn wẹ a lẹndọ e na ko yin?—Hia Matiu 24:14.
-
Hodotọ Jesu tọn lẹ ma yin apadewhe aihọn ylankan ehe tọn. Hiẹ sọgan yọ́n yé, na yé ma nọ tindo mahẹ to whẹho tonudidọ tọn lẹ po gufinfọn pọmẹ tọn lẹ po mẹ. (Johanu 17:16; 18:36) Mọdopolọ, yé ma nọ hodo aṣa po nuyiwa ylankan aihọn lọ tọn lẹ po.—Hia Jakọbu 4:4.
-
Klistiani nugbo lẹ nọ tindo owanyi nujọnu tọn na ode awetọ. Ohó Jiwheyẹwhe tọn ko plọn yé nado nọ na sisi mẹhe wá sọn akọ̀ voovo mẹ lẹpo. Dile etlẹ yindọ sinsẹ̀n lalo lẹ nọ saba nọgodona awhàn akọta lẹ tọn, sinsẹ̀n-basitọ nugbo lẹ nọ gbẹ́ nado wàmọ. (Mika 4:1-3) Kakatimọ, Klistiani nugbo lẹ nọ gbọn ṣejannabi matindo dali yí whenu po nutindo yetọn lẹ po zan nado gọalọna mẹdevo lẹ bo na tuli yé.—Hia Johanu 13:34, 35; 1 Johanu 4:20.
4. Be hiẹ sọgan yọ́n sinsẹ̀n nugbo lọ ya?
Sinsẹ̀n tẹwẹ nọ ze nuplọnmẹ etọn lẹpo sinai do Ohó Jiwheyẹwhe tọn ji, nọ na sisi oyín Jiwheyẹwhe tọn bo nọ lá dọ Ahọluduta Jiwheyẹwhe tọn wẹ yin todido dopo akàn lọ na gbẹtọvi lẹ? Pipli tẹwẹ nọ do owanyi hia bo ma nọ funawhàn? Etẹwẹ hiẹ lẹn?—Hia 1 Johanu 3:10-12.
