HAʻAWINA 10
Pehea ʻOe E ʻIke Ai Ka Hoʻomana ʻOiaʻiʻo?
1. Hoʻokahi wale nō hoʻomana ʻoiaʻiʻo?
“E mālama hoʻi iā ʻoukou no ka poʻe kāula hoʻopunipuni.”—MATAIO 7:15.
Ua aʻo ʻo Iesū i ka poʻe hahai iā ia, hoʻokahi wale nō hoʻomana ʻoiaʻiʻo. Ua like ia me ke ala e hele ai i ke ola mau loa. ʻŌlelo ʻo Iesū: “Kākaʻikahi wale ka poʻe loaʻa” ia ala. (Mataio 7:14) ʻO ka hoʻomana e hahai ana i kāna ʻŌlelo o ka ʻoiaʻiʻo, ʻo ia ka hoʻomana hoʻokahi a ke Akua e ʻāpono ai.—E heluhelu iā Ioane 4:23, 24; 14:6; ʻEpeso 4:4, 5.
E nānā i ka wikiō ʻAe ke Akua i Nā Hoʻomana A Pau?
2. He aha kā Iesū i ʻōlelo ai no nā Kalikiano hewa?
“Ua hōʻoiaʻiʻo ko lākou waha i ko lākou ʻike ʻana i ke Akua; akā, ma ka hana ʻana ua hōʻole lākou.”—TITO 1:16.
Ua ʻōlelo ʻo Iesū e akahele, no ka mea, e komo ana nā Kalikiano hewa a e hoʻohaumia ana lākou i ka hoʻomana Kalikiano. Ma ka nānā ʻana, ua like nō lākou me ka poʻe hoʻomana ʻoiaʻiʻo. ʻŌlelo lākou, he mau hale pule Kalikiano nō ko lākou. Akā, hiki nō ke ʻike i ko lākou ʻano maoli. Pehea e ʻike ai? ʻO ka hoʻomana ʻoiaʻiʻo, hiki ke ʻike ma kā lākou mau hana a me ko lākou ʻano.—E heluhelu iā Mataio 7:13-23.
3. Pehea ʻoe e ʻike ai i ka poʻe hoʻomana ʻoiaʻiʻo?
E nānā i kēia mau hōʻailona ʻelima:
-
ʻO ka poʻe hoʻomana ʻoiaʻiʻo, nui ko lākou hōʻihi i ka Paipala. Hoʻāʻo nui lākou e hahai i nā loina o ka Paipala. ʻAʻole like me nā hoʻomana e hahai nei i nā manaʻo o kānaka. (Mataio 15:7-9) ʻAʻole lākou haʻi i kekahi mea, a laila, hana i kekahi mea ʻokoʻa.—E heluhelu iā Ioane 17:17; 2 Timoteo 3:16, 17.
-
ʻO ka poʻe hahai maoli iā Iesū, hoʻohanohano lākou i ka inoa ʻo Iēhova. Ua hoʻohanohano ʻo Iesū i ka inoa o ke Akua ma o ka hōʻike ʻana i kona inoa i nā kānaka a pau. Ua kōkua ʻo ia i ka poʻe e ʻike i ke Akua a e pule iā ia. (Mataio 6:9) I kou wahi e noho nei, ʻo ka hoʻomana hea ka mea e hoʻolaha nei i ka inoa o ke Akua?—E heluhelu iā Ioane 17:26; Roma 10:13, 14.
-
Haʻi ʻeuanelio ka poʻe hoʻomana ʻoiaʻiʻo no ke Aupuni o ke Akua. Ua hoʻouna ke Akua iā Iesū no ka haʻi ʻana i ka nū hou maikaʻi o ke Aupuni. ʻO ke Aupuni o ke Akua ka hāʻina hoʻokahi no kānaka. Ua ʻōlelo mau ʻo Iesū no kēlā Aupuni a hiki i ka lā o kona make ʻana. (Luka 4:43; 8:1; 23:42, 43) Inā hele mai kekahi kanaka iā ʻoe e walaʻau pū e pili ana i ke Aupuni o ke Akua, he aha kona hoʻomana?—E heluhelu iā Mataio 24:14.
-
ʻO ka poʻe hahai iā Iesū, ʻaʻole lākou hahai i ka ʻino o kēia ao. ʻIke ʻoe iā lākou, no ka mea, ʻaʻole lākou komo i nā hana politika a me nā hukihuki ma waena o nā hui kanaka. (Ioane 17:16; 18:36) ʻAʻole hoʻi lākou hahai i nā hana ʻino a me nā manaʻo ʻino o ke ao.—E heluhelu iā Iakobo 4:4.
-
ʻO nā Kalikiano ʻoiaʻiʻo, nui loa ko lākou aloha i kekahi i kekahi. Aʻo lākou ma o ka Paipala e hōʻihi i nā lāhui kanaka a pau a hōʻole ikaika i ka hoʻomana hoʻopunipuni. (Mika 4:1-3) ʻO nā Kalikiano ʻoiaʻiʻo hoʻi, hāʻawi lākou mai ka naʻau mai, no ke kōkua ʻana a me ka paipai ʻana iā haʻi.—E heluhelu iā Ioane 13:34, 35; 1 Ioane 4:20.
4. Hiki paha iā ʻoe ke ʻike i ka hoʻomana ʻoiaʻiʻo?
ʻO ka hoʻomana hea ka mea nona nā aʻo ʻana i hoʻokumu ʻia i ka Paipala, e hoʻohanohano nei i ka inoa o ke Akua, a e hōʻike nei ʻo ke Aupuni o ke Akua ka hāʻina hoʻokahi no kānaka? ʻO ka hui hea ka mea e hōʻike nei i ke aloha maoli a e kākoʻo ʻole nei i nā kaua? He aha kou manaʻo?—E heluhelu iā 1 Ioane 3:10-12.
