LEKSION 10
Paano Mo Mahibaluan ang Matuod nga Pagsimba?
1. Isa lamang bala ang matuod nga relihion?
“Mag-andam kamo sa butig nga mga manalagna.”—MATEO 7:15.
Gintudlo ni Jesus sa iya mga sumulunod ang isa lamang ka relihion, ang matuod nga relihion. Pareho ini sa dalan nga nagapadulong sa kabuhi nga wala sing katapusan. Si Jesus nagsiling: “Pila lamang ang nakatultol” sina nga dalan. (Mateo 7:14) Ginabaton lamang sang Dios ang pagsimba nga nabase sa iya Pulong sang kamatuoran. Ang tanan nga matuod nga sumilimba nahiusa sa isa lang ka pagtuo.—Basaha ang Juan 4:23, 24; 14:6; Efeso 4:4, 5.
Tan-awa ang video nga Ginabaton Bala sang Dios ang Tanan nga Pagsimba?
2. Ano ang ginsiling ni Jesus parte sa butig nga mga Cristiano?
“Ginapahayag nila sing dayag nga kilala nila ang Dios, apang ginapanghiwala nila sia paagi sa ila mga buhat.”—TITO 1:16.
Si Jesus nagpaandam nga dagtaan sang butig nga mga manalagna ang Cristianismo. Kon tan-awon, daw matuod sila nga mga sumilimba. Ang ila mga relihion nagapangangkon nga mga Cristiano. Pero makilala mo ina nga mga tawo kon ano gid sila. Paano? Ang matuod nga mga Cristiano lamang ang nagahimo sang matuod nga pagsimba kag makilala mo sila paagi sa ila mga kinaiya kag paggawi.—Basaha ang Mateo 7:13-23.
3. Paano mo makilala ang matuod nga mga sumilimba?
Binagbinaga ining lima ka palatandaan:
-
Ginatuman sang matuod nga mga sumilimba ang Biblia bilang Pulong sang Dios. Ginaaplikar gid nila ang mga prinsipio sini. Gani ang matuod nga relihion tuhay sa relihion nga ginabase ang panudlo sa ideya sang tawo. (Mateo 15:7-9) Ginahimo gid sang matuod nga mga sumilimba ang ila ginatudlo.—Basaha ang Juan 17:17; 2 Timoteo 3:16, 17.
-
Ginapadunggan sang matuod nga mga sumulunod ni Jesus ang ngalan sang Dios nga Jehova. Ginpadunggan ni Jesus ang ngalan sang Dios paagi sa pagpakilala sini. Ginbuligan niya ang mga tawo nga makilala ang Dios kag gintudluan sila nga ipangamuyo nga pakabalaanon ang ngalan sang Dios. (Mateo 6:9) Ano nga relihion sa inyo lugar ang nagapakilala sa ngalan sang Dios?—Basaha ang Juan 17:26; Roma 10:13, 14.
-
Ginabantala sang matuod nga mga Cristiano ang Ginharian sang Dios. Ginpadala sang Dios si Jesus agod ibantala ang maayong balita sang Ginharian. Ang Ginharian sang Dios amo lamang ang paglaum sang katawhan. Padayon nga ginasugid ini ni Jesus tubtob napatay sia. (Lucas 4:43; 8:1; 23:42, 43) Nagsiling sia nga ibantala man ini sang iya mga sumulunod. Kon may mag-istorya sa imo parte sa Ginharian sang Dios, ano sa banta mo ang iya relihion?—Basaha ang Mateo 24:14.
-
Ang mga sumulunod ni Jesus indi bahin sining malaut nga kalibutan. Makilala mo sila kay wala sila nagapakigbahin sa pulitika ukon sa mga protesta. (Juan 17:16; 18:36) Wala man nila ginailog ang makahalalit nga mga buhat kag panimuot sang kalibutan.—Basaha ang Santiago 4:4.
-
Ang matuod nga mga Cristiano may talalupangdon nga gugma sa isa kag isa. Natun-an nila sa Pulong sang Dios nga respetuhon ang tanan nga tribo sang tawo. Indi pareho sa butig nga mga relihion, wala ginasuportahan sang matuod nga mga sumilimba ang inaway sang mga pungsod. (Miqueas 4:1-4) Sa baylo, ginagamit sang matuod nga mga Cristiano ang ila tion kag pagkabutang para buligan kag palig-unon ang iban.—Basaha ang Juan 13:34, 35; 1 Juan 4:20.
4. Makilala mo bala ang matuod nga relihion?
Ano nga relihion ang nagabase sang tanan nila nga panudlo sa Pulong sang Dios, nagapadungog sa ngalan sang Dios, kag nagabantala sang Ginharian sang Dios subong amo lamang ang paglaum sang katawhan? Ano nga relihion ang nagapakita sing gugma kag wala nagasuporta sa inaway? Ano sa banta mo?—Basaha ang 1 Juan 3:10-12.
