EHONGWA 10
Ove mo yenene vi okutjiwa kutja ongamburiro youatjiri ooiṋe?
1. Ku nongamburiro imwe uriri youatjiri?
“Ṱakamiseye ovaprofete ovanavineya.”—MATEUS 7:15.
Jesus wa honga ovahongewa ve kutja ku nongamburiro imwe uriri youatjiri. Eye we i sasaneka nondjira ndji twara komuinyo waaruhe. Jesus wa tja: “Novehinanḓengu imba mbe i muna.” (Mateus 7:14) Mukuru u yakura omerikotameneno nga zikamena kEmbo re Ombeibela. Ovakriste vatjiri avehe ve nongamburiro imwe.—Lesa Johanes 4:23, 24; 14:6; Ovaefese 4:4, 5.
Tarera OKavidio Hapo Mukuru u yakura omiano ngamwa avihe vyomerikotameneno?
2. Jesus wa tja tjike ohunga nOvakriste vovizeze?
“Owo ve tja ve tjiwa Ndjambi, nungwari ovitjitwa vyawo vi pataṋa otjiṋa hi.”—TITUS 1:16.
Jesus wa rakiza kutja ovaprofete vovizeze mave yekuzunḓa ongamburiro yOukriste. Pendje owo ve munika aayo Ovakriste vatjiri. Ouṋepo wozokereka zawo u ritja Ovakriste. Nungwari ove mo yenene okuvemuna kutja owo tjiri kavongamburiro youatjiri. Omomuano uṋe? Ongamburiro youatjiri uriri ondji nOvakriste mbe novikaṋena novikaro oviwa.—Lesa Mateus 7:13-23.
3. Mo yenene vi okuhaṋa Ovakriste vatjiri ku imba vovizeze?
Tara kovikaṋena vitano mbi Ovakriste vatjiri ku ve tjiukirwa:
-
Ovakriste vatjiri va tenga Ombeibela nu ve i vara otjEmbo raMukuru. Owo ve kondja okuhupa otja komirari vyayo. Okutja ongamburiro youatjiri ya panguka kongamburiro ndji zikamisira ovitjitwa vyayo koumune wovandu. (Mateus 15:7-9) Ovakriste vatjiri ve ṱakamisa imbi mbi ve honga ovandu varwe.—Lesa Johanes 17:17; 2 Timoteus 3:16, 17.
-
Ovakongorere vaJesus vatjiri ve yozika ena raMukuru, Jehova. Jesus wa raisa ondjozikiro kena raMukuru mokuritjiukisa ku varwe. Eye wa vatera ovandu okutjiwa Mukuru neve hongo okukumbira ena raMukuru kutja ri yapurwe. (Mateus 6:9) Ongamburiro iṋe momaturiro woye ndji tjiukisa ena raMukuru?—Lesa Johanes 17:26; Ovaroma 10:13, 14, EEP.
-
Ovakriste vatjiri ve zuvarisa ohunga nOuhona waMukuru. Mukuru wa hinda Jesus me yekuzuvarisa ombuze ombwa yOuhona. Ouhona waMukuru porwawo ombu mau yekuisapo omauzeu wovandu. Jesus aa hungire ohunga nOuhona mbwi nga keyuva ronḓiro ye. (Lukas 4:43; 8:1; 23:42, 43) Eye wa tja ovemukongorere mave zuvarisa ohunga nOuhona mbwi. Indu tji pe ya omundu kove na hungire ohunga nOuhona waMukuru, ove mo mu hakere mongamburiro iṋe?—Lesa Mateus 24:14.
-
Ovakongorere vaJesus kavouye ourunde mbwi. Ove mo ve munine komuano mbu ve hakara norupa moviṋa vyopolitika nozondjakaha mehi. (Johanes 17:16; 18:36) Owo wina kave horere kovitjitwa novikaro ovivi vyouye mbwi.—Lesa Jakobus 4:4.
-
Ovakriste vatjiri va suverasana tjinene. Owo ve rihongera kEmbo raMukuru okuyandja ondengero kovandu vomihoko avihe. Ngunda ozongamburiro zoposyo potuingi aza ri amaze yandja oruvara kovita, Ovakriste vatjiri va panḓa okukara norupa mu vyo. (Mika 4:1-3) Moruveze rwanao, Ovakriste ve ungurisa oruveze nomauini wawo okuvatera nokuzeuparisa varwe.—Lesa Johanes 13:34, 35; 1 Johanes 4:20.
4. Ove mo yenene okuhaṋa ongamburiro youatjiri ku inḓa zoposyo po?
Ongamburiro iṋe ndja zikamisira omahongero wayo kEmbo raMukuru, ndji yozika ena raMukuru, nu ndji zuvarisa Ouhona waMukuru kutja owo porwawo ombu mau kaisapo omauzeu wovandu? Ongamburiro iṋe ndji norusuvero nu ndji ha kara norupa movita? Ove mo tja vi?—Lesa 1 Johanes 3:10-12.
