ƐLĀ Ō NWU ƆMƐ 10
Ɛgɛnyá Nɛ A Lɔfu Jé Ɔwɛ Ō Gba Ɛ̄gbā Nōo Wɛ Ɔkwɛyi A?
1. Ɔwɛ ō gba ɛ̄gbā éyi foofunu wɛ ɔkwɛyi a?
“Aá lɛ ɛlá kwu ācomɛ́ɛbɛ ɛ̄kɛ̄mgbɛ̄.”—UMÁTIYU 7:15.
Ujisɔsi nwu ayikpo ku nu ka ɔwɛ ō gba ɛ̄gbā éyi foofunu wɛ ɔkwɛyi a. Ó ka ɔwɛ ō gba ɛ̄gbā ɔɔma lɛbɛɛka ɔwɛ nōo gē bi ɔcɛ gā oyeeyi opiyoo a. Ujisɔsi ka “Ācɛ . . . ligíí kē í píyɛ” ɔwɛ ɔɔma a. (Umátiyu 7:14) Ɛ̄gbā ō gba nōo cɛtɔha mla Ubáyíbu foofunu nɛ Ɔwɔico gē miyɛ a. Ɛjɛɛji ācɛ nōo gē gba Ɔwɔico ɛgɛ nɛ ó dɔka a gē kpɔtuce ɔdā ekponu.—Jé Ujɔ́ni 4:23, 24; 14:6; Ācɛ Ɛ́fēsɔsi 4:4, 5.
Má uvidio nyā nōo kahinii Does God Accept All Forms of Worship?
2. Ɔdi nɛ Ujisɔsi ka lɛyikwu Ācɛ O Yɛce Ukraist ɛkɛmgbɛ a?
“É gē ka ka aá jé Ɔwɔicō ɔkwɛ̄yi, amáŋ ucē ó yá kú uwa í mafú ka é jé ɔ́ ŋ́.”—UTÁYÍTƆ̄SI 1:16.
Ujisɔsi tɛtɛ le ka taajɛ ka acomɛɛbɛ ɛkɛmgbɛ géē nwu ɛlā nōó yɔ ipu Ubáyíbu ŋ. Ɔdaŋ ku a lɛ uwa má, a géē gbɛla ka é wɛ ācɛ ɔkwɛyi nōo gē gba Ɔwɔico. É gē ka kéē wɛ Ācɛ O Yɛce Ukraist ɔkwɛyi. Amáŋ, ó lɔnɔ ō jé ɔkwɛyi lɛyikwu ɛdɔ ācɛ néē wɛ a ŋ. Ɛgɛnyá nɛ a gáā jé ɛdɔ ācɛ néē wɛ a? Ipu ɛ̄gbā ō gba ku ɔkwɛyi foofunu nɛ a gáā má Ācɛ O Yɛce Ukraist ɔkwɛyi nōo gē ya uce ō lɔhi a.—Jé Umátiyu 7:13-23.
3. Ɛgɛnyá nɛ a gáā jé Ācɛ O Yɛce Ukraist ɔkwɛyi a?
Ɔdā ɛhɔ nyā géē ta uwɔ abɔ ku a jé uwa:
-
Ācɛ O Yɛce Ukraist ɔkwɛyi gē lɛ ojilima ce ɛlā ku Ɔwɔico nōo wɛ Ubáyíbu a. É gē ceyitikwu yɛce aukɔ́ nōo yɔ ipu Ubáyíbu. Ɛnyā mafu ku Ācɛ O Yɛce Ukraist ɔkwɛyi wɛ ɛyɛɛyi gwo Ācɛ O Yɛce Ukraist ɛkɛmgbɛ nōo gē nwu uculo ku alɛɛcɛ a ta. (Umátiyu 15:7-9) Ɔwɛ nɛ Ācɛ O Yɛce Ukraist ɔkwɛyi gē lā oyeeyi ku uwa gē cɛtɔha mla ɔdā néē gē nwu a.—Jé Ujɔ́ni 17:17; 2 Utímōti 3:16, 17.
-
Ācɛ O Yɛce Ukraist ɔkwɛyi gē lɛ ojilima ce iye ku Ɔwɔico nōo wɛ Ujehofa a. Ujisɔsi mafu ka ó lɛ ojilima ce iye ku Ɔwɔico, oŋma lɛ ɛgɛ nɛ ó gē da ācɛ lɛyikwu iye a. Ó ta ācɛ alɛwa abɔ kéē jé Ɔwɔico, ó klla nwu uwa kéē gbɔɔkɔ ku iye ku Ɔwɔico kóō le tiihɔ. (Umátiyu 6:9) Ɛga nɛ a lā a, ɔwɛ ō gba ɛ̄gbā nyá gē nwu ācɛ lɛyikwu iye ku Ɔwɔico a?—Jé Ācɛ Uróm 10:13, 14.
-
Ācɛ O Yɛce Ukraist ɔkwɛyi gē tɔɔna lɛyikwu Ajɔɔcɛ ku Ɔwɔico. Ɔwɔico tu Ujisɔsi ɛhɔ kóō gáā tɔɔna lɛyikwu ɔkoolɔhi ku Ajɔɔcɛ a. Ajɔɔcɛ ku Ɔwɔico foofunu gáā bi unwalu ku alɔ wa oŋmɛyi a. Ujisɔsi tɔɔna lɛyikwu ɔkoolɔhi nyā jaa gbeeko nɛ ó gekwu. (Ulúku 4:43; 8:1; 23:42, 43) Ó ka ācɛ nōo wɛ ayikpo ku anuɔ a géē tɔɔna lɛyikwu ɔkoolɔhi ku Ajɔɔcɛ a duu. Ɔdaŋ ku ɔcɛ gā ɛgiyi uwɔ gáā gbɔɔ ō da uwɔ lɛyikwu Ajɔɔcɛ ku Ɔwɔico, ɔwɛ ō gba ɛ̄gbā nyá nɛ a géē ka ka ɔcɛ ɔɔma ɔɔ ŋma a?—Jé Umátiyu 24:14.
-
Ācɛ O Yɛce Ukraist Ɔkwɛyi i gē lɛ abɔ ipu ɛlā ɛcɛ obɔbi nyā ŋ. A lɔfu jé Ācɛ O Yɛce Ukraist ɔkwɛyi ohigbu ka é gē lɛ abɔ ipu ɛlā imeli amāŋ ipu unwalu ku ɛcɛ nyā ŋ. (Ujɔ́ni 17:16; 18:36) É kē i ya uce obɔbi ɛyɛɛyɛyi nɛ ācɛ ku ɛcɛ gē ya a ŋ.—Jé Ujɛ́mīsi 4:4.
-
Ācɛ O Yɛce Ukraist ɔkwɛyi gē lɛ ihɔtu ɔkwɛyi lɛ iyi uwa. Ubáyíbu gē nwu uwa ɛgɛ néē géē lɛ ojilima ce oduudu ācɛ nōo ŋma éwo ɛyɛɛyɛyi a. Ācɛ ō gba ɛ̄gbā ɛkɛmgbɛ humayi lɛ abɔ ipu ɛfú ō kpo ku ɛcɛ nyā, amáŋ, ācɛ ō gba ɛ̄gbā ɔkwɛyi a i gē lɛ abɔ ipu nu. (Umáyíka 4:1-3) Ikɔkɔ nɛ Ācɛ O Yɛce Ukraist ɔkwɛyi géē nyɔ i kpɛfu a, é gē bi eko mla aɔdā néē lɛ a le ta ācɛ ɔhá abɔ. É gē dɔka olɔhi ku iyi uwa foofunu ŋ.—Jé Ujɔ́ni 13:34, 35; 1 Ujɔ́ni 4:20.
4. Anyɛ wɛ ācɛ nōo gē gba ɛ̄gbā ku ɔkwɛyi a?
Ɔwɛ ō gba ɛ̄gbā nyá nɛ ɛjɛɛji ɛlā néē gē nwu a gē ŋma ipu Ubáyíbu a? Ɔwɛ ō gba ɛ̄gbā nyá gē lɛ ojilima ce iye ku Ɔwɔico, klla gē da ācɛ ku Ajɔɔcɛ ku Ɔwɔico foofunu gáā bi unwalu ku alɔ wa oŋmɛyi a? Anyɛ wɛ ācɛ nōo yihɔtu iyi uwa, néē klla gē lɛ abɔ ipu ɛfú ō kpo ŋ ma? Anyɛ nɛ a gbɛla kē wɛ a?—Jé 1 Ujɔ́ni 3:10-12.
