ILUẸMHIN 10
Buwẹ Arẹ Lẹn Uwedẹ Oga Ọsi Ẹmhọn-ata Yẹ?
1. Oga ọsi ẹmhọn-ata ukpọkpa ribhọ?
‘Bha ha babegbe, ranmhude enin ohẹn akhasẹ ọsi ohoghe.’—MATTHEW 7:15.
Uwedẹ oga ọkpa Jesu man ene rẹkhanlẹn ele. Ọnan oga ọsi ẹmhọn-ata. Ọle uwedẹ nọn arẹ mhan sẹbhi aribhọ ọsi ighegheghe. Jesu tale ghe ‘ikpeta ẹbho’ rẹkhan ọnin uwedẹ. (Matthew 7:14) Oga nọn rẹkhan ebi Baibo tale, ọle ọkpa yẹẹ Osẹnobulua. Urẹọbhọ ọkpa ku ene ga oga ẹmhọn-ata rebhe kugbe.—Tie John 4:23, 24; 14:6; Ephesians 4:4, 5.
Ghe ọne ividio Oga Rebhe Osẹnobulua Miẹn Ọbhi Egbe?
2. Bi Jesu tale rẹji ene ga oga ohoghe?
‘Etale ghe ele lẹn Osẹnobulua, iwẹnna nọnsele rẹman ebha lẹn ọle.’—TITUS 1:16
IJesu ka tale ghe ene ga oga ohoghe dẹ kpọa. Ele ki man diabi ene ga oga ẹmhọn-ata. Otuẹ nọnsi ele ki ha tale ghe, iJesu ele rẹkhan. Uwẹ dẹ sabọ lẹn eria nele gene khin. Buwẹ arẹ lẹn yẹ? Uwẹ dẹ lẹnmhin, ranmhude ene gene rẹkhan Jesu bhọsi ẹmhọn-ata mhọn ikpẹ ne mhẹn nan rẹ lẹn ele.—Tie Matthew 7:13-23.
3. Buwẹ arẹ sabọ lẹn ene ga oga ẹmhọn-ata yẹ?
Zilo nyan enin iyaman isẹn nan:
-
Ene ga oga ẹmhọn-ata muekpẹn nin Baibo, Ọta nọnsi Osẹnobulua. Ele dọnmhegbe ne rẹ lu rẹkhan ebi Baibo ta. Bhiriọ, oga ẹmhọn-ata bha diabi oga ne ri iman-emhin ọsi eria rẹ ga. (Matthew 15:7-9) Ene ga Osẹnobulua ọsi ẹmhọn-ata lu rẹkhan ebi ele man.—Tie John 17:17; 2 Timothy 3:16, 17.
-
Ele muekpẹn nin Elin nọnsi Osẹnobulua, Jehova. Jesu muekpẹn nin elin nọnsi Osẹnobulua, ọlezẹle nọnle da ha taman ẹbho ọnin elin. Ọda rẹkpa ele rẹ lẹn Osẹnobulua. Ọda yẹ taman ele ne ha nan erọnmhọn, nan kpe elin nọnsi Osẹnobulua khia. (Matthew 6:9) Otu oga nea bhọ taman ẹbho elin nọnsi Osẹnobulua bhi eji uwẹ ye?—Tie John 17:26; Romans 10:13, 14.
-
Ele tẹmhọn Agbejele nọnsi Osẹnobulua. Osẹnobulua ji Jesu vae bhi ọnin otọ nan, nọn dọ ta ọta nọn mhẹn ọsi Agbejele. Agbejele nọnsi Osẹnobulua, ọle ọkpa iruduba nọn sẹmhan. Jesu wọ tale rẹsi ukpẹdẹ nọnle yu. (Luke 4:43; 8:1; 23:42, 43) Ọda tale ghe ene rẹkhan lẹn rebhe dẹ yẹ tẹmhọn ọnin Agbejele. Ahamiẹn eria bu ẹ re dọ tẹmhọn Agbejele, otu oga nea uwẹ riale ele khin?—Tie Matthew 24:14.
-
Ele i ribhọ ibo ọsi ọnin agbọn nan. Uwẹ dẹ lẹn ele ranmhude ele i mhọn obọ bhi ilọnmhọn efinẹfi bi ozughu. (John 17:16; 18:36) Ele i deba bhi unyẹnmhin ebe bi iria eria nọn bha gba ọsi ọnan agbọn nan.—Tie James 4:4.
-
Ele mhọn ahoẹmhọn-egbe ọsi ẹjẹje bhi ẹwẹ ele. Ele muekpẹn nin agba-ẹbho rebhe, ranmhude iriọ ele luẹ bhi ẹkẹ Baibo. Arẹmiẹn ene ga oga ohoghe deba okhọn ọsi ọnin agbọn nan, ene ga oga ẹmhọn-ata imhọn obọ bhọ. (Micah 4:1-3) Ene ga oga ẹmhọn-ata noo ẹghe bi emhin nele mhọn rẹ re izebhudu bi umiẹnkpa nin ẹbho ebhebhe.—Tie John 13:34, 35; 1 John 4:20.
4. Uwẹ ki sabọ lẹn oga ẹmhọn-ata nian?
Otu oga ne bhọ iman-emhin nesele rebhe ribhi ẹkẹ Baibo, ne muekpẹn nin elin nọnsi Osẹnobulua, ne taman ẹbho ghe Agbejele nọnsi Osẹnobulua, ọle iruduba nin mhan mhọn? Otu oga ne bhọ mhọn ahoẹmhọn-egbe ẹjẹje, nei deba okhọn ọsi ọnin agbọn nan? Buwẹ riale yẹ?—Tie 1 John 3:10-12.
