ITHOMO RĨA 10
Ũngĩkũũrana Ũthathaiya wa Ma Atĩa?
1. Hihi ndini ya ma no ĩmwe?
“Mwĩhũgagei anabii a maheeni.”—MATHAYO 7:15.
Jesu aarutire arũmĩrĩri ake ndini o ĩmwe tu, ndini ĩrĩa ya ma. Ĩtariĩ ta barabara yerekeire muoyo-inĩ wa tene na tene. Jesu ooigire atĩrĩ: “Arĩa mamĩonaga nĩ anini.” (Mathayo 7:14) Ngai etĩkagĩra ũthathaiya ũrĩa tu ũtongoragio nĩ Kiugo gĩake kĩa ma. Athathaiya othe a ma makoragwo na wĩtĩkio ũmwe.—Thoma Johana 4:23, 24; 14:6; Aefeso 4:4, 5.
Wĩrorere video ya Hihi Ngai Etĩkagĩra Ũthathaiya O Wothe?
2. Jesu ooigire atĩa ũhoro-inĩ wĩgiĩ Akristiano a maheeni?
“Moimbũraga mbere ya andũ atĩ nĩ moĩ Ngai, ĩndĩ nĩ mamũkaanaga kũgerera ciĩko ciao.”—TITO 1:16.
Jesu nĩ aarutire mũkaana atĩ anabii a maheeni nĩ mangĩgathũkia Ũkristiano. Monekaga ta arĩ athathaiya a ma. Moigaga atĩ makanitha mao nĩ ma Gĩkristiano. Ĩndĩ no ũhote gũkũũrana andũ ta acio ũrĩa matariĩ kũna. Na njĩra ĩrĩkũ? No ũthathaiya wa ma wiki ũkoragwo na Akristiano matarĩ na ũhinga na marĩ na ngumo na mĩthiĩre ĩrĩa yagĩrĩire.—Thoma Mathayo 7:13-23.
3. Ũngĩkũũrana athathaiya a ma atĩa?
Wĩcirie ũhoro wa marũũri maya matano mangĩgũteithia kũmakũũrana:
-
Athathaiya a ma nĩ matĩĩte Bibilia ĩrĩ Kiugo kĩa Ngai. Merutanagĩria gũtũũra kũringana na motaaro mayo. Kwoguo ndini ya ma nĩ ngũrani na ndini iria itongoragio nĩ morutani ma andũ. (Mathayo 15:7-9) Athathaiya a ma matũũraga kũringana na ũrĩa marutanaga.—Thoma Johana 17:17; 2 Timotheo 3:16, 17.
-
Arũmĩrĩri a ma a Jesu nĩ matĩĩte rĩĩtwa rĩa Ngai, Jehova. Jesu nĩ aatĩĩte rĩĩtwa rĩa Ngai na njĩra ya kũrĩmenyithania. Nĩ aateithirie andũ kũmenya Ngai na akĩmaruta mahoyage rĩĩtwa rĩa Ngai rĩtherio. (Mathayo 6:9) Kũrĩa ũikaraga-rĩ, nĩ ndini ĩrĩkũ ĩmenyithagia andũ rĩĩtwa rĩa Ngai?—Thoma Johana 17:26; Aroma 10:13, 14.
-
Akristiano a ma mahunjagia ũhoro wa Ũthamaki wa Ngai. Ngai aatũmĩte Jesu nĩguo ahunjie ũhoro ũrĩa mwega wa Ũthamaki. Ũthamaki wa Ngai wiki noguo mwĩhoko wa andũ. Jesu aathiire na mbere kwaria ũhoro waguo o nginya mũthenya ũrĩa aakuire. (Luka 4:43; 8:1; 23:42, 43) Ooigire atĩ arũmĩrĩri ake nĩ mangĩkahunjia ũhoro waguo. Mũndũ angĩũka gũkũhunjĩria ũhoro wa Ũthamaki wa Ngai-rĩ, ũngĩĩciria nĩ wa ndini ĩrĩkũ?—Thoma Mathayo 24:14.
-
Arũmĩrĩri a Jesu makoragwo meyamũranĩtie na thĩ ĩno njũru. No ũmakũũrane tondũ o matiĩingĩragia maũndũ-inĩ ma ũteti kana ngũĩ cia mũingĩ. (Johana 17:16; 18:36) Ningĩ, matirũmagĩrĩra mĩtugo na mĩerekera mĩũru ya thĩ.—Thoma Jakubu 4:4.
-
Akristiano a ma makoragwo mendanĩte mũno. Marutĩtwo nĩ Kiugo kĩa Ngai gũtĩa andũ a ndũrĩrĩ ciothe. O na gũtuĩka ndini cia maheeni nĩ ciĩrutagĩra mũno harĩ kũnyita mbaru mbaara cia ndũrĩrĩ, athathaiya a ma matiĩkaga ũguo. (Mika 4:1-3) Ithenya rĩa ũguo, Akristiano a ma mahũthagĩra mahinda na indo ciao matarĩ na mwĩyendo gũteithia na gwĩkĩra andũ ngoro.—Thoma Johana 13:34, 35; 1 Johana 4:20.
4. Hihi no ũhote gũkũũrana ndini ĩrĩa ya ma?
Nĩ ndini ĩrĩkũ morutani mayo mothe matongoragio nĩ Kiugo kĩa Ngai, ĩgatĩĩa rĩĩtwa rĩa Ngai, na ĩkahunjia Ũthamaki wa Ngai arĩ guo mwĩhoko tu wa andũ? Nĩ gĩkundi kĩrĩkũ gĩkoragwo na wendo na nĩ gĩĩthemaga mbaara? Ũkuona atĩa?—Thoma 1 Johana 3:10-12.
