BUŊGƐI 10
Vɛɛ Ŋ Looku Yɛ Piɛile Tonyaleŋ Sina?
1. Baa piɛile tonyaleŋ le pilɛ kpe le cho ni?
‘La mandaŋ a wanaa balu dimioo aa wanaa Mɛlɛkaa nda cho ni.—MAATIU 7:15.
A piɛile tonyaleŋ le pilɛ kpe okɔɔ Chiisu pɛɛku buɛiyaa nduaa ni. Piɛile tonyaleŋ le cho ko maa nɛi yaa num o yoomu fafɛɛŋndo niŋndo. Mi Chiisu dimi aa, “Wanaa kua loŋ nda a cho a bɔɔ le.” (Maatiu 7:14) Piɛile pɛɛku tonya cho o Diom Mɛlɛkaa niŋndo kinɛi Mɛlɛka chɛl ni. Kilisiɔŋaa tonyaa kpou a cho o diompilɛ niŋ o laalaŋ ndaa choo.—Nuawɔ Chɔŋ 4:23, 24; 14:6; Ɛfisiaŋnda 4:4, 5.
Tofa vidueiyo Baa piɛile tonyaleŋ lepilɛ kpe le cho ni?
2. Yɛɛ Chiisu dimi yɛ a Kilisiɔŋaa lachoowaa okɔɔ?
“Waŋnda haa dimi maa Mɛlɛka nda cho piɛiyo ni. Kɛ, sɔɔŋ nda tosa woŋ ŋ chɔm maa a cho Mɛlɛka piɛi le.”—TAITƆƆ 1:16.
Mi Chiisu sila maa waŋnda huŋ niŋ a sondola yeelɛilaŋ ma nɔɔliaa kunda leKilisiɔŋndo. Wana che nda pɛ o kaaŋii ndɛi niŋ aa Kilisiɔŋaa tonyaa nda cho ni. Kɛ o kelala ndalaŋ nya looku niŋ nda sina ni. Vɛɛ hei yɔŋnuŋ yɛ? Piɛile tonyaleŋ koni le kuam Kilisiɔŋaa tonyaa ni. Nduyɛ a kaala ndalaŋ ŋ looku ni ma sina nda.—Nuawɔ Maatiu 7:13-23, NW.
3. Vɛɛ ŋ looku yɛ ma sina Kilisiɔŋaa tonyaa?
Tofawɔ nɛilaŋ la ŋuɛɛnu:
-
Kilisiɔŋaa tonyaa nɔ bɛɛleŋ le Baabuiyo. Sawala Baabuiyo nda tual kɔɔli lɔɔlɔɔ ni. Lelaŋ, piɛile tonyaleŋ le choŋnuŋ teŋgeŋ. Le cho maa piɛile pɛɛku yiyaŋnda wanachioo laŋ te. (Maatiu 15:7-9) Kilisiɔŋaa tonyaa pɛɛku pɛ nyɛ cho o Baabuiyo niŋndo, a mɛi nyɛ nda pɛɛku koŋndo ma kɔ tosa nyɛ cheleŋ te.—Nuawɔ Chɔŋ 17:17; Timoti Diiŋ Ndɔɔ 3:16, 17.
-
Buɛiyaa kpeekpeiyaa Chiisuaa ke diola Mɛlɛkalaŋ Bɛɛleŋ, Chɛhowa. Mi Chiisu ke diola Mɛlɛkalaŋ bɛɛleŋ, nduyɛ mbo tosa mi waŋnda sina laŋ. Mbo mala waŋnda ma sina Mɛlɛka, nduyɛ mbo pɛɛku nda maa a piɛi mi diola Mɛlɛkalaŋ la dendu. (Maatiu 6:9, NW) Naa num cho ichali wa, nɛɛ yaa soliŋ yɛ diola Mɛlɛkalaŋ kpeku?—Nuawɔ Chɔŋ 17:26; Luomaŋnda 10:13, 14, NW.
-
Kilisiɔŋaa tonyaa dimi yooŋgu kɛndɔɔ a Masale Mɛlɛkaleŋ okɔɔ. Mi Mɛlɛka viam Chiisu o lɛŋndeŋ choo le yooŋgu kɛndɔɔ dimioo a Masale ndɔleŋ okɔɔ. Masale Mɛlɛkaleŋ kinɛi cho tiindaŋ wanachioo ni. Chiisu lo suɛi a Masale leŋ tei mbo wu. (Luku 4:43; 8:1) Mbo dimi vɛlɛ maa buɛiyaa nduaa cho yooŋgoo hoo dimi. Te o yɔŋ pɛ mi waŋndo hiŋ suɛi o numndo a Masale Mɛlɛkaleŋ okɔɔ, o piɛile kuɛɛ niŋ ŋ yiyaŋ yɛ maa wana koŋ cho.—Nuawɔ Maatiu 24:14.
-
Buɛiyaa Chiisuaa cho le chieeŋndo hoo le. Mɛɛ ŋ looku nda sinapɛŋgu yɛ cho hoo ni. A wou laba o chɔulaba lemasa chieeŋndo hoo niŋ te. Nduyɛ a sim sɔŋga le lemasa le. (Chɔŋ 17:16; 18:36) Bala ndala cho vɛlɛ o sɔɔŋ wɔɔŋ cho o chieeŋndo hoo niŋndoŋ te.—Nuawɔ Chemisi 4:4.
-
Kilisiɔŋaa tonyaa nɔ kaalaa le opilɛ a o cheleŋndo. A nɔ bɛɛleŋ le kaalaŋ kpou a mɛɛ nda pɛɛku o Diom Mɛlɛkaa niŋ yɛ. Mi wanaa cho o piɛile lachoowaleŋ niŋnda wou balaŋ o chɔulaŋ niŋ. Kɛ Kilisiɔŋaa tonyaa nda tosa keŋ te. (Makal 4:1-3) Kilisiɔŋaa tonyaa nda, ma soliŋ teleŋ ndaa kpeku vɛlɛ a nyɛm nda nɔ woŋ le acheleŋnda malaa vɛlɛ a nda kɔltaŋ dɛɛniaa.—Nuawɔ Chɔŋ 13:34, 35; Chɔŋ Tasoo 4:20.
4. A sina pa piɛile tonyaleŋ pɛŋgu?
Piɛle kuɛɛ soliŋ yɛ Diom Mɛlɛkaaa kpeku le pɛɛkoo, le diola Mɛlɛkalaŋ bɛɛleŋ kioo, vɛlɛ a suɛi a Masale Mɛlɛkaleŋ okɔɔ maa leŋ koni le cho tiindaŋ wanachioo ni? Kunda leKilisiɔŋ kuɛɛ nɔ yɛ kaalaa le acheleŋnda nduyɛ a wou laba o chɔu niŋ te? O yiyaŋ numndo niŋ, kunda kuɛɛ ŋ chɔm yɛ?—Nuawɔ Chɔŋ Tasoo 3:10-12.
