MURU 10
N’nga Ipembezo Yaimbarimbari Ninaiiziwe Avi?
1. N’nga ikhalavo ipembezo imo-i yaimbarimbari?
“Wenjelani na anamawongela onama.” — MATEYU 7:15.
Yesu oofunji-a o-arelaye ipembezo imo-i baa-i yaimbarimbari, Yeneyo ili nga ndhila imo-i yodowana wuingumi yo-omala. Yesu eere: “athu kanafwanya ndhila yenela mboyeva.” (Mateyu 7:14) Mulungu unosomedela lambela wewo unafwanyeya m’mazwaye aimbarimbari Bayibulo. Athu ethene anayo kanamulambela mu imbarimbari kanaroromela vimo-ive. — Welengani Yohani 4:23, 24; 14:6; Aifeso 4:4, 5.
2. N’nga Yesu awongile n’ni vya Akiristu onama?
“Aluwa kanowonga vowela ira komuiziwa Mulungu, mbwenye kanomukhoonda na vyoira vyiwa.” — TITO 1:16.
Yesu oowonga vya Akiristu onama ira kanerenga olocha athu. Undhe, aluwa kanawoneya n’nga Akiristu aimbarimbari. Aluwa kanaroromela ira vipembezo viwa pi vyoona. Mbwenye pi vyowandheya iziwa ira aluwa kai Akiristu aimbarimbari. Mwasiwa n’ngwanni? Mwasiwa ngoi chi ipembezo yaimbarimbari baa-i yeneyo Akiristuwa kanathonyi-eda makhalelo apama na vyoira viwa. Mbo-orucha iziweya na athu. — Welengani Mateyu 7:13-23.
3. N’nga munaaiziwe avi Akiristu aimbarimbari?
Onani makhalelo mathanu o-arelala:
-
Athu olambela aimbarimbari kanorii-eda Bayibulo n’nga mazu a Mulungu. Aluwa kanovilimbi-eda arela makhundo a Mbayibulo va dambo na dambo. Moi eeno, ipembezo yaimbarimbari cho-iyana vanjinji na vipembezo vyonama vyevyo vina-arela maumbuwelelo aathu. (Mateyu 15:7-9) Olambela aimbarimbari kanovilimbi-eda arela vinafunji-aathu. — Welengani Yohani 17:17; 2 Timoteyu 3:16, 17.
-
O-arela aimbarimbari a Yesu kanolirii-eda zina la Mulungu, Yehova. Yesu olirii-eda zina la Mulungu voiri-a athu liiziwa. Liye oowakhami-eda athu muiziwa Mulungu thetho oowafunji-a pepela ira zina la Mulungu licheni-iwe. (Mateyu 6:9) Utatamoni winyu chi ipembezo iivi yeneyo inalaleela zina la Mulungu? — Welengani Yohani 17:26; Aroma 10:13, 14.
-
Akiristu a imbarimbari kanolaleela vya Umwene wa Mulungu. Yesu arumiwe na Babae ira aze alaleye Milanyo daphama da Umwene. Umwene wa Mulungu ngonoyo unaniva-e idedi-edo yaphama. Yesu oonga vya Umwene unola fiyeda dambo lakhwide liye. (Luka 4:43; 8:1; 23:42, 43) Liye eere o-arelaye kerenga laleela vya Umwene. Muthu aza waninyu awonganga na nyo vya Umwene wa Mulungu, munawonge ira ngwa ipembezo iivi? — Welengani Mateyu 24:14.
-
O-arela a Yesu katinavolowela mu vyoireya vya ilambo yothakalela. Munoandha aiziwa vowawona ira aluwa Katinavolowela politika na Khondo da ilambo (Yohani 17:16; 18:36) Moi eeno katina-arela makhalelo na vyoireya vyowononga ingumi vya ilambwela. — Welengani Yakobo 4:4.
-
Akiristu aimbarimbari kanothonyi-edana zivelo la imbarimbari. Aluwa koofunjeda m’mazu a Mulungu rii-eda athu ethene. Vipembezo vyonama thawi dinjinji vinokami-eda wana khondo, mbwenye anamalabela aimbarimbari kanokoonda irana vyevyi. (Mika 4:1-3) Mo-iyana na aluwa, Akiristu aimbarimbari kanolambi-eda chito thawiwa na vyongo vinnaathu mofwaneelela ira kaakhami-e athu amo-i. — Welengani Yohani 13:34, 35; 1 Yohani 4:20.
4. N’nga munowanda iziwa ipembezo yaimbarimbari?
Chi ipembezo iivi inafunji-a no arela mazu a Mbayibulo, kanarii-eda zina la Mulungu no laleela vya Umwene unoyo unava-a idedi-edo waathu? Thi gulu liivi laathu lelo linathoonyi-edana zivelo thetho katinavivolochi-a mu khondoni? Munona avi? — Welengani 1 Yohani 3:10-12.
