Isambililo 10
Kani mungeshiba shani abapempela muli bucine?
“Cenjeleni ku bakushimika abakutumpaika.”—MATAYO 7:15.
“Balalabila ati tulibeshibile baLesa; sombi ku milimo yabo balabakana.”—TITO 1:16.
1. Kani kuli lukoso ukupempela kwa cine kumo?
BaYesu balisambishe abasambile babo ukupempela kwa cine kumo lukoso. Kuli koti ni nshila iitwala ku mweo wa muyayaya. BaYesu balilabiile ati: ‘Abace ebaibona’ inshile’yo. (Matayo 7:14) BaLesa balasumina lukoso ukupempela ukupyungisha ifisangwa mu Mashiwi abo, Baibolo. Bonse abali mu kupempela kwa cine balikwete ulucetekelo lumo.—Pendeni Yoane 4:23, 24; 14:6; AbaEfesa 4:4, 5.
2. Kani findo baYesu balabiile pa baKlistu ba bufi?
BaYesu balicenjeshe ati abakushimika abakutumpaika bakabifya ubuKlistu. Mu kuboneka kwabo, balaboneka koti balapempela ifya cine. Balalabila ati amacalici abo abuKlistu. Pano abo bantu muli bucine mungabeshiba. Mungabeshiba shani? Ukupempela kwa cine kwenka lukoso e kukwete abaKlistu ba cinenene abeshibikiilwe ku mibelo yabo na fyefyo bacita.—Pendeni Matayo 7:13-23.
3. Kani mungeshiba shani abapempela muli bucine?
Langulukeni ifi ifyakwishibilako fisanu:
AbaKlistu bacine balacindika Baibolo ati Mashiwi abaLesa. Balesha makosa ukucite’fintu koti ni fyefyo amafunde amu Baibolo alabila. Namulifyefyo, ukupempela kwa cine kulipusene ne kupempela ukusambisha ubusambishi bwa mafunde abantunshi. (Matayo 15:7-9) AbaKlistu bacine balacita koti ni fyopele’fyo ifi basambisha.—Pendeni Yoane 17:17; 2 Timote 3:16, 17.
Abasambile bacine aba baYesu balacindika ishina lya baLesa, Yehova. BaYesu balicindikile ishina lya baLesa ili balishibishe ku bantu. Balyofweleshe abantu ukwishiba baLesa kabili balibasambishe ukulukutembela ati ishina lya baLesa licindikwe. (Matayo 6:9) Uku mwikala, kani ni kwisa ukupempela ukutulisha pe shina lya baLesa?—Pendeni Yoane 17:26; AbaLoma 10:13, 14.
AbaKlistu bacine balatulisha pa Bufumu bwa baLesa. BaLesa baalitumine baYesu mu kutulisha icebo iciweme pa Bufumu. Ubufumu bwa baLesa e bukashilisha amakatasho abantunshi. BaYesu balipitilishe ukutulisha pa Bufumu mpaka ne kasuba bafwile. (Luku 4:43; 8:1; 23:42, 43) Balilabiile ati abasambile babo bakalukutulisha pa Bufumu. Kani umuntu aisa mu kulabila kuli mwebo pa Bufumu bwa baLesa, mungalanguluka ati ni kwisa uku apempela?—Pendeni Matayo 24:14.
Abasambile ba baYesu tabali ba pa calo ca panshi. Mungabeshiba ni pakuti tabalibiikamo mu mapolitiki na muli fimbi ifyakupikishanya ifya mu calo. (Yoane 17:16; 18:36) Nakabili, tabalondapo imibelo na fimbi ifintu ifibipile ificitwa mu calo.—Pendeni Jakobo 4:4.
AbaKlistu bacine balitemwanshenye ukwakuti. Amashiwi abaLesa alabasambisha ukulemya abantu aba mishobo yonse. Nangaba ati ukupempela kwa bufi kulofwelesha makosa inkondo, abapempela muli bucine balakaana ukucite’fyo. (Mika 4:1-3) Lomba, abaKlistu bacine balapyungisha impindi na fyefyo bakwete ukofweleshako ne kukoselesha bambi.—Pendeni Yoane 13:34, 35; 1 Yoane 4:20.
4. Kani mungakwishiba ukupempela kwa cine?
Kani ni kwisa ukupempela ukusambisha ifisambisho fya mu Mashiwi abaLesa, ukucindika ishina lya baLesa, kabili ukutulisha pa Bufumu bwa baLesa ati e bwenka lukoso ubukashilisha amakatasho abantunshi? Ni lisa ibumba ilitemwanshenye kabili ili talilibikamo mu nkondo? Kani mulukulanguluka ati ni bani?—Pendeni 1 Yoane 3:10-12.
