SOMO MAR 10
Ere Kaka Inyalo Fwenyo Din Madier?
1. Be nitie mana din achiel kende madier?
“Tang’uru gi jonabi mag miriambo.”—MATHAYO 7:15.
Yesu ne opuonjo jolupne mana din achiel kende madier. Ipime gi yo ma dhi e ngima mochwere. Yesu nowacho niya: “Ji manok e ma nwang’e.” (Mathayo 7:14) Nyasaye oyie mana gi din ma tiyo gi Wachne ma en Muma. Jokristo duto madier nigi yie achiel.—Som Johana 4:23, 24; 14:6; Jo-Efeso 4:4, 5.
Ne vidioni: Be Nyasaye Oyie gi Dinde Duto?
2. Ang’o ma Yesu ne owacho e wi Jokristo mag miriambo?
“Gihulo e lela ni ging’eyo Nyasaye to koni gikwede kuom timbegi.”—TITO 1:16.
Yesu nochiwo siem ni jonabi mag miriambo ne dhi ketho din madier mar Jokristo. Ginenore gi oko ka gima gin e din madier. Giwacho ni gin Jokristo. Kata kamano, kitgi nyiso ni ok gin Jokristo madier. E yo mane? Din madier kende e ma konyo ji mondo gibed Jokristo madier kendo kitgi kod timbegi oluwre gi puonj mag Muma.—Som Mathayo 7:13-23.
3. Inyalo fwenyo nade joma ni e din madier?
Ne ane gik moko abich minyalo fwenyogigo:
-
Joma ni e din madier kawo Muma kaka Wach Nyasaye. Gitemo dak ka luwore gi puonj mag Muma. Omiyo, din madier opogore gi dinde ma puonjgi gin mana paro mag dhano. (Mathayo 15:7-9) Joma ni e din madier ok tim mopogore gi kaka gipuonjo.—Som Johana 17:17; 2 Timotheo 3:16, 17.
-
Jolup Yesu madier miyo nying Nyasaye luor.Yesu nomiyo nyin g Nyasaye luor kuom lando nyingno. Ne okonyo ji ng’eyo Nyasaye kendo ne opuonjogi lemo ni mondo nying Nyasaye obed maler. (Mathayo 6:9) En din mane ma lando nying Nyasaye e alworau?—Som Johana 17:26; Jo-Rumi 10:13, 14.
-
Jokristo madier lando wach Pinyruodh Nyasaye. Nyasaye ne ooro Yesu mondo oland wach maber mar Pinyruoth. Pinyruodh Nyasaye kende e ma dhano nyalo geno. Yesu ne olando wach pinyruoth nyaka thone. (Luka 4:43; 8:1; 23:42, 43) Ne owacho ni jolupne ne dhi lando wach pinyruodhno. Ka po ni ng’ato ochako wuoyo kodi e wi Pinyruodh Nyasaye, inyalo wacho ni en jadin mane?—Som Mathayo 24:14.
-
Jolup Yesu ok gin mag pinyni. Inyalo fwenyogi nikech ok gidonjre e weche mag siasa kod ywaruok mag ogendni. (Johana 17:16; 18:36) Bende, ok gidonjre e paro kod yore maricho ma hinyo ji.—Som Jakobo 4:4.
-
Jokristo madier nigi hera madier e kindgi. Wach Nyasaye puonjogi kaka ginyalo miyo ogendni mamoko luor. Kata obedo ni dinde mag miriambo osebedo ka riwo lwedo lwenje mag ogendni, joma ni e din madier to ok tim kamano. (Mika 4:1-3) Kar mano, Jokristo madier tiyo gi kinde kod mwandugi e konyo kendo jiwo jomoko.—Som Johana 13:34, 35; 1 Johana 4:20.
4. Be inyalo fwenyo din madier?
En din mane ma puonjge duto otenore kuom Wach Nyasaye, ma miyo nying Nyasaye luor, kendo ma lando ni Pinyruodh Nyasaye kende e ma dhano nyalo geno? Gin jomage ma jiwo hera kendo kwedo lweny? Inyalo dwoko nade?—Som 1 Johana 3:10-12.
