XORꞸ 10
¿Pje ma relijion kjaa kʼo mama ne Biblia?
1. ¿Janzi relijion kjaji kʼo na kjuana?
“Kjapꞹji na joji [...] pero amboo o mꞹbʼꞹji me na sʼoji [...]. Ngekʼua ri pjotpꞹji nguenrrakʼo.” (MATEO 7:15)
E Jesús o jichi o disipulo na relijion kʼꞹ ma kjuana. E Jesús go mama: “Dya punkjꞹ kʼo tøtrʼꞹ kʼe ngoxtrʼi kʼꞹ rgi moji kʼe ñiji” (Mateo 7:14). Nudyo paadya, bʼꞹbʼꞹ dʼatrjo relijion kʼꞹ mimi kʼua ja ba mama e Jesucristo ñe kjaji jaga mama o Jñaa e Mizhokjimi. Xorꞹge kja Juan 4:23, 24; 14:6.
Jñanrra ne video ¿Aprueba Dios todas las religiones?
2. ¿Pje go mama e Jesús ro tsjaa kʼe relijion kʼꞹ dya kjuana?
“Mama kʼo xopꞹnte kʼꞹ pa̱ra̱ji Mizhokjimi. Pero kʼꞹ ni tsjaji na sʼoo, ixi ñetsʼe kʼꞹ dya pa̱ra̱ji.” (TITO 1:16)
E Jesús go mama ro bʼꞹbʼꞹ ntee kʼꞹ dya ro jizhiji kʼo na kjuana kʼo mama kja ne Biblia. Manji ke o relijion na kjuana, eñe kjaji kʼo mama e Palesito ajensʼe, pero dya ga kjuanakʼo. ¿Jargi pa̱ra̱ kjo nge kʼo bʼemi na kjaji kʼꞹ janzi bo mama e Jesús? Kʼo bʼꞹbʼꞹ kja kʼe relijion kʼꞹ na kjuana mimiji ñe kjaji jaga mama ne Biblia. Xorꞹge kja Mateo 7:14-23.
3. ¿Pje ma relijion kjaji janzi ba mama e Jesús?
Ra nuji pje kjaa yo ntee kʼo bʼemi mimiji kʼua ja ba mama e Jesús:
-
Kjaji kʼo mama o Jñaa e Mizhokjimi. Kʼe relijion kʼꞹ na kjuana dya kjaji jaga neji angezeji, kjaji kʼo mama ne Biblia (Mateo 15:7-9). Angezeji jichiji yo ntee ra mimiji jaga mama ne Biblia. Xorꞹge kja Juan 17:17; 2 Timoteo 3:16, 17.
-
Kʼe relijion kʼꞹ kjaa kʼo na kjuana jichi yo ntee pje ni chju̱u̱ e Mizhokjimi. E Jesús mi xipji yo ntee pje ni chju̱u̱ e Mizhokjimi ñe jaga kjaa angeze. E Jesús mi nee ke yo ntee ro mba̱ra̱ji pje ni chju̱u̱ e Jehová ngekʼua go jichi ro dyøtꞹjikʼꞹ ma ro tsjaji orasion (Mateo 6:9, TNM). Nuja i̱ menzumꞹge, ¿pje ma ntee poji kja o ngumꞹ yo ntee ñe jichiji pje ni chju̱u̱ e Mizhokjimi? Xorꞹge kja Juan 17:26, NTD; Romanos 10:13, 14.
-
Kʼo na kjuana kjaji kʼo go mama e Jesús jichiji yo ntee pje ngeje o Reino e Mizhokjimi. E Palesito ajensʼe o nrrⱥjⱥ o trʼii kja ne Xoñijomꞹ ro ne̱e̱ jichi yo ntee pje ra tsjaa o Reino e Mizhokjimi ñe jango rga mbøsʼꞹ yo ntee. E Jesús o tsjaakʼo asta kʼe paa ma go mbotrʼꞹji (Lucas 4:43; 8:1, TNM; 23:42, 43, TNM). E Jesús go xipji o disipulo ke ro jichiji yo ntee jaga kjaa o Reino e Mizhokjimi kʼua jaba tsjaa angeze. ¿Pje i̱ jñanrrage, kjo ngeje kʼo jichiji yo ntee pje nge o Reino e Mizhokjimi? Xorꞹge kja Mateo 24:14.
-
Yo disipulo e Jesús dya kjaji kʼo na sʼoo nzakja yo ntee. Kʼo ntee kʼo bʼꞹbʼꞹji kja relijion kʼꞹ dya ga kjuana kichiji kja politika xo kjaji manipjestasion ngekʼua ra unꞹji kʼo neji. Yo ntee kʼo bʼꞹbʼꞹji kja kʼe relijion kʼꞹ na kjuana dya kjajikʼo (Juan 17:16, NTD; 18:36). Dya kjaji kʼo na sʼoo jaga tsjaa yo ntee kja ne Xoñijomꞹ. Xorꞹge kja Santiago 4:4.
-
Kʼo ntee kʼo bʼemi kjaji jagua mama e Jesús, me sʼiyaji o dyojui. Kjaji kʼo mama ne Biblia, sʼiyaji nrrexe yo ntee zo nʼaño ga ñaji, zo nʼaño ja menzumꞹji. Ma yo pais tsjaji chu̱ʼu̱ kʼo nʼaño pais, yo relijion kʼꞹ dya ga kjuana potrʼꞹji yo ntee, pero yo disipulo e Jesús pa̱ra̱ji dya ga jookʼo, dya potrʼꞹnteji (Miqueas 4:1-3). Zo dya pɇsʼiji na punkjꞹ merio ñe zo dya kjo̱trʼꞹji merio kʼo ga tsjaji, me pjøsʼꞹji yo ntee. Xorꞹge kja Juan 13:34, 35; 1 Juan 4:20.
4. ¿Bʼꞹbʼꞹ na relijion kʼꞹ kjaa kʼo na kjuana?
Dʼatrjo relijion kʼꞹ jichi yo ntee jango ga mama ne Biblia, jichi o trju̱u̱ e Mizhokjimi, jichi ke o Reino e Mizhokjimi ra mbøsʼꞹ yo ntee xo jichi ra sʼiyaji o minte dya ra mbotrʼꞹji. ¿Pje ma relijion i̱ mange ga tsjaa ga kjanu? Xorꞹge kja 1 Juan 3:10-12.
