Jesusya tiwin nikin religião yenupaꞌpî discípuloyamîꞌ pia. Seeni religião mîrîrî yairon. Mîrîrî religião wanî tiwin eꞌma yeꞌka pe yaanen pe koꞌmannîtoya ipatîkarî. ­Jesusya taꞌpî: “Seeni eꞌma eporî ­tuꞌkankonya pepîn.” (Mateus 7:14) Uurînîkon yuꞌse Paapa man mîîkîrî nikin yapurîtoꞌpe, oꞌnon yeꞌka pe Bíbliaya yenupa manni ­warantî. Tamîꞌnawîronkon yapurînenan yaironkon emurukontîsa man tiwin nikin féya. — Erenkakî João 4:23, 24; 14:6; Efésios 4:5.

Seeni panton eraꞌmakî Tamîꞌnawîron soosi wanî morî pe Paapa pia?

Jesusya taꞌpî tîwarî eꞌtî yaironkon pepîn profetayamîꞌ pî uurî yenupatonkon moꞌta toꞌya. Yaironkon ­yapurînenan warantî inkamoro ­eseraꞌma. Inkamoro religiãoyamîꞌ wanî cristãyamîꞌ pe taa rîse toꞌya. Tîîse inkamoro eseraꞌma yaironkon cristãoyamîꞌ pe pra. Îꞌ wani awanî yeꞌnen? Morîkon yeserukon yenpo yaironkon cristãoyamîꞌya moropai morîkon kupî toꞌya, mîrîrî eraꞌma pemonkonyamîꞌya. — Erenkakî Mateus 7:13-23.

Eraꞌmakî oꞌnon yeꞌka pe:

• Yaironkon yapurînenanya Bíblia eraꞌma Paapa Maimu pe. Îꞌ taa Bíbliaya manni yawîrî toꞌ wanî. Yairon religião wanî warayoꞌkon esenupanto yawîrî pra. (Mateus 15:7-9) Îꞌ yenupa yaironkon yapurînenanya mîrîrî kupî toꞌya. — Erenkakî João 17:17; 2 Timóteo 3:16, 17.

•   Yaironkon Jesus discípuloyamîꞌya Paapa eseꞌ, Jeová yapurî. Jesusya Paapa eseꞌ yapurîꞌpî moropai tepuꞌsen pe kupîꞌpîiya. Mîîkîrîya pemonkonyamîꞌ pîikaꞌtîꞌpî Paapa eseꞌ epuꞌtîtoꞌpe. Inkamoro yenupaꞌpîiya toꞌ epîrematoꞌpe tapurîsen pe Paapa eseꞌ ­eꞌtoꞌpe. (Mateus 6:9) Oꞌnon pata amîrî koꞌmamî manni, oꞌnon yeꞌka religião eseurîma Paapa eseꞌ pî? Tepuꞌsen pe Paapa eseꞌ kupîꞌpî Jesusya tiaronkon pî. Jesusya taꞌpî epîremantoya “Ayeseꞌ ekaremeꞌkîꞌpîuya toꞌ pî.” João 17:26, TNM.

• Yaironkon cristãoyamîꞌya Paapa Reinori ekaremeꞌkî. ­Jesus ­yarimaꞌpî Iyunya “morî itekare ekaremeꞌse Reino pî”. Paapa Reinoya nikin pemonkonyamîꞌ eꞌtarumaꞌtîntoꞌ tîꞌka tamîꞌnawîrî. Jesus eseurîmaꞌpî seeni Reino pî ­tîsamanta weiyu pîkîrî. (Lucas 4:43; 8:1; 23:42, 43) Discípuloyamîꞌya Reino ekaremeꞌtoꞌpe taꞌpî mîîkîrîya. Anîꞌ iisaya ayewîꞌ ta eseurîmai ayarakkîrî Paapa Reino pî, oꞌnon yeꞌka religião mîîkîrî pemonkon? — Erenkakî Mateus 24:14,TNM.

• Jesus yawîrî tîweꞌsenonya imakuiꞌpî ­kupî pepîn. Amîrîya toꞌ epuꞌtî eꞌpainon toꞌ ewomî pepîn políticaya moropai toꞌ ekorema pepîn. (João 6:14, 15; 18:36) Imakuiꞌpî kupî toꞌya pepîn seeni pata ponkon pemonkonyamîꞌ warantî. — Erenkakî Tiago 4:4.

• Yaironkon cristãoyamîꞌ wanî tepuꞌsen pe tiaronkon saꞌnama toꞌya yeꞌnen. Inkamoro esenupaꞌpî Paapa Maimuya respeitar ta toꞌpe tamîꞌnawîronkon pemonkonyamîꞌ pî. Yaironkon pepîn religiãoyamîꞌya tuꞌke iteꞌka pata ponkon epînto pîikaꞌtî, tîîse yaironkon ­yapurînenanya mîrîrî yeꞌka kupî pepîn. (Mateus 26:52) Yaironkon cristãoyamîꞌ esenyakama tiaronkon ­pîikaꞌtîtoꞌpe moropai tiaronkon ­yausinpatoꞌpe. — Erenkakî João 13:34, 35; 1 João 4:20.

Oꞌnon yeꞌka religião wanî tamîꞌnawîrî yenupatonkon moꞌka Bíblia yapai? Oꞌnon yeꞌka religiãoya Paapa eseꞌ yapurînen? Oꞌnon yeꞌka religiãoya pemonkonyamîꞌ yeurîmanen Paapa Reinoya nikin tamîꞌnawîrî eꞌtarumaꞌtîntoꞌ tîꞌka? Oꞌnon yeꞌkakon pemonkonyamîꞌya saꞌnamato yenpo moropai toꞌ ewomî pepîn epîntoya? Îꞌ taa amîrîya? — Erenkakî 1 João 3:10-12.