10
Tomadiho Momokani be Ede Ba Dibaia Toma?
1. Tomadiho momokani be tamona, eiava?
“Nahuamui ba toho, peroveta taudia koikoidia na garina.”—MATAIO 7:15.
Iesu ese ia murinai e rakava taudia e hadibadia, tomadiho momokani na tamona. Una tomadiho na dala ta heḡereḡerena—una dala baita badinaiamu ela bona dokonai mauri hanaihanai baita davaria. Iesu eto: Una dala “e davariamu taudia na gagadoi” o dia momo. (Mataio 7:14) Baibel e badinaiamu bona e ḡaukaralaiamu tomadihona sibona mo, Dirava ese e abia daemu. Una tomadiho e badinaiamu taudia edia abidadama na tamona dainai, iboudiai e lalotamonamu.—Ioane 4:23, 24; 14:6; Efeso 4:4, 5 duahidia.
2. Dahaka dainai Iesu ese Kristen taudia e hadibadia nahuadia bae toho?
“Idia na Dirava dibadia e tomamu. A ḡau be edia kara ese e ḡoreamu.”—TITO 1:16.
Iesu ese Kristen taudia e hadibadia nahuadia bae toho, badina peroveta koikoi taudia ese Kristen taudia bae hakaudia kerere. Unu koikoi taudia oromadia na tomadiho momokani taudia na heheto. Bona edia dubu taudia na sibodia e hegwauraimu, idia na Kristen taudia. To edena dala ai ba diba, idia na Kristen taudia momokanidia o koikoidia? Tomadiho momokanina e badinaiamu taudia sibodia ese Kristen taudia momokanidia edia kara bona dala namodia e hahedinaraimu.—Mataio 7:13-23 duahidia.
3. Tomadiho momokani taudia be ede ba dibadia toma?
Tomadiho momokani toadia 5 bini:
-
Tomadiho momokani taudia ese Baibel, Dirava ena Hereva e matauraiamu. E ḡaukara goadamu, Baibel ena hahekau herevadia e badinadiamu. Dubu haida na taunimanima edia lalohadai mo e hahedibalaimu, to tomadiho momokanina na dia unu heto. (Mataio 15:7-9) Tomadiho momokani taudia na e harorolaimu herevadia e badinamu danu.—Ioane 17:17; 2 Timoteo 3:16, 17 duahidia.
-
Iesu murinai e rakamu taudia momokanidia na Dirava ladana, Iehova, e matauraiamu. Iesu ese Dirava ladana e matauraiava bona e hahedibalaiava. Ia ese taunimanima e durudiava Dirava bae diba, bona e hadibadiava edia ḡuriḡuri amo Dirava ladana bae hahelaḡaia totona. (Mataio 6:9) Emu noho gabunai, edena tomadiho ese Dirava ladana e hahedibalaiamu?—Ioane 17:26; Roma 10:13, 14 duahidia.
-
Kristen taudia momokanidia na Dirava ena Basileia sivaraina e harorolaiamu. Dirava ese Iesu e siaia, Basileia sivaraina namona baine harorolaia totona. Dirava ena Basileia sibona ese taunimanima baine hanamodia. Iesu na una Basileia sivaraina e harorolaia ela bona e mase. (Luka 4:43; 8:1; 23:42, 43, NW) Danu Iesu eto, ia murinai e rakamu taudia ese Basileia sivaraina bae harorolaia. Bema ta na oi dekemu bainema, Dirava ena Basileia sivaraina baine hamaorolaimu, o laloamu ia be edena tomadiho amo?—Mataio 24:14 duahia.
-
Iesu murinai e rakamu taudia na dia ina tanobada dikana ena. Anina na, idia na politikol bona heiriheiri karadia (heḡereḡere strike o protest) lalodiai se vareaimu. (Ioane 17:16; 18:36) Danu, idia ese tanobada taudia edia lalohaidai dikadia bona kara dikadia e dadaraimu.—Iakobo 4:4 duahia.
-
Kristen taudia momokanidia na taunimanima iboudiai e lalokau henidiamu. Baibel amo diba maoro e abia dainai, idia ese bese idauidau e matauraidiamu. Ena be tomadiho koikoi taudia na nega momo tanobada tuaridia e durudiamu, to tomadiho momokani taudia na se uramu unu bae kara toma. (Mika 4:1-3) Kristen taudia momokanidia ese edia nega bona kohu o ḡau unu bamona amo ma haida e durudiamu bona e hagoadadiamu.—Ioane 13:34, 35; 1 Ioane 4:20 duahidia.
4. O laloamu tomadiho momokanina be edena?
Edena tomadiho ese Baibel mo e hahedibalaiamu, Dirava ladana e matauraiamu, bona taunimanima e hadibadiamu Dirava ena Basileia sibona ese taunimanima edia mauri baine hanamoa? Edena orea be taunimanima iboudiai e lalokau henidiamu bona tuari e dadaraimu? Emu haere be dahaka?—1 Ioane 3:10-12 duahidia.
