Jesús éntok a discípulowam wepu tua religión lutüria ayúkame wëtuak, wanay i religión lutüria wepu boo jiba bechïbo jiápsiwamtaw bicha wériame benʼna, te ka jáikim jibʼba a tetetʼtia (Mateo 7:14). Lios juka adoracionta Bíbliam jiaw bénasi jiba mabetʼtua. Wame júnel Liosta adoraruame naw äne buéytuk sïmetaka nanancha maxtíriamim suale. Juan 4:23, 24; 14:6 éntok Efesios 4:4, 5te nooka.

Jesús beja a nokʼlátukay ke géntem ara nokíchiam maxtíanay jachin Liosta adoráruaw bétana. Bempo tua lutüriapo Lióstam adorarua benʼna éntokim júnel jiawa ke bem tiopompo aneme Crístotam emo wojäse tiyʼya. Eläposu lutüriatam emo maxtiá titʼtia, bempo géntetam baitatʼtäwa. Te empo ket are a tewʼwa juka tua religión lutüriata, buéytuk jume ama aneme cristíanom bénasim emo weria. Mateo 7:13-23te nooka.

Jita mamnik joame wame religión lutüriata wëtuame:

• Bíbliamim yöre Liosta Noki ténasi. Jume tua cristíanom kátim géntem maxtíriamʼmey emo baitatʼtawtebo. Sïme ame bétana wémtam oʼore Liosta Nokim maxtiaw bénasi emo wériw bechïbo (Marcos 7:6, 7). Éntoket jita bem nokaw kéchim a jojuá. Juan 17:17 éntok 2 Timoteo 3:16, 17te nooka.

•   Jehovata téwamim yöre. Jesús íkay yawʼwak a Átchayta téwam maxtiako. Jesús géntemʼmew júnel jiawak ke oraruatek Liosta téwam am yörinakewtam áunake (Mateo 6:9). ¿Jita religionsu jak en joakapo Liosta téwam maxtiá? Juan 17:26 éntok Romanos 10:13, 14te nooka.

• Liosta Yawra bétanam nooka. Ju Liosta Yawra jiba esperanza géntem bechïbo, wa bechïbo Jesús buiaw bitʼtuawak jume tu nokim Yaut bétana nok bechïbo. Wanay a mukew täwariw taxti a yawʼwak (Lucas 4:43; 8:1; 23:42, 43). Éntoket, júnel jiawa ke a discípulowam juka Yawra bétanam noknákey. Júnel bechïbo si jabe émow yepsako éntok Liosta Yawra bétana émow nokako, ¿jita religiompo werama jäni? Marcos 13:10te nooka.

• Katim géntem ka tüwata joame imi Buiäpo joakame bénasim emo nüye. Jume Jesusta discípulom kátim porítikapo éntok owim naw nasʼsuawapo emo kikʼkibacha (Juan 17:16; 18:36). Éntoket kátim jume géntem ka tüwata joame mamatua éntok kátim ame bénasi pensarua. Santiago 4:4te nooka.

• Ju nákwame naw emo jípurewi yew bitʼtu. Jume Liosta Noki am maxtiala ke sïme géntetam yöreka am bitna, eläposu jita país bétanam kaate o wate nokita noka junʼne. Jume religiónim ka lutüriam naw nasʼsuawápom emo kikʼkibacha, te jume tua cristíanom kátim júkay joowa (Miqueas 4:1-3). Kayta böbíchakam bem a tiempo éntok tómitam mámaka géntem aniá báreka éntok tülisi am ëtua bechïbo. Juan 13:34, 35 éntok 1 Juan 4:20te nooka.

¿Jita religión sïme a maxtíriam Bíbliapom am yew nüye, Liosta téwam yöre éntokim a nooka ke ju Yawra téwekäpo kátekame géntem bechïbo jibʼba esperanza? ¿Jita religión jiba ayu ke wame ama aneme lutüriapo emo nakʼke éntok ka naw nasʼsuawapo emo kikʼkibacha? ¿Jáchise a bitcha? 1 Juan 3:10-12te nooka.