E Yesu wasambilizizyevye awasambilizi wakwe ukupepa konganye, ko-o ukupepa a kupepa kwacisinka. Ukupepa kwacisinka kwawa ngati anzila yino ikaya ku wumi wa muyayaya. E Yesu watili: ‘Wano wakazana inzila yoyo awatici.’ (Mateyu 7:14) Pakuti e Leza azumilizye ukupepa kwitu, tuzipizile ukuwonvya Baibolo. Wakapepa wacisinka wonsinye wazumila mucisinka conga.—Wazya Yohani 4:23, 24; 14:6; Waefeso 4:4, 5.

E Yesu watili kuliwa wakasesema wawufi wano walivulunganya Uwina Klistu. Wakaloleka nge awakapepa wa cisinka. Wakati amacalici yawo aya Wina Klistu. Lelo ungawamanya ukuti awawufi. Ungawamanya wuli? Awina Klistu wacisinka awano wawa ni miwele iyizima amo wawa mu kupepa kwa cisinka.—Wazya Mateyu 7:13-23.

Ungalola ivisinka vyo-o 5 vino twalandapo.

• Wakapepa wacisinka wacindika Baibolo ukuti a Lizwi lyakwe Leza. Wakawombesya ukukonka vino vyalembwa mwenemo. Acino ukupepa kwacisinka kutawa ndivino imipepele inji ino ikasambilizya amano ya wantu. (Mateyu 15:7-9) Vino wakapepa wacisinka wakasambilizya avyo wakacita.—Wazya Yohani 17:17; 2 Timoti 3:16, 17.

•   Awina Klistu wacisinka wacindika izina lyakwe Leza, ilya kuti Yehova. E Yesu wacindisile izina lyakwe Leza amuno wanenanga awantu pi zinanye lyo-o. Wavwilizizye awantu ukumanya Leza swinya wawasambilizizye ni vya kupepa ukuti izina lyakwe Leza licindikwe. (Mateyu 6:9) Alicalici ci lyo likasambilizya awantu pi zina lyakwe Leza kuno wikala?—Wazya Yohani 17:26; Waroma 10:13, 14.

• Awina Klistu wacisinka wakasambilizya pa Wufumu wakwe Leza. E Leza watumile e Yesu ukuwizya ilandwe lizima pa Wufumu. Kutawa uwufumu wuno ungaluwula awantu nkandivye Uwufumu wakwe Leza. E Yesu walandanga pa Wufumunye wo-o ukufika na pa wanda wuno wafwile. (Luka 4:43; 8:1; 23:42, 43) Watili awasambilizi wakwe waliwawizya pa Wufumunye wo-o. Uzye wumwi nga wakusimicila pa Wufumu wakwe Leza, ungati awa ku calici ci?—Wazya Mateyu 24:14.

• Awasambilizi wakwe Yesu wasiyisanzya muvya munsi yo-o iyiwipe. Ungawamanyila kwe vino wasiyisanzya mu vikanza vyansi nanti ivyongo vya munsi. (Yohani 17:16; 18:36) Swinya, wasikolanya imisango iyiwipe iya munsi.—Wazya Jemusi 4:4.

• Awina Klistu wacisinka wamanyicilwa ku kukundana. E Baibolo akawasambilizya ukuwa nu mucinzi kuwantu wonsi. Nanti acakuti awa mu mipepele yawufi wakayisanzya mu nkondo zyansi, wakapepa wacisinka weni wasiyisanzyamo. (Mika 4:1-3) Mu mpindi yakuyisanzya mu nkondo zyansi, wakapepa wacisinka, wakawonvya impindi ni vintu vino wawa navyo kukwavwa nu kuwomelezya awantu wanji.—Wazya Yohani 13:34, 35; 1 Yohani 4:20.

Amipepeleci yino yasimpa ukusambilizya kwawo pe Baibolo? Amipepeleci yino yikacindika izina lyakwe Leza? Swinya amipepeleci yino yikawizya pa Wufumu wakwe Leza wutupunye ukuti awuno tuzipizile ukusuwila? Aliwumbaci ilya mipepele lino lyawa na wantu wano wakundana swinya wano wasiyisanzya mu kulwa inkondo? Uzye ungasuka wuli amawuzyo ya-a?—Wazya 1 Yohani 3:10-12.