10ǁÎ ǁKHĀǁKHĀǃÂS
Matits ama ǀgoreǀî-aona a ǂanǂui ǁkhā?
1. ǀGui ama ǂgoms ǀguisa hâ?
“ǂKhawa kēbō-aogu, gū-saran ǃnâ sadu ǃoa ra hāga ǃûisen.”—MATEUB 7:15.
Jesub ge ǁîb saoǃgon-aona ǀgui ǂgoms xa ǀgui ge ǁkhāǁkhā, tsî ǁnās ge a ama ǂgom. ǀAmo ûib ǃoa garu daob khami ī sa. Jesub ge ge mî: “ǀOron ge ǁîba ra hōna” ǁnā daoba. (Mateub 7:14) Elob ge ǀgoreǀîs ǁîb mîs di amab ai ǃgaoǃgaosa sa ra ūǃoa. Hoa ama ǀgoreǀî-aon ge ǀgui ǂgoms ǃnâ ǀguiǃnâxase ra ǃoaba.—Khomai re Johaneb 4:23, 24; 14:6; Efeseǁîn 4:4, 5.
Vidioba kō re Eloba hoa ǃoaba ǀgauga ra ūǃoa?
2. Jesuba tae-e ama tama Xristeǁîn xa ge mî?
“Eloba in a ǂan, tîn da ǁkhoase mî, xawen ta dīgu ǀkha ǀūb.”—TITUB 1:16.
Jesub ge ge ǃkhâikhom da ǂhomi kēbō-aogu hîna Xristesisa nî ǁgaiǁgaigu xa. ǃAugaba xu gu ge ama ǀgoreǀî-aon khami ra mûsen. ǁÎn kerkegu ge Xristeǁîn a di ra mî. Xawe ǁnāti i khoena da ge ambes ǃnâ a ǂanǂui ǁkhā ham an a sa. Mati i io? Ama ǀgoreǀî-aon ǀguin ge ǂhauǃnâ Xristeǁî ǀgauga ra ǁgauǂui.—Khomai re Mateub 7:13-23.
3. Matits ama ǀgoreǀî-aona a ǂanǂui ǁkhā?
ǂÂiǃgâ re nē koro ǂanǂui saode:
-
Ama ǀgoreǀî-aon ge Elobmîsa Elob di mîs ase ǃgôa hâ. ǁÎn ge ra dītsâ Elobmîs tsoatsoadi ǃoa-ai ûisa. Ama ǂgoms ge ra ǀkhara, ǂgoms hîna khoen ǂâi ǀgauba xu hâsa xu. (Mateub 15:7-9) Ama ǀgoreǀî-aon ge ǀgui xū-e aoǁnâ tsî ǁnās ǃoa gu hâ xū-e si dī tama.—Khomai re Johaneb 17:17; 2 Timoteub 3:16, 17.
-
Jesub di saoǃgon-aon ge Elob di ǀons, Jehovasa ra ǃgôa. Jesub ge Elob ǀonsa ǃgôa tsî gere ǂanǂan. ǁÎb ge khoena gere hui in Eloba ǂan tsî ǁîna gere ǁkhāǁkhā in ǀgore tsî Elob ǀonsa ǃanuǃanu. (Mateub 6:9) Sats ta hâba mâ ǂgomsa Elob ǀonsa ra ǂanǂan?—Khomai re Johaneb 17:26; Romeǁîn 10:13, 14.
-
Ama Xristeǁîn ge Elob Gaosib xa ra aoǁnâ. Elob ge Jesuba ge sî ǃgâiǂhôasab nî aoǁnâ hāse. Elob di Gaosib ge hoara-us di ǃâubasensa khoen ǃaroma. Jesub ge ǁnās xa ǀgui gere ǃhoa ǁōb nîs kōse. (Lukab 4:43; 8:1; 23:42, 43) ǁÎb ge ge mî ǁîb saoǃgon-aon tsîn ge ǃgâiǂhôasa nî aoǁnâ. Khoe-i ga Elob di Gaosib xa sats ǀkha ǃhoa o, mâ ǂgoms dib a?—Khomai re Mateub 24:14.
-
Jesub di saoǃgon-aon ge dī xū-e ūhâ tama hâ nē eloxoresa ǃhūbaib ǀkha. ǁÎnats ge a ǂanǂui ǁkhā dī xū-en ǂgīǂgōsi tamas ka io ǃhaoǃnâbe torogu ǃnâ ūhâ tama hâ amaga. (Johaneb 17:16; 18:36) ǁÎn ge nē ǃhūbaib di tsū xūn tsî tanisen ǀgaugu tsîna ǁgae tama hâ.—Khomia re Jakobub 4:4.
-
Ama Xristeǁîn ge mâǂoa ra ǀnama ūhâba gu hâ. Elob di mîsa xun ge ra ǁkhāǁkhāsen hoa ǃhaodi khoena ǃgôasa. Nausa di ama tama ǂgomde ǀaexase toro ǃkhamgu ǁîn ǁaedi di ga ra ǂkhâǃnâ hîa. Xawe ama ǀgoreǀî-aon ge ǁnāsa dī tama hâ. (Mixab 4:1-3) Ama Xristeǁîn ge khoexaǃnâ ǀgaub ai ǁîn ūhâ xūn tsî ǁaeb tsîn ǀkha nau hâ khoena ra hui tsî ǂkhâǃnâ.—Khomai re Johaneb 13:34, 35; 1 Johaneb 4:20.
4. Matits ama ǂgomsa a ǂanǂui ǁkhā?
Mâ ǂgomsa ǁîs ǁkhāǁkhāde Elob di mîs ai ra ǃgaoǃgao. Tsî Elob di ǀonsa ǃgôa, tsî Elob di Gaosiba ra ǂanǂan, khoen di hoara-us di ǃâubasense? Mâ khoena ǀnama ūhâba gu hâ tsî torob ǀkha dī xū-e ūhâ tama hâ? Matits ta ǂâi?—Khomai re 1 Johaneb 3:10-12.
