TLAMACHTILI 10
¿Kenijkatsa uelis tijpantis religión katli melauak?
1. ¿Onka san setsi religión katli melauak?
“Xitlachixtokaj pampa asisej tlakajkayauanij.” (MATEO 7:15).
Jesús kinmachtik itokilijkauaj onka san setsi religión katli melauak, yeka kiijtok eliyaya kejuak se ojtli tlen teuika kampa nemilistli tlen amo kema tlami uan “amo miakej kiasij” (Mateo 7:14, TNM). ToTeotsij kineki ma tijueyichiuakaj kej kiijtoua ipan Biblia. Yeka nochi katli kiueyichiuaj kej kinamiki kineltokaj sanse tlamachtili. (Xijpoua Juan 4:23, 24; Efesios 4:4 uan 5, TNM).
Xikita nopa video ¿Kipaktia toTeotsij nochi religiones?
2. ¿Tlake kiijtok Jesús tlen katli tlamachtiaj tlen amo melauak?
“Kiijtouaj kiixmatij toTeko, pero ika tlen kichiuaj, technextiliaj para axtle.” (TITO 1:16).
Jesús kiijtok itstoskiaj katli tlamachtiskiaj tlen amo melauak. Ni maseualmej katli itstokej ipan nopa religiones kiijtouaj kitokiliaj Cristo. Maske kiijtouaj tlamachtiaj tlen melauak, san kinkajkayauaj maseualmej. Ipan ni tonali, tojuantij uelis tijmatisej ajkia inijuantij itstokej ipan religión katli melauak, pampa kej monejnemiltiaj kinextiaj nelnelia kiueyichiuaj toTeotsij kej kinamiki. (Xijpoua Mateo 7:15-23).
3. ¿Ajkia inijuantij itstokej ipan religión katli melauak?
Ma tikitakaj makuili tlamantli:
-
Kitlepanitaj Biblia kej toTeotsij iTlajtol. Amo kineltokaj tlen maseualmej tlamachtiaj, nochipa kichiuaj kampeka kineltokasej tlanauatili tlen uala ipan Biblia (Mateo 15:7-9). Uan tlen tlamachtiaj, kichiuaj ipan ininnemilis. (Xijpoua Juan 17:17; 2 Timoteo 3:16 uan 17).
-
Kiueyichiuaj toTeotsij Jehová itoka. Jesús kej nopa kichijki kema temachtik iTata itoka. Kiniljuik maseualmej kenijkatsa Jehová uan kinmachtik ma kitlajtlanikaj ma moueyichiua toTeotsij itoka (Mateo 6:9). Kampa ta tiitstok, ¿ipan tlake religión temachtiaj toTeotsij itoka? (Xijpoua 2 Samuel 7:22; Isaías 42:8 uan Jeremías 32:17).
-
Tlamachtiaj tlen toTeotsij iTlanauatijkayo. ToTeotsij kititlanki Jesús ma tlamachtiki ipan Tlaltipaktli tlen toTeotsij iTlanauatijkayo. San nopa tlanauatili kichiuas ma kuali itstokaj maseualmej. Jesús nochipa tlamachtiyaya nopa, uan nojkia kichijki kema nechka kimiktiskiaj (Lucas 4:43; 8:1; 23:42, 43, TNM). Nojkia kiijtok itokilijkauaj tlamachtiskiaj nopa. Uajka tlaj se akajya mitspaxaloskia mochaj uan mitspouiliskia tlen toTeotsij iTlanauatijkayo, ¿ipan tlake religión timoiljuia uelis itstok? (Xijpoua Mateo 24:14).
-
Amo kichiuaj tlen kichiuaj ipan Tlaltipaktli. Jesús itokilijkauaj amo mokalakiaj ipan política yon kema maseualmej mokualaniaj (Juan 17:16; 18:36). Nojkia amo monejnemiltiaj yon amo kipiaj inintlalnamikilis kej kichiuaj maseualmej ipan Tlaltipaktli. (Xijpoua Santiago 4:4).
-
Nelnelia moikneliaj. Jesús itokilijkauaj momachtijtokej ipan toTeotsij iTlajtol kenijkatsa moneki kintlepanitasej nochi maske kampa ueli euaj. Katli itstokej ipan nopa religiones tlen amo melauak tlapaleuijtokej ipan uejueyi tlauilankayotl, uan katli nelia Cristo itokilijkauaj amo kichiuaj nopa (Miqueas 4:1-3). Yeka ika nochi ininyolo kitekiuiaj tonali uan inintomij, uan kiampa kinpaleuiaj uan kinyolchikauaj sekinok. (Xijpoua Juan 13:34, 35 uan 1 Juan 4:20).
4. ¿Uelis tijmatis ajkia inijuantij itstokej ipan religión katli melauak?
¿Ipan tlake religión tlamachtiaj san tlen uala ipan Biblia, kitlepanitaj toTeotsij itoka uan tlamachtiaj san toTeotsij iTlanauatijkayo kichiuas ma kuali tiitstokaj? ¿Ipan tlake religión nelnelia nochi moikneliaj uan amo tlapaleuiaj kema onka uejueyi tlauilankayotl? ¿Tlake timoiljuia ta? (Xijpoua 1 Juan 3:10-12).
