Jesús kikajte̱wilij idiscipulojwan se̱san religión yej melá̱. Yéj kijtoj iga iní̱n ken se̱ ojti yej te̱wi̱ga pan isatolis iga nochipa, pero ayá̱ nochimej kasij iní̱n ojti (Mateo 7:14). Dios kineki matikadora̱ro̱kan ken kijtowa Itajto̱l, yej onoʼ pan Biblia. Jesús kijtoj: «Yej melaʼ kiadora̱rowaj Dios, moojkuiltiáj [o moyaganaj] de iyespírituj wan de itajto̱l yej melá̱» (Juan 4:23). Wan yej ijkó̱n kichi̱waj onokej sekan, pan se̱san fe. Tajto̱lti Efesios 4:4, 5.

Jesús kijtoj iga onoskiáj yej takajkaya̱waskiáj de Dios, wan ayá̱ tamachtiskiáj yej Jesús tamachtij. Ini̱nmej kijtowaj iga kitokaj Cristo wan kijtowaj iga yejeme̱n kiadora̱rowaj Dios. Pero, welij tiki̱xmatij katiá religión yej melá̱, kua̱ tikitaj ken nemij wan te̱ kichi̱waj iga seuʼmej. Jesús kijtoj: «Iga ken nemij anki̱xmatiskej a̱ʼ yéj yejeme̱n [...]. Se̱ ye̱kti kuawiʼ awelij kimaka ita̱kilyo yej pala̱ntoʼ [o xabaltiʼ], ijko̱nsan no̱ se̱ kuawiʼ yej pala̱ntoʼ awelij kimaka ita̱kilyo yej ye̱kti» (Mateo 7:16, 18).

Matikitakan cinco tejté̱ yej yejeme̱n kichi̱waj:

• Kitaj Biblia ken Itajto̱l Dios. Yejeme̱n ayá̱ kitokaj tamachtilis yej wi̱ts de tajta̱gamej, sinoke motekitiliáj iga kitajto̱lkakij yej kijtowa Itajto̱l Dios (Mateo 15:7-9). Wan yejeme̱n kichi̱waj ken tamachtiáj. Jesús kijlij Itaj: «Motajto̱l inó̱n yej melá̱» (Juan 17:17). Tajto̱lti 2 Timoteo 3:16, 17.

•   Kiweymakaj ito̱ka̱ Dios, Jehová. Jesús kiweymaʼ ito̱ka̱ Dios, kua̱ kine̱xtij ito̱ka̱ de Itaj. Jesús kijlij Itaj: «Nej nikne̱xtilij yejeme̱n, moto̱ka̱, wan niá nikne̱xti̱ti» (Juan 17:26). Kipale̱wij tajta̱gamej wan siwa̱tkej iga maki̱xmatikan Jehová, wan kine̱xtij iga kua̱ matajto̱kan wan Dios makijli̱kan iga mamochipaktili ito̱ka̱ (Mateo 6:9). Pan moa̱ltepe̱ʼ, ¿té̱ religión kine̱xtiá ito̱ka̱ Dios? Tajto̱lti Romanos 10:13, 14.

• Tajto̱lmoya̱waj de Irreinoj Dios. Jehová kichij iga Jesús mawi̱ki pan Ta̱jli iga matajto̱lmoya̱wa de iní̱n Reinoj wan Jesús ijkó̱n kichij hasta ke kimiktijkej. Ini̱nsan Reinoj yawi kichi̱wati tejté̱ yej ye̱kti iga tejeme̱n (Lucas 4:43; 8:1; 23:42, 43). Jesús kijtoj iga idiscipulojwan no̱ tajto̱lmoya̱waskiáj de iní̱n gobiernoj. Si agaj mitspaxa̱lowiliá mocha̱n wan mitsijliá de Irreinoj Dios, ¿de té̱ religión wi̱ts? Pan Biblia kijtowa: «Iní̱n ye̱kti wan yankuiʼ tajto̱lmej de irreinoj Dios, momoya̱was pan nochi ta̱jli» (Mateo 24:14).

• Ayá̱ nemij ken tajta̱gamej de iní̱n ta̱jli yej kichi̱waj yej aye̱kti. Idiscipulojwan Jesús ayá̱ nemij pan política wan ayá̱ kichi̱waj huelgas (Juan 17:16; 18:36). Wan ayá̱ kichi̱waj tejté̱ yej aye̱kti yej tajta̱gamej kichi̱waj, wan ayá̱ tajla̱mikij ken yejeme̱n. Pan Biblia kijtowa: «Si agaj kineki mamochi̱wa amigoj de tajta̱gamej yej kichi̱waj yej aye̱kti pan iní̱n ta̱jli, kine̱xtiá iga nemi kijiya Dios» (Santiago 4:4).

• Yejeme̱n melaʼ monekij. Itajto̱l Dios kine̱xtiliá iga makiye̱ʼitakan nochimej, wan ayá̱ makijiyakan yej wi̱tsej de seuʼ a̱ltepe̱ʼ. Pan Biblia kijtowa: «Si agaj kijtowa: Nej nikneki Dios, pero kijiyatoʼ iyiknin, iní̱n nemi takajkaya̱wa. Iga yej ayá̱ kineki iyiknin yej kita, awelij kinektoʼ Dios, yej ayá̱ kita» (1 Juan 4:20). Yej onokej pan religión yej ayej melá̱ kitaj ye̱kti tamijmiktilis wan hasta kijliáj seuʼmej iga maya̱kan. Pero, yej kitokaj Jesús ayá̱ kichi̱waj iní̱n (Miqueas 4:1-3). Yejeme̱n kiyokamakaj de itiempoj, de itomin wan tejté̱ yej kipiáj, iga makipale̱wi̱kan wan makiyo̱lketsakan seuʼmej. Jesús kijtoj: «Pan iní̱n nochi mitsi̱xmatiskej iga anmejeme̱n nodiscípulojmej, siga anmosennekij» (Juan 13:35).

¿Té̱ religión tamachtiáj ken kijtowa Biblia? ¿Té̱ religión kiweymakaj ito̱ka̱ Dios wan kijtowaj iga Irreinoj Dios, ini̱nsan yej yawi kichi̱wati tejté̱ yej ye̱kti iga tejeme̱n? ¿Té̱ religión mosennekij wan ayá̱ yawij pan tamijmiktilis? ¿Té̱ tikijtowa téj? Tajto̱lti 1 Juan 3:10-12.