EISHOMO 10
Noobaasa Kumanya Ota Okuramya okw’Amazima?
1. Hariho ediini emwe ey’amazima?
“Mwerinde baanabi b’ebishuba.”
Yesu akeegyesa abakuratsi be ediini emwe ey’amazima. Eri nk’omuhanda ogurikuhitsya omu magara agatahwaho. Yesu akagira ngu: “Bakye” nibo barikuzoora omuhanda ogwo. (Matayo 7:14) Ruhanga naasiima okuramya kwonka okurikwikirizana n’Ekigambo kye. Abakristaayo ab’amazima bari omu kuramya kumwe.
2. Yesu akagamba ki aha Bakristaayo ab’ebishuba?
“Beegamba ku barikumanya Ruhanga, kwonka omu micwe yaabo bamwehakana.”
Yesu akagira ngu baanabi b’ebishuba bakaba nibaija kushiisha okuramya okw’amazima. Nibereebekyesa nk’Abakristaayo ab’amazima. Kwonka abantu nk’abo noobaasa kubamanyira aha bikorwa byabo. Ediini ey’amazima niyo yonka erikuhwera abagirimu kuba Abakristaayo ab’amazima n’okugira emitwarize mirungi.
3. Noobaasa kumanya ota Abakristaayo ab’amazima?
Noobaasa kubamanyira aha bintu bitaano ebi:
-
Abakristaayo ab’amazima nibatwara Baibuli nk’Ekigambo kya Ruhanga. Nibateeraho kugyendera aha misingye ya Baibuli. N’ahabw’ekyo ediini ey’amazima neetaana aha diini ezirikwegyesa ebiteekateeko by’abantu. (Matayo 15:7-9) Abakristaayo ab’amazima nibakora ebirikuhikaana n’ebi barikwegyesa.
—Shoma Yohaana 17:17; 2 Timoseo 3:16, 17. -
Abakuratsi ba Yesu ab’amazima eiziina rya Ruhanga, Yehova, nibariha ekitiinisa. Yesu akaha eiziina rya Ruhanga ekitiinisa arikurimanyisa abandi. Akahwera abantu kumanya Ruhanga kandi yaabeegyesa kushaba ngu eiziina rya Ruhanga ryezibwe. (Matayo 6:9) Omu kicweka eki orimu, ni baahi abarikumanyisa abandi eiziina rya Ruhanga?
—Shoma Yohaana 17:26; Abarooma 10:13, 14. -
Abakristaayo ab’amazima nibabuurira aha Bukama bwa Ruhanga. Ruhanga akatuma Yesu kubuurira amakuru marungi agarikukwata aha Bukama. Obukama bwa Ruhanga nibwo bwonka oburamareho oburemeezi bw’abantu. Yesu akaguma naabuurira aha Bukama okuhitsya aha kufa kwe. (Luka 4:43; 8:1; 23:42, 43) Akagira ngu abakuratsi be bakaba nibaija kububuuriraho. Haagira owaakubuurira aha Bukama bwa Ruhanga, noogira ngu naaba ari wa diini ki?
—Shoma Matayo 24:14. -
Abakuratsi ba Yesu ti b’ensi egi embi. Noobaasa kubamanya ahabw’okuba tibarikwejumba omu by’obutegyeki. (Yohaana 17:16; 18:36) Kandi tibarikutooreza emitwarize n’emiteekateekyere mibi y’ensi.
—Shoma Yakobo 4:4. -
Abakristaayo ab’amazima nibakundana. Ekigambo kya Ruhanga nikibeegyesa kutashoroora omu nganda. Abakristaayo ab’amazima tibarikushagika ntaro nk’oku amadiini g’ebishuba gatwire nigakora. (Miika 4:1-3) Omu mwanya gw’ekyo, nibakoresa obwire bwabo n’ebintu byabo kuhwera abandi.
—Shoma Yohaana 13:34, 35; 1 Yohaana 4:20.
4. Mbwenu hati noobaasa kumanya ediini ey’amazima?
Ni diini ki erikwegyesa ebirikuhikaana n’Ekigambo kya Ruhanga, ekaha eiziina rya Ruhanga ekitiinisa, kandi ekabuurira ngu Obukama bwa Ruhanga nibwo buramareho oburemeezi bw’abantu? Ni baahi abarikukundana kandi abatarikwejumba omu ntaro? Noobamanya?
