LECCIÓN 10
Ali religiondaca ¿imashinata rijsi ushanchi?
1. Diosca ¿maijan religiondata alicachin?
‘Llullashpa villajcunamanda cuidarichi’ (MATEO 7:15)
Jesuspash, paita catijcunapash ali religiondami catinajurca. Jesusca ali religiondaca na huañushpa causaiman apaj ñanhuanmi chimbapurarca. Chai ñandaca huaquingunallami tarin (Mateo 7:14). Bibliapi nishcata catishpa adorajcunatallami Diosca alicachin. Diosta ali adorajcunaca tucuicunami chaitallata crin. Salmo 25:5; Juan 14:6; Efesios 4:4, 5, liipangui.
¿Tucui religiongunatachu Taita Diosca alicachin? nishca videota ricupangui.
2. Pandata yachachijcuna tianataca ¿Jesusca villarcachu?
‘Diosta yarinchimi nishpapash nalita rurashpami, Diospi na crishcata ricuchin’ (TITO 1:16)
Jesusca nircami paipa catijcunata pandachingapami pandata yachachijcuna ricurimunga nishpa. Paicunaca Jesustami catinchi, Bibliamandami yachachinchi nishpapash gentecunataca pandachishpami purin. Shinaca, maijan religión ali cajta yachangapaca, chaipi catijcuna imashina cajta ricushpa, alita o nalita rurajta ricushpami yachai ushanchi. Mateo 7:13-23, liipangui.
3. Ali religionda catijcunataca ¿imashinata rijsi ushanchi?
Picha yuyaicunata ricupashun.
-
Bibliapi nishcatami pactachin. Gentecunapa nishcata catinapa randica, Bibliapi mandashcacunata cazungapami esforzarin (Mateo 15:7-9). Imata yachachishpapash paicunapa causaipirami pactachin. Juan 17:17; 2 Timoteo 3:16, 17, liipangui.
-
Diospa shuti Jehovatami jatunyachin. Jesusca Diospa shutita gentecunaman rijsichishpami jatunyachirca. Diosta mañanata yachachijushpaca, Diospa shuti alicachi tucushca cachun mañanguichi nircami (Mateo 6:9). Quiquinba llactapica ¿picunata Diospa shutita yachachishpa purin? Juan 17:26; Romanos 10:13, 14, liipangui.
-
Diospa Reinomandami yachachin. Jesús Alpapi cashpaca Diospa Reinollami gentecuna cushilla causachun ayudanga nishpami villarca. Huañuna horascamanmi Jesusca chaimanda parlarca (Lucas 4:43; 8:1; 23:42, 43). Paita catijcunapash chai Reinomanda villashpami puringa nircami. Quiquinba llactapica, ¿picunata huasin huasin rishpa Diospa Reinomanda yachachin? Mateo 24:14, liipangui.
-
Cai mundopa ruraicunapica na chapurinllu. Jesusta ali catijcunaca politicapi, parocunapipash na chapurinllu (Juan 17:16; 18:36). Nali ruraicunata, mapa yuyaicunatapash na catinllu. Santiago 4:4, liipangui.
-
Caishuj chaishujmi juyarin. Bibliapica yachachinmi maijan llactamanda cajpipash gulpi gentegucunata juyachun. Panda religiongunaca guerracunata apoyanmi. Cutin Jesusta ali catijcunaca chaicunataca na ruranllu (Miqueas 4:1-3). Chaipa randica paicunapa tiempota llujchishpa, culquita gastashpami shujcunata ayudan. Juan 13:34, 35; 1 Juan 4:20, liipangui.
4. Ali religiondaca ¿imashinata rijsi ushangui?
Quiquinba ricuipica ¿maijan religionda Bibliapi nishcata pactachin, Diospa shutita rijsichin, Diospa Reinomanda yachachin? ¿Picunata caishuj chaishuj juyarin, guerracunapipash na chapurin? 1 Juan 3:10-12, liipangui.
