Jesuswan dicipuluncunam yaćhaycachila rasun religiuncäta, chaymi Jesús tincuycachila wiñay cawsayman lï quićhqui caminuwan. Chay caminupa lïcunaca ashllay nunallam (Mateo 7:14). Diosninchic munanmi rasuncawan adoränanchicta. Bibliäpi yaćhapacuśhanwan’a juc pensamientullañam capäcun’a. Ashicuy Juan 4:22-24; 14:6 ñatac Efesios 4:4, 5.

Licay cay videuta: ¿Aprueba Dios todas las religiones?

Jesús nilañam falsu willacu tucul ćhamun’añam allin cristianucunäta perdichinampa. Chay nunacunaca’a manamá yaćhachipäcunchu rasuncata templuncunaćhüpis. Pantachipäcunmi Bibliapita, shemillanpimi limapäcun chaypita’a nipacunlämi campis ya’acuna allin cristianum capacü. ¿Canan imaynuypaćh lisïcućhwan rasun religiuncata? Lulaynincunawanmi lisipashllä rasun cristianucunaca. Ashicuy Mateo 7:13-23.

Canan lisiśhun picha rasuncunacta:

• Bibliata respetapäcun Diospa limaynin captin. Amam nunacunäpa yaćhachiśhanta ćhasquiśhunchu, Bibliapa nishantam cäsucuśhun (Mateo 15:7-9). Chaymi, allin  cristianucunaca limaśhanta cumplipäcun. Ashicuy Juan 17:17 ñatac 2 Timoteo 3:16, 17.

• Jehová Diospa śhutintam respetapäcun. Jesusmi yaćhachila nunacunäman Taytampa śhutinta. Ñatacmi oraciuncawan Taytampa śhutinta chuyanchaśha canantam munala. Chaymi canan yaćhaycuyanchic Diosninchicpa śhutinta (Ezequiel 38:23). Malcayquićhu ¿ima religiunmi yaćhachipacuśhunqui Diospa śhutinta? Ashicuy Juan 17:26 (NM).

• Diospa gubiernunpimi willaculcan. Jesusta caćhamula cay allpäman Taytampa gubiernumpita willacunanpämi. Chay gubiernumi allichan’a llapa nunacunapa ñacacuyninta. Chaypimi, limapamälanchic wañunan muyuncama (Lucas 4:43; 8:1; 23:42, 43). Ñatacmi dicipuluncunacta encargaycula chay gubiernüpi willaculcänampa. Pipis cay gubiernupi limapäycuśhuptiqui’a, am ¿ima religiunpićha cay limäcunaca ninquimanćha? Ashicuy Mateo 24:14.

• Manam cay juyu mundupächu canchic. Jesuspa dicipuluncuna manam tacunaculcanchu politicacunäwan, nï ima huelgacunamampis miticulcanchu (Juan 17:16; 18:36). Manatacmi atichipäcunchu juyu mundupa pensaynincunacta nï lulaynincunacta. Ashicuy Santiago 4:4.

• Cuyanaculcäśhanwanmi lisipaśh capäcun. Diosninchicpa limayninćhu yaćhachimalanchic llapa nunacunäta respetanacunanchicta, masqui mayladu nuna captinpis. Chaymi rasun cristianucunaca’a guerracunamam miticulcanchu. Ashwanpam tiempuntapis, callpantapis, cänintapis unaculcan nunamasincunawan (Miqueas 4:1-3). Cay pantaśha religiuncunañatacmi apuyapacun guerracunätapis. Ashicuy Juan 13:34, 35 ñatac 1 Juan 4:20.

¿Ima religiunmi Bibliapita yaćhayachin? ¿Ima religiunmi Diospa śhutinta respetapäcun? ¿Ima religiunmi willaculcan Diospa gubiernunpita? ¿Chay gubiernütachun nunacunaca alcäyalcan ñacacuyninta allichanampä? ¿Ima religiunmi cuyanacuyninwan lisipaśh? ¿Ima religiunmi, mana guerracunaman miticulcanchu? ¿Am’a imaninquim? Ashicuy 1 Juan 3:10-12.