Jesusca paita caticcunahuanmi sirtu religionmanda yachachinaura. Jesusca chi religiondaga huiñai causaima apac ñambihuanmi chimbapurara, chi ñambitaga ashilla runagunami riunguna nira (Mateo 7:​14). Diosca Bibliamanda sirtuta yachasha quirigllaibimi alita ricun. Biblia nishca shina Diosta llaquiccunaga shuglla shinami quirisha tandarishcauna. Juan 4:23, 24; 14:6; Efesios 4:​4, 5, leingui.

Cai videota ricui: Diosca tucui religiongunatachu gustan

Jesusca nirami llullasha yachachiccunaga, ñucata caticcunataga umashami pandachingauna nisha. Chi yachachiccunaga paigunata uyaccunahuas, Señorta quiric manchi nishahuas llullanaunmi. Chasna acpihuas, canga ricsinata ushanguimi maican religion sirtuta yachachic acta. Sirtu religionbi aucunataga asirtaibaglla man. Mateo 7:​15-​23, leingui.

Jesusta caticcunata asirtangahua pichca yachaigunata ricushun:

• Diospa Shimi ashcamandami Bibliataga balichinaun. Runaguna nishcata quirina randiga Biblia nishcagunata shungumanda cazushami pactachinaun (Mateo 15:​7-9). Chasnallata runagunama camachishaga, paiguna camachishca shinallatami causanaun. Juan 17:17; 2 Timoteo 3:16, 17, leingui.

•   Diospa shutita ashcata balichinaun. Jesusca chitami rara, paiba Yayahua shutita runagunama ricsichisha. Jesusca Jehova Diosmandami yachachira. Jehovata mañanata yachachishaga, “camba shuti balichishca achun” nishami yachachira (Mateo 6:9-13). Maican religionda can causashca llactaibiga Diospa shutita yachachiun. Juan 17:26; Romanos 10:13, 14, leingui.

• Diospa Reinomanda camachinaun. Diosmi Jesustaga jahuapachamanda cai Allpama cachara, paiba Reinomanda ali cuintaigunata runagunama yachachichun nisha. Chi Reinollami runagunataga ali causaita cunga. Chitaga pai huañuna punzhagamami yachachira (Lucas 4:​43; 8:1; 23:42, 43). Astahuambas nirami, ñucata caticcunahuas chi Reinomanda yachachingaunami nisha. Maicanhuas Diospa Reinomanda canda camachicpiga, maican religion man ninguimata. Mateo 24:14, leingui.

• Cai munduhua mana ali raigunamanda anchurinaunmi. Jesusta caticcunaga politicagunaibi, llactapura jatarinagunaibi mana chapurinaunzhu (Juan 17:16; 18:36). Chasnallata cai munduhua mana ali raigunata, yuyaigunatas mana catinaunzhu. Santiago 4:4, leingui.

• Paigunapura llaquinacuibas asirtaibaglla man. Bibliaga paigunata yachachishcami, tucui sami runagunata balichina anguichi nisha. Llullasha yachachic religiongunaga cuti cutimi guerrasgunata yanapanaun. Randi, Jesusta ali caticcunaga mana chita ranaunzhu (Miqueas 4:​1-3). Astahuambas, Jesusta caticcunaga timputa llucshichinaunmi shuccunata yanapangahua. Chasnallata paiguna charishcahuan ushashaga yanapanaun. Juan 13:34, 35; 1 Juan 4:20, leingui.

Maican religionda tucui paina yachachishcagunata Bibliamanda yachachinaun. Pigunata Diospa shutita balichinaun. Pigunata, Diospa Reinomi ali causaita apamunga nisha camachinaun. Maican religionda sirtupacha paigunapura llaquinacusha mana guerrasgunaibi chapurinaun. Maican man ninguimata. 1 Juan 3:​10-​12, leingui.