Yesu a dondzrise valandzreli vakwe wukhongoti byin’we ntsena, ku nga wukhongoti bya ntiyiso. Byi fana ni ndlela leyi yisaka a wuton’wini lebyi nga helikiki. Yesu a te ‘lava yi kumaka’ ndlela leyo ‘i vatsrongo’. (Mattheo 7:14) Xikwembu Nkulukumba a yamukela wugandzreli lebyi seketeliwiki Zritwini dzrakwe dzra ntiyiso ntsena. Hinkwavu vagandzreli va ntiyiso va tlhanganisiwile a lipfumelweni dzrin’we.​—Dondzra Yohan 4:23, 24; 14:6; Ba-le-Efesa 4:4, 5.

Hlalela vídeo Xana Xikwembu Nkulukumba A Yamukela Tindlela Hinkwatu Ta Wugandzreli?

Yesu a basopise leswaku a ku ta humelela vaprofeta va madzrimi lava taka ntxhimisa Wukriste. Hi le handle, va voneka ingiki i vagandzreli va ntiyiso. Magereja yavu ma li wone i ya Wukriste. Kambe u nga tekela ku va vona vhanu lava hi leswi va nga swone. Xikuyini? Ko va wukhongoti bya ntiyiso ntsena lebyi pswalaka Vakriste va ntiyiso lava vonekaka hi matsrhamela ni mahanyela yavu.​—Dondzra Mattheo 7:13-23.

Kambisisa mimfungu leyi ya ntlhanu:

• Vagandzreli va ntiyiso va hlonipha Bibele swanga Zritu dzra Xikwembu Nkulukumba. Va tikazratela ku hanya hi ku landzra minsinya ya dzrone ya milawu. Xileswo, wukhongoti bya ntiyiso bya hambana ni wukhongoti lebyi tiseketelaka miyanakanywini ya mhunu. (Mattheo 15:7-9) Vagandzreli va ntiyiso a va dondzrisi ntxhumu  wa kukazri va gama va yentxa swa ku hambana na wone.​—Dondzra Yohan 17:17; 2 Timoteo 3:16, 17.

• Valandzreli va ntiyiso va Yesu va bekela lisima vito dzra Xikwembu Nkulukumba, ku nga Yehovha. Yesu a bekele lisima vito dzra Xikwembu Nkulukumba hi ku dzri tivisa vhanu. A va pfune ku tiva Xikwembu Nkulukumba a tlhela a va dondzrisa ku khongota leswaku vito dzra Xikwembu Nkulukumba dzri xwengisiwa. (Mattheo 6:9) Lomu wene u tsrhamaka kone, xana hi byini wukhongoti lebyi tivisaka vhanu vito dzra Xikwembu Nkulukumba?​—Dondzra Yohan 17:26; Ba-le-Roma 10:13, 14.

• Vakriste va ntiyiso va zrezra Mfumu wa Xikwembu Nkulukumba. Xikwembu Nkulukumba a zrumele Yesu akuva a zrezra madzrungula lamanene ya Mfumu. Mfumu wa Xikwembu Nkulukumba hi wone ntsena wu nga dumbo ledzri saleliki vhanu. Yesu a ye mahlweni a khanela ha wone ku kondzra a fa. (Luka 4:43; 8:1; 23:42, 43) A te valandzreli vakwe va ta wu zrezra. Loko mhunu wa kukazri a ku tlhasela akuva mi bula hi Mfumu wa Xikwembu Nkulukumba, u pimisa leswaku a nga va wa wukhongoti byini ke?​—Dondzra Mattheo 24:14.

• Valandzreli va Yesu a va titlhanganisi ni misava leyi ya ku biha. U nga va tiva hi ndlela leyi va fambelaka kule ha yone ni swa mafumela kumbe ku lwetana ka vhanu hi timhaka ta mahanyela. (Yohan 17:16; 18:36) Nangweso, a va yetiseli mikhuva ni mimpimiso ya misava leyi honanaka.​—Dondzra Yakob 4:4.

• Vakriste va ntiyiso va zrandzranana swinene. Hi ku pfuniwa hi Zritu dzra Xikwembu Nkulukumba, va dondzrele ku hlonipha tinxaka hinkwatu ta vhanu. Wukhongoti bya madzrimi byi tala ku seketela tiyimpi ta matiko, kambe vagandzreli va ntiyiso a va pfumeli ku yentxa tanu. (Mika 4:1-3) Ku hambana ni swoswo, Vakriste va ntiyiso va tizrisa nkama wavu ni mali na va nga tifeleli akuva va pfuna ni ku tiyisa vambeni.​—Dondzra Yohan 13:34, 35; 1 Yohan 4:20.

Hi byini wukhongoti lebyi byi seketelaka tindondzro ta byone hinkwatu ka Zritu dzra Xikwembu Nkulukumba, byi bekelaka lisima vito dzra Xikwembu Nkulukumba, byi tlhela byi zrezra leswaku Mfumu wa Xikwembu Nkulukumba hi wone ntsena wu nga dumbo ledzri saleliki vhanu? Hi wini ntlawa lowu hanyaka hi lizrandzru nakone wu kalaka wu nga ngheneleli tiyimpi? Hi wani mavonela yaku?​—Dondzra 1 Yohan 3:10-12.