BUE 10
Ɛkɔyɛ Sɛɛ Na Anwu Naholɛ Asomvoɛ?
1. Aso naholɛ soen kõmaapɛ yeɛ ɔwɔ berɛ anaa?
“Ɛmɔnea ɛmɔnwo yé wɔ ngɔmhyɛfoɛ ngondombofoɛ nwo.”—MATEO 7:15.
Soen kõmaapɛ yeɛ Yesu hãne yenwo dwirɛ hyirɛle ye asuafoɛ nemɔ ɔ, yeɛ ole naholɛ soen. Waayɛ kyɛ atẽe bɔ ɔkɔ daa ngõa nu ne. Yesu hãne kyɛ: “Mmenia kãa bie yeɛ benwu” sɔ atẽe ne ɔ. (Mateo 7:14) Soen bɔ ogyi Nyameɛpiri Dwirɛ Bible naso ngome yeɛ ode to nu ɔ. Naholɛ soen nu mmenia mukoraati gyidie te kõ.—Kenga Yohane 4:23, 24; 14:6; Ɛfesofoɛ 4:4, 5.
Nea vidio bɔ yeɛ ole Aso Nyameɛpiri Pene Sõen Ahoroɛ Mukoraati So Anaa?
2. Nzu yeɛ Yesu hã fale Kristofoɛ bɔ bɛte ngondombofoɛ nanwo ɔ?
“Bekyire kyɛ bɛso Nyameɛpiri nakoso bɛmva bɛ nneyɛɛ bengyire sɔ.”—TITO 1:16.
Yesu bɔle kɔkɔ kyɛ ngondombo adiyifoɛ kɔsɛkye Kristosom. Wɔ sona nye so ne, ɔkɔɔyɛ tekyɛ bɔ bɛte naholɛ asomvoɛ ne. B’asɔre ahoroɛ ne kã kyɛ bɛte Kristofoɛ. Nakoso ɛkɔhora konwu mmeni horɛ bɔ bɛte ɔ. Atẽe beni aso? Naholɛ soen ngome yeɛ ɔkɔhora kɔmaa yekonya naholɛ Kristofoɛ bɔ bɛda suban bɔ ɔte páa ali maa mmenia nwui ɔ.—Kenga Mateo 7:13-23.
3. Ɛkɔyɛ sɛɛ na anwu naholɛ asomvoɛ?
Nea nningyein nnu bɔ ɔkɔmaa yekonwu bɛ ɔ:
-
Naholɛ Kristofoɛ de Bible ne to nu kyɛ ɔte Nyameɛpiri Dwirɛ. Bɛbɔ mmɔden bɛfa enu nnyinasoɛdwirɛ bɛbɔ bɛ bra. Yeti naholɛ soen da nzorɛ wɔ soen ahoroɛ bɔ bɛfa bɛ ngyerɛkyerɛ begyina sona nzusuyɛɛ so nanwo koraa. (Mateo 15:7-9) Naholɛ Kristofoɛ fa bɔ bekyirekyire ne bɛbɔ bɛ bra.—Kenga Yohane 17:17; 2 Timoteo 3:16, 17.
-
Yesu sililɛfoɛ ne hyɛ Nyameɛpiri dumaa Yehowa ne animnyam. Yesu nate Nyameɛpiri dumaa bɔ ɔmaa mmenia nwuni ye naso hyɛle ye animnyam. Ɔbokale mmenia maa benwuni Nyameɛpiri, na ohyirehyirɛle bɛ kyɛ bɛbɔ mbaeɛ kyɛ Nyameɛpiri dumaa nwo te. (Mateo 6:9) Wɔ nekaa bɔ ɛte ne, soen beni yeɛ enufoɛ maa mmenia nwu Nyameɛpiri dumaa ne ɔ?—Kenga Yohane 17:26; Romanfoɛ 10:13, 14.
-
Naholɛ Kristofoɛ kã Nyameɛpiri Ahennie nanwo dwirɛ. Nyameɛpiri somane Yesu kyɛ ɔɔhã Ahennie nanwo nzɛmba. Nyameɛpiri Ahennie ne ngome yeɛ ole adasa mukoraati anyelasoɛ ɔ. Yesu hɔle so hãne yenwo dwirɛ oodwule ye wue nu. (Luka 4:43; 8:1; 23:42, 43) Ɔhãne kyɛ ye sĩlilɛfoɛ ne kɔhã Ahennie nanwo dwirɛ. Sɛ ebie ba wɔ berɛ kyɛ ɔbaahã Nyameɛpiri Ahennie nanwo dwirɛ kyire wɔ a, ɛkɔhã kyɛ ofi soen beni anu?—Kenga Mateo 24:14.
-
Yesu sĩlilɛfoɛ tte wiase tɛɛ he bue. Bɔ ɛkɔfa konwu bɛ yeɛ ole bɛnwo bɔ bɛmva benwurowura amanyɔnzɛm ɔne basabasayɛlɛ bɔ ɔkɔ so wɔ wiase he anu ne. (Yohane 17:16; 18:36) Afei koso, benzuesua wiase ne nneyɛɛ ne bɛ suban tɛɛ ne bie.—Kenga Yakobo 4:4.
-
Naholɛ Kristofoɛ da ɔdɔ sorongo ali kyire bɛnwo. Nyameɛpiri Dwirɛ bɔ besua ne maa bɛda obuo ali bekyire mmenia bɔ bɛfi mmusuakue ahoroɛ mukoraati nu ne. Ɔwɔ nu kyɛ ngondombo soen ahɔ so afa bɛnwo bawurowura maenmaen ne kõɛ ahoroɛ nu de, nakoso naholɛ Kristofoɛ de bɛnyɛ sɔ. (Mika 4:1-3) Mmom ne, naholɛ Kristofoɛ fa bɛ mmerɛ ne b’anwoserɛ bɛboka mmenia, na bɛhyɛ bɛ ngunaen.—Kenga Yohane 13:34, 35; 1 Yohane 4:20.
4. Yeti ɛkɔhora konwu naholɛ soen anaa?
Soen beni yeɛ bɛfa bɛ ngyerɛkyerɛ mukoraati begyina Bible naso, bɛhyɛ Nyameɛpiri dumaa animnyam, na bekyirekyire kyɛ Nyameɛpiri Ahennie ne ngome yeɛ ɔte adasa anyelasoɛ komaapɛ ɔ? Sɛ ɛnea a, kue beni yeɛ bɛda ɔdɔ ali na bɛmva bɛnwo benwura kõɛ nu ɔ?—Kenga 1 Yohane 3:10-12.
