NGÚERUÜ̃ 10
Ngeü̃rüü̃ i yaꞌõgüü
1. Nangemaü̃ eꞌna wüitama i yaꞌõgüü̃tücumü i aicumaü̃?
‘Rü nacaꞌ peuãẽgü i ngema dorataagüü̃ i nügü iꞌugünetaü̃ na Tupanaarü orearü uruü̃gü yiꞌĩgüü̃.’ (MATEU 7:15)
Nangema. Wüitama i yaꞌõgüü̃tücumü i aicumaü̃tchigamaã nangue ga Ngetchutchu. Ngema natücumü rü nhama wüi nama i maꞌü̃wa tüü̃ gaü̃rüü̃ niꞌĩ. Notürü noretama i duü̃ü̃gü ta nüü̃ nayangaugü i ngema nama. (Mateu 7:14) Tayanguꞌẽẽ i taꞌacü Tupanaarü Ore nüü̃ iꞌuü̃ ya yiꞌema nawaee na Tupanaü̃ tataãẽꞌẽẽ. Guü̃ma i aicuma yaꞌõgüü̃ rü tama nanatoraü̃ i norü õgüwa rü wüitama i yaꞌõgüü̃tücumü i aicumaü̃wa namaꞌẽ. Nawa naugütae i Juã́ũ 4:23, 24, 14:6 rü Epéchiucü̃ã 4:4, 5.
Nüü̃ cudau i vídeo Rüeꞌna guü̃ma i yaõgütücumügü Tupana nanayauü̃?
2. Aicumaü̃maã nangueü̃ eꞌna i guü̃ma i natücumügü i cristurüü̃ iꞌĩgüü̃?
‘Nügü yaꞌugügügu rü Tupanaü̃ nacuaꞌ, notürü ngema nümagü naügüü̃wa nüü̃ tacuaꞌ na tama aicuma yiꞌĩü̃ na Tupanaü̃ nacuaꞌgüü̃.’(TITU 1:16)
Tama. Ngetchutchu rü natchiga nideꞌa ga yaꞌõgüneta i doratamaã ngueü̃. Nümagü nügü niꞌugü na cristurüü̃ yaꞌĩgüü̃. Notürü nüü̃ cucuaꞌama na tama aicuma nayaꞌõgüü̃. Nhuãcü ta? Cunangugügu ta aicuma Ngetchutchu nüü̃ iꞌuü̃ naügü. Nawa naugütae i Mateu 7:13-23.
3. Nhuãcü ta nüü̃ cucuaꞌü̃ na teꞌegü tiꞌĩgüü̃ ya aicuma cristurüü̃ iꞌĩgüe?
Nangugü i nhaã 5 nacümagü i aicuma cristurüü̃ iꞌĩgüü̃:
-
Nümagü rü nayaꞌõgü na Tupanawa ne naũ i Tupanaarü Ore. Nümagü rü naga naꞌinüẽ i Tupanaarü Orearü ucuẽgü. Muũma i yaꞌõgüü̃tücumügü rü yatüarü inügumare naĩ. (Mateu 15:7-9) Aicuma yaꞌõgüü̃tücumü rü nayanguꞌẽẽgü i taꞌacü Tupanaarü Ore namaã nangueü̃. Nawa naugütae i Juã́ũ 17:17 rü 2 Timúteu 3:16, 17.
-
Nümagü rü nayaꞌuutchigü i Yeuwa ya Tupanaẽga rü namaã nangueꞌẽẽtae. Ngetchutchu nayaꞌuutchiãü̃ ga Tupanaẽga rü nanawe na Tupanaẽga rü guü̃maü̃ narümeꞌmaẽ. Yeguma duẽꞌẽgüpeewa nayumuꞌẽgu nanangotchigaꞌẽẽ na Tupanaẽga nangemaü̃. (Mateus 6:9, TNM) Nüü̃ cucuaꞌü̃ na ngeü̃rüü̃ yiꞌĩü̃ i yaꞌõgüü̃tücumü i Yeuwaẽgagu ideꞌagüü̃? Nawa naugütae i João 17:26 rü Romanos 10:13, 14, TNM.
-
Nümagü nüü̃ niꞌugügü na nhuãcü Yeuwa Ngetchutchuü̃ nayautchi na Ãẽꞌgacü yiꞌĩü̃caꞌ rü duẽꞌẽgü ya naanecü̃ãü̃ narüngüꞌẽẽ ta. Ngetchutchu nüü̃ niꞌu i guü̃ma i meü̃ i Yeuwa naüü̃ ta. Tupana rica ta niꞌĩ duẽꞌẽgüarü gutchaü̃gü meꞌẽẽ. Yematchigagu nideꞌaama ga Ngetchutchu nhumata nawa nangu ga yema nguneü̃ ga nagu nayuü̃. (Luca 4:43, 8:1, 23:42, 43[TNM]) Rü nhuꞌmatchi norü ngueꞌü̃güü̃ namu na yematchigatama yaꞌugügüü̃caꞌ. Ngeü̃rüü̃ i yaꞌõgüü̃tücumü i nüü̃ iꞌugügüü̃ na nhuãcü Yeuwa Ngetchutchuü̃ nayautchi na Ãẽꞌgacü yiꞌĩü̃caꞌ? Nawa naugütae i Mateus 24:14, TNM.
-
Nümagü rü tama naanecü̃ã i tchiegüü̃wa naügü. Duẽꞌẽgü yaꞌõgüü̃tücumü i aicumaü̃wa ügüe tama puritchicagu taãgü bai natanü taã i duü̃ü̃gü i tagüü̃ rüꞌugüü̃. (Juã́ũ 17:16, 18:36) Rü nhuꞌmatchi tama tanaügü i taꞌacü tchieü̃ i naanecü̃ã naügüü̃. Nawa naugütae i Tiagu 4:4.
-
Nümagü nügü nangetchaü̃gü. Nümagü Tupanaarü Orewa nüü̃ nacuaꞌgü na tautama duü̃ü̃gütchi naꞌaie. Natücumügü i yaꞌõgüneta muũ eꞌpüꞌcüna gueragüwa naügü notürü yaꞌõgüü̃tücumü i aicumaü̃ rü tama ngema naügü. (Miquéa 4:1-3) Ngema aicuma yaꞌõgüü̃ norü me niꞌĩ na toguãü̃ narüngüꞌẽẽgü rü norü diẽrumaã toguãü̃ narüngüꞌẽẽgü. Nawa naugütae i Juã́ũ 13:34, 35 rü 1 Juã́ũ 4:20.
4. Nüü̃ cucuaꞌü̃ na ngeü̃rüü̃ yiꞌĩü̃ i yaꞌõgüü̃tücumü i aicumaü̃?
Ngeü̃rüü̃ i yaꞌõgüü̃tücumü i Tupanaarü Ore ingegüü̃ rü Tupanaẽga iꞌuutchigüü̃? Teꞌegü tiꞌĩgü ya yiꞌema Tupanaarü Ore iꞌugügüe rü nhuãcü ta Tupana duẽꞌẽgüarü gutchaü̃gü yaguꞌẽẽ? Teꞌegü ya yiꞌema tügü ngetchaü̃güe rü nhuꞌmatchi tama gueragüwa ügüe? Tüü̃ cucuaꞌgüü̃? Nawa naugütae i 1 Juã́ũ 3:10-12.
