SAMBIRU 10
Kumbi Mungachiziŵa Wuli Chisopa Chauneneska?
1. Kumbi pe chisopa chimoza pe chauneneska?
“Tcheŵani ndi achimi aboza.”—MATEYU 7:15.
Yesu wangwambisa chisopa chimoza pe chauneneska ndipu akusambira ŵaki nawu ŵenga mu chisopa chenichi. Chisopa chauneneska chiyanana ndi msewu wo ulongozge ŵanthu ku umoyu wambula kumala. Yesu wangukamba kuti ‘mbamanavi wo atiwusaniya.’ (Mateyu 7:14) Chiuta wazomereza kusopa ko Bayibolu likamba. Akhristu wosi auneneska agomezga vinthu vakuyanana.—Ŵerengani Yohane 4:23, 24; 14:6; Aefeso 4:4, 5.
Woneriyani vidiyo yakuti Kumbi Chiuta Wazomereza Kusopa Kwa Mtundu Wewosi?
2. Kumbi Yesu wangukambanji va Akhristu aboza?
“Azomera kuti aziŵa Chiuta kweni atimukana ndi ntchitu zawu.”—TITO 1:16.
Yesu wangutcheŵeska kuti achimi aboza azamukwamba kusambiza vinthu vaboza pakati pa Akhristu. Yiwu awoneka nge asopa mwauneneska ndipu akamba so kuti matchalitchi ngawu ngachikhristu. Kweni munthu wangaŵaziŵa umampha ŵanthu ŵenaŵa kuti mbakhristu aboza. Kumbi tingaŵaziŵa wuli? Tingaŵaziŵa chifukwa chisopa chauneneska pe ndichu che ndi Akhristu wo alongo mijalidu yamampha ndipu vakuchita vawu navu vilongo kuti mbakhristu nadi auneneska.—Ŵerengani Mateyu 7:13-23.
3. Kumbi mungaŵaziŵa wuli Akhristu auneneska?
Wonani vinthu vinkhondi ivi vo mungaziŵiya Akhristu auneneska:
-
Akhristu auneneska atumbika Bayibolu kuti ndi Mazu ngaku Chiuta. Yiwu ayesesa kulondo fundu za mu Bayibolu pa umoyu wawu. Mwaviyo, chisopa chauneneska chipambana ndi chisopa chaboza cho chitende fundu za ŵanthu. (Mateyu 15:7-9) Akhristu auneneska asambiza waka cha kweni ayesesa kuchita vo asambiza.—Ŵerengani Yohane 17:17; 2 Timote 3:16, 17.
-
Akhristu auneneska atumbika zina laku Chiuta lakuti Yehova. Yesu watumbikanga zina laku Chiuta chifukwa wakambiyanga ŵanthu kuti aliziŵi. Iyu wanguwovya ŵanthu kuti amuziŵi umampha Chiuta ndipuso wanguŵasambiza mo angapemphere kuti zina laku Chiuta litoweseki. (Mateyu 6:9) Kumbi ntchisopa nichi muchigaŵa chinu cho chitovya ŵanthu kuti aziŵi zina chayilu laku Chiuta?—Ŵerengani Yohane 17:26; Aroma 10:13, 14.
-
Akhristu auneneska apharazga Ufumu waku Chiuta. Chiuta wangutuma Yesu kuti wazipharazgi uthenga wamampha wa Ufumu. Ufumu waku Chiuta pe ndiwu wazamuwovya ŵanthu. Yesu wangulutirizga kupharazga Ufumu wenuwu mpaka pa zuŵa lo wangufwiya. (Luka 4:43; 8:1; 23:42, 43) Iyu wangukamba kuti akusambira ŵaki azamupharazga uthenga wenuwu. So asani munthu munyaki wangakukambiyani kuti wakhumba kukambiskana namwi va Ufumu waku Chiuta, mungakamba kuti ngwachisopa nichi?—Ŵerengani Mateyu 24:14.
-
Akhristu auneneska achitaku cha vakuchitika va charu chiheni ichi. Akhristu auneneska mungaŵaziŵa chifukwa chakuti achitaku cha chechosi chakukwaskana ndi ndali ndipuso mphindanu za charu. (Yohane 17:16; 18:36) Kweniso akana maŵanaŵanu ndi mijalidu yiheni yacharu ichi.—Ŵerengani Yakobe 4:4.
-
Akhristu auneneska atanjana ukongwa. Vo asambira mu Mazu ngaku Chiuta vitiŵawovya kuti atumbikengi ŵanthu amitundu yosi. Chinanga kuti visopa vaboza visereriyapu mu nkhondu zo zichitika muvyaru, kweni Akhristu auneneska achitaku cha nkhondu. (Mika 4:1-3) Mumalu mwaki, Akhristu auneneska agwiriskiya ntchitu nyengu ndipuso vinthu vawu kuti awovyi anyawu ndi kuŵachiska.—Ŵerengani Yohane 13:34, 35; 1 Yohane 4:20.
4. Kumbi mwachiziŵa sonu chisopa chauneneska?
Kumbi ntchisopa nichi cho chisambiza nadi fundu zakutuliya mu Mazu ngaku Chiuta, cho chitumbika zina laku Chiuta ndi kupharazga kuti Ufumu waku Chiuta pe ndiwu wazamumalisa masuzgu nga ŵanthu? Kumbi mbakhristu achisopa nichi wo atanjana ukongwa kweniso achitaku cha nkhondu? Kufika yapa sonu mutenere kuti mwachiziŵa chisopa chauneneska.—Ŵerengani 1 Yohane 3:10-12.
