SAMBIRO 10
Kasi Mungachimanya Wuli Chisopa Chaunenesko?
1. Kasi pali chisopa chimoza pera chaunenesko?
“Chenjerani na zintchimi zitesi.”—MATEYU 7:15.
Yesu wakasambizga ŵalondezgi ŵake chisopa chimoza chaunenesko. Chili nga ni nthowa iyo yikulongozgera ku umoyo wamuyirayira. Yesu wakati “mbachoko awo ŵakuyisanga” nthowa iyi. (Mateyu 7:14) Chiuta wakukhumba kuti tisopenge mwakuyana na ivyo Mazgu ghake ghakuyowoya. Wose awo ŵakusopa mu unenesko ŵali na chipulikano chimoza.—Ŵazgani Yohane 4:23, 24; 14:6; Ŵaefeso 4:4, 5.
Wonelerani vidiyo yakuti Kasi Visopa Vyose Vikumukondweska Chiuta?
2. Kasi Yesu wakayowoyachi vya Ŵakhristu ŵatesi?
“Ŵakuzomera pakweru kuti ŵakumanya Chiuta, kweni ŵakumukana na milimo yawo.”—TITO 1:16.
Yesu wakati ntchimi zitesi zizamunjizga visambizgo vyautesi mu mpingo Wachikhristu. Kuwaro zikuwoneka nga mbasopi ŵaunenesko. Nawo ŵakuti Mbakhristu, kweni ŵakumanyikwa kuti mbatesi. Ŵakumanyikwa mbu? Ŵakhristu ŵanadi ŵakusangika mu chisopa chaunenesko pera, ndipo ŵakumanyikwa na ivyo ŵakuchita.—Ŵazgani Mateyu 7:13-23.
3. Kasi mungaŵamanya wuli awo ŵakusopa mu unenesko?
Tiyeni tiwone vinthu vinkhondi ivyo vingamovwirani kuŵamanya:
-
Awo ŵakusopa mu unenesko ŵakuchindika Baibolo pakuŵa Mazgu gha Chiuta. Ŵakuyezgayezga kulondezga ivyo likuyowoya. Ntheura, chisopa chaunenesko chikupambana na chisopa icho chikwendera maghanoghano gha ŵanthu. (Mateyu 15:7-9) Awo ŵakusopa mu unenesko ŵakuchita ivyo ŵakusambizga.—Ŵazgani Yohane 17:17; 2 Timote 3:16, 17.
-
Awo ŵakulondezga Yesu ŵakuchindika zina la Chiuta, Yehova. Yesu wakamanyiska ŵanthu zina la Chiuta. Wakawovwira ŵanthu kumanya Chiuta, ndipo wakaŵasambizga kulomba kuti zina la Chiuta lituŵiskike. (Mateyu 6:9) Uko mukukhala, kasi ntchisopa wuli icho chikuchiska ŵanthu kuti ŵachemenge pa zina la Chiuta?—Ŵazgani Yohane 17:26; Ŵaroma 10:13, 14.
-
Ŵakhristu ŵaunenesko ŵakupharazga Ufumu wa Chiuta. Chiuta wakatuma Yesu kuti wapharazge Ufumu. Ufumu wa Chiuta ndiwo wekha ungawombora ŵanthu. Yesu wakalutilira kuyowoya vya ufumu uwu m’paka pa zuŵa ilo wakafwira. (Luka 4:43; 8:1; 23:42, 43) Wakaphalira ŵalondezgi ŵake kuti ŵapharazge Ufumu wa Chiuta. Usange munthu munyake wakwiza kwa imwe na kuyowoya namwe vya Ufumu wa Chiuta, kasi mukughanaghana kuti wangaŵa wa chisopa wuli?—Ŵazgani Mateyu 24:14.
-
Awo ŵakulondezga Yesu ŵali ku chigaŵa cha charu chiheni ichi yayi. Ŵakunjilirapo yayi pa ndyali panji mphindano. (Yohane 17:16; 18:36) Kweniso, ŵakuchitako yayi nkharo ziheni izo zikuchitika mu charu.—Ŵazgani Yakobe 4:4.
-
Ŵakhristu ŵaunenesko ŵakutemwana zanadi. Ŵakuchindika ŵanthu ŵa mitundu yose, chifukwa ŵakulondezga Mazgu gha Chiuta. Nangauli chisopa chautesi kanandi chikunjilirapo pa nkhondo, awo ŵakusopa mwaunenesko ŵakukana kuchita nthena. (Mika 4:1-3) Kweniso awo ŵali mu chisopa chaunenesko ŵakumalira nyengo yawo na chuma chawo pa kovwira na kukhwimiska ŵanji.—Ŵazgani Yohane 13:34, 35; 1 Yohane 4:20.
4. Kasi mwachimanya chisopa chaunenesko?
Kasi ntchisopa wuli icho chikusambizga nadi Mazgu gha Chiuta, chikuchindika zina lake, na kupharazga kuti Ufumu wa Chiuta ndiwo wekha ungawombora ŵanthu? Kasi ntchisopa wuli icho ŵanthu ŵake ŵakutemwana zanadi, ndipo ŵakuchitako yayi nkhondo? Imwe mukuti wuli?—Ŵazgani 1 Yohane 3:10-12.
