FUNDO 10
Tingaziya kudini kunamata kwe cokwadi?
1. Kodi kune cinamato cimwe basi ce cokwadi here?
“Ngwarirai maphorofiti ekunyepera.”—MATEU 7:15.
Djesu wakafundisa cinamato cimwe basi ku atereri ake: ce cokwadi. Kunamata uku kakaita hingana gwanza rinotiendesa ku upenyu usikaperi. Djesu wakati:“ashomanani anorigumira.” (Mateu 7:14) Mwari anotendera kunamata kuyani basi kunopindirana ne soko rake re cokwadi. Ese anamati e cokwadi akabatana mu kutenda kumwe basi.—Erengai Juau 4:23, 24; 14:6; WaEfeso 4:4, 5.
2. Djesu wakareketei nge zve maKristu ekunyepera?
“Awona anoreketa pacena kuti anoziya Mwari asi anomuramba ngo zviito zvawo.”—TITO 1:16.
Djesu wakareketa kuti maKristu ekunyepera aizo kangaidza ciKristu. Ngecekunza awona akaita hingana maKristu e cokwadi. Manamatire awo anonyepera kuita hingana eciKristu. Asi azvishuphi kuzviwona kuti awona aasi maKristu e cokwadi. Ngei? Ngokuti kunamata kwe cokwadi basi ndiko kunobara maKristu e cokwadi anopangidza mawara no mabasa akanaka, izvi zvirinyore kuonekwa nge anhu.—Erengai Mateu 7:13-23.
3. Tingaaziya kudini anamati e cokwadi?
Ona zvipangidziro zvishanu zvinoteera:
-
Anamati e cokwadi anoreremedza Bhaibheri se Soko ra Mwari. Anamati e cokwadi anopeta masimba kuitira kuti ararame maererano ne mipango dze Bhaibheri. Nokudaro, cinamato ce cokwadi cakasiyana no zvinamato zvinofundisa nzero dze anhu. (Mateu 15:7-9) Anamati e cokwadi anorarama maererano ne zviya zvaanoparidza.—Erengai Juau 17:17; 2 Timoti 3:16, 17.
-
Atereri a Djesu e cokwadi anokudza zina ra Mwari, Djehovha. Djesu wakakudza zina ra Mwari ngokuita kuti riziikanwe. Iyena wakabetsera anhu kuti aziye Mwari uye wakaafundisa kunamata kuitira kuti zina ra Mwari riceneswe. (Mateu 6:9) Mu mutanha waunogara cinamato cipi cinoita kuti zina ra Mwari riziikanwe?—Erengai Juau 17:26; WaRoma 10:13, 14.
-
MaKristu e cokwadi anoparidza nge zve Umambo wa Mwari. Mwari wakatuma Djesu pa nyika kuti aparidze masoko akanaka e Umambo. Umambo wa Mwari ndiwo wega basi kariro yakagondeka ku anhu. Djesu wakarumbwa ecireketa nge zve Umambo uu dakara zuwa raakafa. (Ruka 4:43; 8:1; 23:42, 43) Djesu wakareketa kuti atereri ake aizoparidza nge zve Umambo. Kana pa nyumba pako pakaguma munhu ecireketa na iwewe zviro zvakaringana no Umambo wa Mwari, pamweni munhu uu ngoo cinamato cipi?—Erengai Mateu 24:14.
-
Atereri a Djesu aaripi kudii re nyika ino yakashata. Ungaaziya nokusapindira kawo mu mabongozozo kana mu matongerwe e mu nyika. (Juau 17:16; 18:36) Kupinda izvi, aatedzeri zviito kana marangariro anokuwadza e mu nyika ino.—Erengai Tiyago 4:4.
-
MaKristu e cokwadi anooneka ngo rudo raanopangidzira ku adoni awo. Awona akafunda musoko ra Mwari kureremedza mushobo wese we anhu. Zvinamato zvokunyepera kajinji-kajinji zvinobetsera no simba hondo dze madzinza, asi anamati e cokwadi anoramba kuita izvi. (Mika 4:1-3) Kusiyana na izvi maKristu e cokwadi anoseenzesa nguwa yawo no zvaanazvo kuti abetsere uye kuti abambise amweni.—Erengai Juau 13:34, 35; 1 Juau 4:20.
4. Waakukwanisa kuona cinamato ce cokwadi here?
Cinamato cipi cinoita kuti zvese zvacinofundisa zvibude mu Bhaibheri, cinokudza zina ra Mwari uye cinoziisa Umambo wake se kariro imwe basi yakagondeka ku anhu? Boka ripi re anhu rinopangidza rudo uye aripindiri mu hondo? Unorangarirawo kudini?—Erengai 1 Juau 3:10-12.
