XCHANOBIL 10
¿Kʼuxi ta ojtikinel li melel relijione?
1. ¿Mi jun noʼox melel relijion oy?
«Chabio me abaik lek ta stojolal li jloʼlavanej [j-alkʼopetike]» (MATEO 7:15)
Li Jesuse laj yakʼbe xchan yajtsʼaklomtak ti jun noʼox melel relijion oye. La skoʼoltas ta jun be ti ch-ikʼvan batel ta kuxlejal sbatel osile, pe li yan relijionetike xkoʼolaj kʼuchaʼal jun mukʼta be ti ch-ikʼvan batel ta lajelale (Mateo 7:14). Li Diose jaʼ noʼox chchʼam ichʼel ta mukʼ mi jech chichʼ pasel kʼuchaʼal chal li Skʼop ti jaʼ li Vivliae. Li buchʼutik jech chichʼik ta mukʼ kʼuchaʼal chal li Skʼope jmoj xchʼunel yoʼontonik. Kʼelo Juan 4:23, 24; 14:6; Efesios 4:4, 5.
Kʼelo li video ¿Mi lek chil skotol relijionetik li Diose?
2. ¿Kʼusi laj yal Jesus ta sventa li jecheʼ jchʼunolajeletike?
«Chalik ta jamal ta stojolal krixchanoetik ti xojtikinik Diose, pe tspʼajik ta skoj li yabtelike» (TITO 1:16)
Li Jesuse laj onoʼox yal ti chlik jloʼlavanej j-alkʼopetik ti tsokesik li yajtsʼaklomtake. Li jnitvanejetik ta relijion xchiʼuk li xchiʼiltakike tskuy sbaik ta yajtsʼaklomtak Kristo. Akʼo mi chalik ti melel li kʼusi chakʼik ta chanele, pe jaʼ noʼox chloʼlavanik. Ta melel, li voʼotike xuʼ xkakʼtik venta bu junukal li melel relijione, yuʼun li buchʼutik te oyik ta melel relijione jamal xvinaj ta stalelalik. Kʼelo Mateo 7:13-23.
3. ¿Kʼuxi xuʼ xavojtikin bu junukal li melel relijione?
Jkʼelbetik skʼoplal voʼtosuk:
-
Xchʼunojik ti jaʼ Skʼop Dios li Vivliae. Maʼuk chchʼunik li kʼusitik chakʼik ta chanel krixchanoetike, jaʼ oy ta yoʼonton chchʼunik li beiltaseletik ta Vivliae (Mateo 15:7-9). Jech xtok, chakʼ ta xkuxlejalik li kʼusi chalik ta cholmantale. Kʼelo Juan 17:17; 2 Timoteo 3:16, 17.
-
Chichʼik ta mukʼ li sbi Dios ti jaʼ Jeovae. Li Jesuse laj yichʼbe ta mukʼ sbi Stot kʼalal laj yakʼbe ta ojtikinel li sbie. Jech xtok, la xchanubtas krixchanoetik ta sventa li Jeovae xchiʼuk la xchanubtasan ti akʼo skʼanik ta orasion ti xichʼ chʼultajesbel li sbi Diose (Mateo 6:9). ¿Kʼusi relijional chakʼ ta ojtikinel sbi Dios ti bu nakalote? Kʼelo Éxodo 3:14, Ch, tsʼib ta yok vun; Juan 17:26.
-
Chalbeik skʼoplal li Ajvalilal yuʼun Diose. Kʼalal take tal ta balumil li Jesuse, jaʼ sventa tal yal lekil aʼyejetik sventa li Ajvalilal yuʼun Diose, ti jaʼ noʼox te tsta spatobil yoʼonton li krixchanoetike. Jaʼ jech-o la spas kʼalal jutuk xa ox skʼan xchame (Lukas 4:43; 8:1; 23:42, 43). Li Jesuse laj yal ti chalbeik batel skʼoplal Ajvalilal yuʼun Dios li yajtsʼaklomtak eke. Mi oy buchʼu kʼot yalbot ta sventa li Ajvalilal yuʼun Diose, ¿kʼusi van relijional xanaʼ? Kʼelo Mateo 24:14.
-
Muʼyuk te skʼoplalik li ta chopol balumil liʼe. Li yajtsʼaklomtak Jesuse muʼyuk tstikʼ sbaik ta politika mi jaʼuk tstikʼ sbaik kʼalal tsaʼik kʼop li krixchanoetike (Juan 17:16; 18:36). Jech xtok, muʼyuk chchanbeik stalelal li balumile xchiʼuk muʼyuk tspasik li kʼusitik chakʼ vokolile. Kʼelo Santiago 4:4.
-
Jamal xvinaj ti skʼanoj sbaike. Xchanojik ta Skʼop Dios ti skʼan xichʼik ta mukʼ skotol krixchanoetike manchuk mi jelel stsʼunbalik. Li jecheʼ relijionetike nopolik noʼox chkoltavanik ta paskʼopetik, pe li melel yajtsʼaklomtak Kristoe mu jechuk tspasik (Mikeas 4:1-3). Jech xtok, xchʼakoj skʼakʼalik xchiʼuk chakʼ kʼusitik oy yuʼunik sventa skoltaik xchiʼuk spatbeik yoʼonton li xchiʼiltakike, pe muʼyuk kʼusi smalaoj ch-akʼbatik. Kʼelo Juan 13:34, 35; 1 Juan 4:20.
4. ¿Bu junukal xanaʼ li melel relijione?
¿Kʼusi relijional ti ta Vivlia tslokʼes skotol li kʼusitik chakʼ ta chanele, ti chichʼbe ta mukʼ sbi Diose xchiʼuk ti chalbe skʼoplal ti jaʼ noʼox spatobil yoʼonton krixchanoetik li Ajvalilal yuʼun Diose? ¿Bu junukal relijion skʼanoj sbaik ta melel xchiʼuk ti muʼyuk tstikʼ sbaik ta paskʼopetike? ¿Kʼusi chanop li voʼote? Kʼelo 1 Juan 3:10-12.
