UYONO 10
Mavọ Wo Se Vwo Vughe Ẹga Ruyota Na?
1. Ẹga ruyota vuọvo yen herọ?
“Kẹnoma kẹ emraro rẹ efian.”—MATIU 7:15.
Ẹga vuọvo yin Jesu yono idibo rọyen, ọyen ẹga ruyota na. A vwẹ ẹga na vwo dje idjerhe rẹ ihwo wan kpẹ arhọ ri bẹdẹ. Jesu tare nẹ: “ihwo tutuno re sa guọnọ mrẹ.” (Matiu 7:14) Ẹga rẹ iyono rọyen nẹ Baibol rhe ọvo yẹn Ọghẹnẹ rhiabọ reyọ. Ihwo ejobi re ga ẹga ruyota na vwo esegbuyota ọvuọvo ro ku ayen kugbe.—Se Jọn 4:23, 24; 14:6; Ẹfesọs 4:4, 5.
Ni ividio na Ọghẹnẹ Rhiabọreyọ Ẹga Eje?
2. Die yin Jesu ta kpahen Inene-ri-Kristi refian?
“Ayen vwẹ oma nẹ nẹ ayen riẹn Ọghẹnẹ; ẹkẹvuọvo ayen wan evun rẹ iruo rayen siọn.”—TAITỌS 1:16.
Jesu si idibo rọyen orhọn nẹ emraro refian che miovwo Inene-ri-Kristi ruyota. Emraro refian nana dje oma rayen nẹ ayen ga ẹga ruyota. Odẹ ri Kristi yẹn ayen ji vwo se oma rayen. Ẹkẹvuọvo, wọ sa vwẹ uruemu rayen vwo vughe ayen. Idjerhe vọ? Inene-ri-Kristi ruyota ọvo yen ga ẹga ruyota. Ayen ọvo ji vwo uvi rẹ uruemu revwo vughe ẹga ruyota na.—Se Matiu 7:13-23.
3. Mavọ wo se vwo vughe ihwo re ga ẹga ruyota?
E jẹ a fuẹrẹn erọnvwọn iyorin revwo vughe ihwo re ga ẹga ruyota na:
-
Ihwo re ga ẹga ruyota muọghọ kẹ Ota rẹ Ọghẹnẹ Baibol na. Ayen davwẹngba rẹ ayen se vwo yeren akpọ rayen nene iruemu rẹ urhi rehẹ evunrẹ Baibol na. Ọtiọyen na, ẹga rẹ uyota fẹnẹ ẹga refian keridie ẹga refian mu iyono rayen kpahen erianriẹn rẹ ihworakpọ. (Matiu 15:7-9) Ihwo re ga ẹga ruyota ruẹ nene obo rẹ ayen ghwoghwo.—Se Jọn 17:17; 2 Timoti 3:16, 17.
-
Inene-ri-Kristi ruyota muọghọ kẹ odẹ rẹ Ọghẹnẹ, Jihova. Jesu muọghọ kẹ odẹ rẹ Ọghẹnẹ rọ vwọ vuẹ ihwo kpahọn. Ọ chọn ihwo uko vwọ riẹn odẹ rẹ Ọghẹnẹ. O ji yono ayen nẹ ayen nẹrhovwo revwo ru odẹ rẹ Ọghẹnẹfon. (Matiu 6:9) Ẹga vọ yin yono ihwo odẹ rẹ Ọghẹnẹ vwẹ asan ru wọ dia?—Se Jọn 17:26; Rom 10:13, 14.
-
Inene-ri-Kristi ruyota ghwoghwo kpahen Uvie rẹ Ọghẹnẹ. Ọghẹnẹ ji Jesu rhe rhi ghwoghwo iyẹnrẹn esiri rẹ Uvie na. Uvie rẹ Ọghẹnẹ yẹn iphiẹrophiyọ vuọvo rẹ ihworakpọ vwori. Jesu tota kpahọn rhi te ọke ro vwo ghwu. (Luk 4:43; 8:1; 23:42, 43) Ọ tare nẹ idibo rọyen ji che ghwoghwo kpahọn. Ohwo de rhi ghwoghwo Uvie rẹ Ọghẹnẹ kẹ wẹ, ẹga vọ yẹn wọ cha tane ọ hepha?—Se Matiu 24:14.
-
Inene-ri-Kristi dia ẹbẹre ọvo rẹ akpọ umwemwu nana-a. E se vughe ayen keridie, ayen vwobọ vwẹ oseghe rẹ usuon kugbe ifovwi-in. (Jọn 17:16; 18:36) Ayen nama vwẹrokere uruemu ebrabra rakpọ na-a.—Se Jems 4:4.
-
Inene-ri-Kristi ruyota nabọ vwo ẹguọnọ rẹ ohwohwo. Fikirẹ obo rẹ ayen yono nẹ Ota rẹ Ọghẹnẹ rhe, kẹ ayen muọghọ kẹ ihwo rẹ ejajẹ eje. Dede nẹ ẹga refian vwobọ vwẹ ifovwin rẹ ẹgborho na, ihwo rẹ ẹga ruyota ru ọtiọye-en. (Maika 4:1-3) Ukpe rẹ ayen vwo vwobọ vwẹ ifovwin, Inene-ri-Kristi vwẹ ọke rayen vẹ obo rẹ ayen vwori vwọ chọn ihwo uko, je bọn ayen gan.—Se Jọn 13:34, 35; 1 Jọn 4:20.
4. Wo se vughe ẹga ruyota na?
Ẹga vọ yẹn iyono rọyen nẹ Baibol rhe, ro muọghọ kẹ odẹ rẹ Ọghẹnẹ, ro ji ghwoghwo nẹ Uvie rẹ Ọghẹnẹ ọvo yẹn iphiẹrophiyọ rẹ ihworakpọ? Ihwo vọ yin dje ẹguọnọ phia, ri ji vwobọ vwẹ ifovwi-in? Die yẹn wo rorori?—Se 1 Jọn 3:10-12.
